كوكشەتاۋدا جۋرناليستەر اللەياسى پايدا بولدى

كوكشەتاۋ. KAZINFORM - كوكشەتاۋدا جۋرناليستەر اللەياسى پايدا بولدى. ونداعى 37 ءتۇپ اعاش ەلىمىزدەگى ب ا ق اتاۋىمەن جانە جۋرناليستيكا ارداگەرلەرىنىڭ ەسىمدەرىمەن اتالادى.

اللەيا كوكشەتاۋ قالاسىنىڭ ورتالىعىنداعى الاڭقايدا ورنالاسقان. ونىڭ اشىلۋىنا اقمولا وبلىسى ىشكى ساياسات باسقارماسىنىڭ قىزمەتكەرلەرى، سونداي-اق رەسپۋبليكالىق جانە جەرگىلىكتى ب ا ق وكىلدەرى قاتىستى. اللەيادا Kazinform حالىقارالىق اقپارات اگەنتتىگىنىڭ اعاشى دا وتىرعىزىلدى.

«بۇكىل ەلىمىز بويىنشا، ونىڭ ىشىندە ءبىزدىڭ وبلىسىمىزدا ەكولوگيالىق اكسياسى ءوتىپ جاتىر. وسى شارا اياسىندا ىشكى ساياسات باسقارماسىنىڭ باستاماسىمەن جۋرناليستەردىڭ اتاۋلى اللەياسى اشىلدى. بۇگىن وتىز جەتى ءتۇپ اعاش وتىرعىزدىق. اكسيا جالعاسىن تاۋىپ، جاسىل جەلەكتە جاڭا ەسىمدەر مەن اتاۋلار پايدا بولادى، - دەدى اقمولا وبلىسى ىشكى ساياسات باسقارماسى باسشىسىنىڭ ورىنباسارى گۇلميرا كارىموۆا.

ايتا كەتسەك، وڭىردە 25-ساۋىردەن باستاپ ەلدى مەكەندەردى اباتتاندىرۋ جانە سانيتارلىق تازارتۋ بويىنشا كوكتەمگى ايلىق ءوتىپ جاتىر. وعان بارلىعى 62579 ادام جانە 677 تەحنيكا جۇمىلدىرىلعان. ايلىق بارىسىندا 16186 اعاش پەن بۇتا وتىرعىزىلدى، ەلدى مەكەندەردەن 71,5 مىڭ تەكشە مەتر كۇل-قوقىس شىعارىلدى. كوپقاباتتى 673 تۇرعىن ءۇيدىڭ اۋلاسى تازارتىلىپ، 131 ساياباق پەن سكۆەرلەر رەتكە كەلتىرىلدى جانە 128 ستيحيالىق قوقىس پوليگونى جويىلدى.

ايتا كەتسەك، بۇدان بۇرىن كوكشەتاۋدا 9 مىڭعا جۋىق اعاش وتىرعىزىلعانىن جازعان ەدىك.