كوكشەتاۋدا «ازات رۋحتىڭ ابىلاي حانى» اتتى رەسپۋبليكالىق اقىندار ايتىسى ءوتتى
كوكشەتاۋدا رەسپۋبليكا كۇنىنە جانە ۇلى مەملەكەت قايراتكەرى، قولباسشى، ديپلومات ابىلاي حاننىڭ 310 جىلدىعىنا ارنالعان «ازات رۋحتىڭ ابىلاي حانى» رەسپۋبليكالىق اقىندار ايتىسى ءوتتى، دەپ حابارلايدى Kazinform.
ۇلتتىق ونەردى ناسيحاتتاپ، ونىڭ دامۋىنا مەملەكەتتىك دەڭگەيدە قولداۋ كورسەتۋ، سونداي-اق، تالانتتى، دارىندى جاس اقىنداردىڭ شەبەرلىگىن شىڭداۋعا، كوپشىلىككە تانىلۋىنا مۇمكىندىك جاساۋعا باعىتتالعان ايتىسقا استانا قالاسى جانە قوستاناي، الماتى، سولتۇستىك قازاقستان، قىزىلوردا، تۇركىستان، اقمولا وبلىستارىنان سۋىرىپ سالما 12 ايتىسكەر اقىن قاتىسىپ، باق سىنادى.
ايتىستى اقمولا وبلىستىق تاريحي-ولكەتانۋ مۋزەيىنىڭ ديرەكتورى، جازۋشىلار وداعىنىڭ مۇشەسى، ايتىسكەر اقىن، ق ر مادەنيەت سالاسىنىڭ ۇزدىگى قۇدايبەرلى مىرزابەك جۇرگىزىپ وتىردى.
- بۇگىنگى جىر دودامىز رەسپۋبليكا كۇنىنە جانە ابىلاي حاننىڭ 310 جىلدىعىنا ارنالىپ وتىر. مۇنداعى باستى مىندەت - تاۋەلسىزدىكتىڭ ماڭىزىن، ساياسي تۇراقتىلىقتى ۇتقىر ويمەن جەتكىزە ءبىلۋ، سۋىرىپ سالىپ، تابان استىندا تاۋىپ ايتىپ، ءسوز ونەرىنىڭ ءىنجۋ-مارجانىن توگىلدىرۋ، دارىندى اقىنداردى قولداۋ، - دەيدى ايتىسىڭ ۇيىمداستىرۋشىسى اقمولا وبلىستىق حالىق شىعارماشىلىق جانە مادەني دەمالىس ورتالىعىنىڭ ديرەكتورى اسحات ماگاۆين.
اقىندارىنىڭ شەبەرلىگىنە جازۋشىلار وداعى استانا فيليالىنىڭ ديرەكتورى، اقىن، حالىقارالىق، رەسپۋبليكالىق ايتىستاردىڭ جەڭىمپازى داۋلەتكەرەي كاپ ۇلى (قازىلار القاسىنىڭ ءتوراعاسى)، ايتىسكەر، جازۋشى، تانىمال اقىن ارمان بەردالين، اقىن، جۋرناليست، جازۋشىلار وداعىنىڭ مۇشەسى الماس تەمىرباي قازىلىق ەتتى.
سايىس قورىتىندىسى بويىنشا باس جۇلدەگە اقمولالىق ەرلان داۋلەت لايىق دەپ تانىلىپ، 1 ميلليون تەڭگەنىڭ اقشالاي سەرتيفيكاتىنا يە بولدى.
ال جۇلدەلى ءبىرىنشى ورىن جانە 800 مىڭ تەڭگەنىڭ اقشالاي سەرتيفيكاتىنا قىزىلوردا وبلىسىنان كەلگەن اقىن مۇحتار نيازوۆ، ەكىنشى ورىن جانە 500 مىڭ تەڭگەنىڭ اقشالاي سەرتيفيكاتىنا استانالىق يرانعايىپ كۇزەمبايەۆ، ءۇشىنشى ورىن جانە 300 مىڭ تەڭگەنىڭ اقشالاي سەرتيفيكاتىنا تاعى ءبىر اقمولالىق قۇرمەت قۇرالحان لايىق دەپ تانىلدى.
سونىمەن بىرگە بايقاۋعا قاتىسقان وزگە دە اقىندار ارنايى ديپلوم جانە 100 مىڭ تەڭگەنىڭ اقشالاي سەرتيفيكاتىن الدى.
