كوكشەتاۋ دەگەن جازۋدىڭ ءتۇسىپ قالعان ءۇش ءارپىن ورناتۋعا اكىمدىك 18 ميلليون تەڭگە جۇمساماق بولعان
كوكشەتاۋ. KAZINFORM - انتيكور اقمولا بيۋجەت قاراجاتىنىڭ نەگىزسىز جۇمسالۋىنىڭ الدىن الدى.
اقمولا وبلىسى بويىنشا سىبايلاس جەمقورلىققا قارسى قىزمەت دەپارتامەنتى بۇقپا تاۋىنداعى «كوكشەتاۋ» دەگەن جازۋدى قالپىنا كەلتىرۋ جۇمىسىن مەملەكەتتىك ساتىپ الۋعا مونيتورينگ جۇرگىزگەن.
وتكەن جىلدىڭ شىلدە ايىندا قولايسىز اۋا رايىنا بايلانىستى «تاۋ» ارىپتەرىنىڭ مەتال كونسترۋكسياسى بۇلىنگەن بولاتىن.
قالانىڭ ت ك ش ءبولىمى جەل قيراتقان ارىپتەردى قالپىنا كەلتىرۋ جانە قالعان «كوكشە» جازۋىن نىعايتۋ ءۇشىن باستاپقىدا 18 ميلليون تەڭگەگە جۋىق قاراجات جۇمساماق بولعان.
بىرنەشە كوممەرتسيالىق ۇسىنىستى زەردەلەگەننەن كەيىن مەملەكەتتىك ورگان مەردىگەرمەن ءبىر كوزدەن الۋ تاسىلىمەن شارت جاساسۋعا شەشىم قابىلدادى.
تاراپتار جۇمىستى ورىنداۋ قۇنىن 17,6 ميلليون تەڭگەگە باعالاعان.
بۇل جاعداي قوعامدىق رەزونانس تۋدىردى. سونىمەن بىرگە، كەلىسىمشارت جاساسۋدىڭ زاڭدىلىعى جانە ۇسىنىلاتىن قىزمەتتىڭ باعاسىنا قاتىستى ءبىراز سۇراقتار تۋىندادى.
«مونيتورينگ شەڭبەرىندە وڭىرلىك انتيكور وكىلدەرى وبەكتىگە بارىپ، قۇرىلىمدى ورناتۋ جانە جوندەۋ بارىسىن قاداعالادى. سونداي-اق، بارلىق مۇددەلى تاراپتاردىڭ قاتىسۋىمەن كەزدەسۋ وتكىزىلىپ، وندا دەپارتامەنت قالپىنا كەلتىرۋ جۇمىستارىنىڭ باعاسىن تومەندەتۋ جانە جازۋدى جوندەۋ ساپاسىن قامتاماسىز ەتۋ قاجەتتىگىن اتاپ ءوتتى. ناتيجەسىندە قالا اكىمدىگى شارتتىڭ قۇنىن 4 ميلليون تەڭگەگە تومەندەتتى. بۇل اقشالاي قاراجاتتى ءماسليحات سەسسياسى وتكىزىلگەننەن كەيىن قالا تۇرعىندارىنىڭ الەۋمەتتىك قاجەتتىلىگىنە ءبولۋ جوسپارلانعان»، - دەدى ۆەدومستۆودان.
سونىمەن قاتار، سىبايلاس جەمقورلىققا قارسى ۆولونتەرلەر تاپسىرىس بەرۋشى مەن مەردىگەردىڭ مەملەكەتتىك ساتىپ الۋ تۋرالى زاڭنامانى ساقتاۋىنا تەكسەرىس جۇرگىزىپ جاتقان ۋاكىلەتتى ورگانعا جۇگىندى.
ايتا كەتسەك، بۇدان بۇرىن رودينا اۋىلىندا 2 ميلليارد تەڭگەنىڭ جوباسىن قولعا العان مەردىگەرگە ايىپپۇل سالىنعانىن جازعان ەدىك.
