كوفە قارت ادامداردىڭ بەلسەندىلىگىنە قالاي اسەر ەتەدى - زەرتتەۋ
استانا. قازاقپارات - زەرتتەۋ ناتيجەلەرى كورسەتكەندەي، كوفە ءىشۋ دەنە قالپىن باقىلاۋعا جانە فۋنكتسيونالدىق جۇمىس قابىلەتىنە از عانا اسەر ەتەدى.
Experimental Gerontology جۋرنالىندا جاريالانعان جاڭا زەرتتەۋدە كوفە تۇتىنۋدىڭ ەگدە جاستاعى ادامداردىڭ فيزيكالىق بەلسەندىلىگىنە اسەرى تالدانعان.
زەرتتەۋ ناتيجەلەرى كورسەتكەندەي، قويۋ كوفە ءىشۋ دەنە قالپىن باقىلاۋعا جانە فۋنكتسيونالدىق جۇمىس قابىلەتىنە از عانا اسەر ەتەدى. كوفەين تەپە-تەڭدىك پەن دەنە قالپىن ۇستاۋ ستراتەگياسىنا ءسال ىقپال ەتكەنىمەن، جالپى تۇراقتىلىق پەن قوزعالۋ قابىلەتىنە ايتارلىقتاي وزگەرىس اكەلمەگەن. ياعني، قارت ادامدار كوفەدەن باس تارتپاي-اق، وزدەرىنىڭ فيزيكالىق بەلسەندىلىگى مەن تەڭگەرىمىن ساقتاي الادى.
جاس ۇلعايعان سايىن ادامداردىڭ بۇلشىقەت كۇشى، ۇيلەسىمدىلىگى جانە تەپە-تەڭدىگى تابيعي تۇردە تومەندەيدى، بۇل قۇلاۋ قاۋپىن ارتتىرادى. قۇلاۋ ەگدە جاستاعى ادامدار ءۇشىن اۋىر جاراقاتتارعا، اۋرۋحاناعا جاتقىزۋعا جانە تاۋەلسىزدىكتىڭ تومەندەۋىنە اكەلۋى مۇمكىن. كوفەيننىڭ جۇيكە جۇيەسىن ىنتالاندىرۋ ارقىلى فيزيكالىق بەلسەندىلىكتى ارتتىراتىنى بەلگىلى، ءبىراق الدىڭعى زەرتتەۋلەر ونىڭ كوپ مولشەردە تۇتىنىلۋى تەپە-تەڭدىكتىڭ ناشارلاۋىنا جانە قۇلاۋ قاۋپىنىڭ جوعارىلاۋىنا اكەلۋى مۇمكىن ەكەنىن كورسەتتى.
كوپتەگەن زەرتتەۋلەردە كوفەين تابلەتكا تۇرىندە قولدانىلعان، ءبىراق ول كوفەنىڭ قۇرامىنداعى باسقا زاتتارمەن، مىسالى، پوليفەنولدار، ليپيدتەر جانە مينەرالدارمەن ءوزارا ارەكەتتەسۋدى ەسكەرمەيدى. سوندىقتان عالىمدار كوفە ءىشۋدىڭ تازا كوفەيننەن ايىرماشىلىعى بار ما جانە ونىڭ ەگدە جاستاعى ادامداردىڭ فيزيكالىق جاعدايىنا قانداي دا ءبىر اسەرى بار ما ەكەنىن انىقتاۋعا تىرىستى.
