كوكشەتاۋدا سۋ تاسقىنىنان زارداپ شەككەندەردىڭ العاشقىسى باسپانالى بولدى
كوكشەتاۋ. KAZINFORM - كوكشەتاۋ قالاسىندا سۋ تاسقىنىنان زارداپ شەككەن ەكى وتباسىنا پاتەر كىلتى تاپسىرىلدى.
اقمولا وبلىسى اكىمى باسپا ءسوز قىزمەتىنىڭ مالىمەتىنشە، پاتەر كىلتتەرىن ايماق باسشىسى مارات احمەتجانوۆ تابىس ەتتى. ول ءوز سوزىندە مەملەكەت تاراپىنان سۋ تاسقىنى كەزىندە كەلتىرىلگەن زالالدى ازايتۋ ءۇشىن بارلىق شارا قولدانىلىپ جاتقانىن اتاپ ءوتتى.
«مەملەكەت باسشىسىنىڭ تاپسىرماسى بويىنشا اقمولا وبلىسىندا ازاماتتاردىڭ قاۋىپسىزدىگىن قامتاماسىز ەتۋ جانە ولاردىڭ قاجەتتىلىكتەرىن شەشۋ بويىنشا ۇلكەن جۇمىس جۇرگىزىلىپ جاتىر. بۇگىنگى تاڭدا سۋ تاسقىنىنان زارداپ شەككەندەردىڭ اراسىندا سىزدەر العاشقىلاردىڭ ءبىرى بولىپ باسپانالى بولىپ وتىرسىزدار. وتباسىلارىڭىزدىڭ قۋانىشى ۇزاعىنان بولىپ، بار قيىنشىلىقتار ارتتا قالسىن»، - دەدى قۇتتىقتاۋ سوزىندە مارات احمەتجانوۆ.
مەملەكەتتىك قوردىڭ ەسەبىنەن كوپبالالى قاپاروۆتار مەن نيكۋليندەر وتباسى باسپانالى بولىپ وتىر. ولار بۇل پاتەرلەردى وزدەرى تاڭداعان، وندا قاجەتىنىڭ ءبارى بار.
«پرەزيدەنتكە ءبىزدىڭ ماسەلەلەرىمىزدى تەز شەشكەنى ءۇشىن العىس ايتامىز. ءبىزدىڭ وتباسىمىز ءۇشىن بۇل ۇلكەن قۋانىش، بالالار ريزا، بارلىعىنا ۇلكەن راقمەت. ءبىز ءوز تاراپىمىزدان وسى ۇيدە تەك قۋانىشتى ساتتەر بولۋىنا تىرىسامىز»، - دەدى ساۋلە قاپاروۆا.
اكىمدىكتەن اتاپ وتكەندەي، مەملەكەت باسشىسىنىڭ تاپسىرماسى اياسىندا اقمولا وبلىسىندا زارداپ شەككەندەرگە بارلىق قاجەتتى قولداۋ كورسەتۋ جانە ازاماتتاردىڭ مۇلكىن قالپىنا كەلتىرۋ بويىنشا جۇمىستار جۇرگىزىلىپ جاتىر.
وڭىردە شىعىنداردى وتەۋ جانە جويۋ جونىندەگى جۇمىس تۇرعىن ءۇي قاتىناستارى تۋرالى قولدانىستاعى زاڭناما شەڭبەرىندە جالعاسا بەرمەك. بۇگىنگى كۇنگە دەيىن وبلىس ورتالىعىندا 174 وتباسى 65 ميلليون تەڭگەدەن استام سوماعا ءبىرجولعى تولەم الدى. سونداي-اق، ماتەريالدىق شىعىنداردى باعالاۋ جانە وتەۋ جونىندەگى كوميسسيا 12 وتباسىنا 8 ميلليون تەڭگەدەن استام كولەمدە ماتەريالدىق زالالدى وتەۋ تۋرالى شەشىم شىعاردى.
بۇعان قوسا، تۇرعىن ۇيلەردىڭ ودان ءارى تۇرۋعا جارامدىلىعىن انىقتاۋ بويىنشا تەحنيكالىق تەكسەرىس قولعا الىنعان.
ايتا كەتسەك، بۇدان بۇرىن كوكشەتاۋدا سۋ تاسقىنىنان مۇلكىنە زيان كەلگەن 65 ادامنان ءوتىنىش تۇسكەنىن جازعان ەدىك.
