كوكشەتاۋدا ۇلتتىق دومبىرا كۇنىنە وراي 2500 دومبىراشى ءبىر مەزەتتە كۇي تارتتى
كوكشەتاۋ. KAZINFORM - كوكشەتاۋدا ۇلتتىق دومبىرا كۇنىنە وراي «كيەلى دومبىرا» وبلىستىق فلەشموب ءوتىپ، وندا 2500 جۋىق دومبىراشى ءبىر مەزەتتە قۇرمانعازىنىڭ «بالبىراۋىن»، «سارىارقا»، «اداي» جانە ابىلاي حاننىڭ «شاڭدى جورىق» كۇيلەرىن ورىندادى.
«وقجەتپەس» ستاديونىندا ۇيىمداستىرىلعان اۋقىمدى شاراعا ۇكىلى ىبىراي اتىنداعى اقمولا وبلىستىق فيلارمونياسى، «كوكشەتاۋ» مادەنيەت سارايى، م. جۇمابايەۆ اتىنداعى اقمولا وبلىستىق عىلىمي امبەباپ كىتاپحاناسى، وبلىستىق حالىق شىعارماشىلىق جانە مادەني دەمالىس ورتالىعى، اقمولا وبلىستىق تاريحي-ولكەتانۋ، كوكشەتاۋ قالاسى تاريحى، مالىك عابدۋللين، ادەبيەت جانە ونەر مۋزەيلەرى، تاريحي مۇرانى قورعاۋ جانە پايدالانۋ ورتالىعىنىڭ قىزمەتكەرلەرى، كوكشەتاۋ قالاسى «دوستار» مادەنيەت سارايىنىڭ شىعارماشىلىق ۇجىمدارى، سونىمەن قاتار، ءبىرجان سال، اقكول، ارشالى، اتباسار، بۋراباي، جاقسى، ەرەيمەنتاۋ، ەسىل، جارقايىڭ، زەرەندى، شورتاندى، تسەلينوگراد اۋداندارى مەن كوكشەتاۋ قالاسىنىڭ ءبىلىم جانە مادەنيەت وشاقتارى، مەملەكەتتىك شىعارماشىلىق تاپسىرىس قاتىسۋشىسى - «شابىت» ءبىلىم جانە شىعارماشىلىق ورتالىعى تاربيەلەنۋشىلەرى، اقمولا وبلىستىق سوتى، مەملەكەتتىك ورگاندار، اقمولا وبلىسى دەنساۋلىق ساقتاۋ باسقارماسىنىڭ قىزمەتكەرلەرى مەن قالا تۇرعىندارى قاتىستى.
بارلىعى 2500 گە جۋىق دومبىراشى ءبىر مەزەتتە قۇرمانعازىنىڭ «بالبىراۋىن» «سارىارقا»، «اداي» جانە ابىلاي حاننىڭ «شاڭدى جورىق» كۇيلەرىن ورىنداپ، كوپشىلىكتى ءتانتى ەتتى.
شارادا اقمولا وبلىسى مادەنيەت باسقارماسىنىڭ باسشىسى ايگۇل ءسابيتوۆا ايماق باسشىسى مارات احمەتجانوۆتىڭ اتىنان جينالعانداردى قۇتتىقتاپ، ۇلتتىق ونەردى ناسيحاتتاپ جۇرگەن اقمولالىقتارعا العىس ءبىلدىردى.
«دومبىرا دەگەنىمىز - جاي عانا اسپاپ ەمەس، ول بابالارىمىزدان قالعان اسىل مۇرا، ءار قازاقتىڭ رۋحى مەن جانى. ءان مەن كۇيدىڭ بەسىگى سانالاتىن ارقا ءتورى اقمولا ءوڭىرى ءۇشىن بۇل مەرەكەنىڭ ورنى ەرەكشە. قازاق تاريحىنىڭ ونەر الەمىندە تانىمال قۇرمانعازى، داۋلەتكەرەي، تاتتىمبەت، ماحامبەت، دينا، سۇگىر، قازانعاپ سىندى كۇي قىراندارىنىڭ جولىن ۇستانعان ۇرپاقتار، كۇي ونەرىنىڭ دارابوزدارى، كۇيشى-دومبىراشىلار كۇنى بۇگىن دە عاسىردان عاسىرعا ۇلاسقان بابالار ءداستۇرىن جالعاستىرۋدا»، - دەدى باسقارما باسشىسى ءوز سوزىندە.
اقمولا وبلىسى مادەنيەت باسقارماسىنىڭ مالىمەتىنشە، بۇگىنگى تاڭدا اقمولا وبلىسىندا 24 فولكلورلىق ءانسامبلى بار (قاتىسۋشىلار سانى - 345)، 30 دان استام ءداستۇرلى ءانشى، 10 قازاق ۇلتتىق اسپاپتار وركەسترى (قاتىسۋشىلار سانى - 275)، 12 دومبىرا ۇيىرمەسى بار (قاتىسۋشىلار سانى - 212)، مەملەكەتتىك شىعارماشىلىق تاپسىرىس بويىنشا 6 تەگىن ۇيىرمە (قاتىسۋشىلار سانى - 700) جۇمىس ىستەيدى.
ايتا كەتسەك، بۇدان بۇرىن كوكشەتاۋدا ۆوكالدى-اسپاپتىق انسامبلدەر مەن كاۆەر توپتار اراسىندا اقمولا وبلىسىنىڭ 85 جىلدىعىنا ارنالعان «سالەم، كوكشەتاۋ!» وبلىستىق بايقاۋ-فەستيۆالى وتكەنىن جازعان ەدىك.
