كوشپەندىلەر ويىنى كەزىندە ەلوردادا 5 ەتنواۋىل اشىلادى
استانا. KAZINFORM - استانا قالاسىندا وتەتىن دۇنيەجۇزىلىك كوشپەندىلەر ويىندارى اياسىندا ەلوردادا 5 ەتنواۋىل اشىلادى.
2024 -جىلدىڭ 6-14-قىركۇيەك ارالىعىندا «قازاق ەلى» مونۋمەنتى، «اتاتۇرىك» ساياباعى، «بايتەرەك» مونۋمەنتى جانە ورتالىق ساياباق اۋماعىندا ەتنواۋىل جۇمىسىن باستايدى، دەپ حابارلايدى ەلوردا اكىمدىگىنەن.
ەتنواۋىل اۋماعىندا كونسەرتتىك باعدارلامالار جانە سپورتتىق ءىس-شارالار ۇيىمداستىرىلادى.
كونسەرتتىك باعدارلامادا مادەنيەت باسقارماسىنىڭ ۆەدومستۆولىق باعىنىستى مەكەمەلەرىنىڭ شىعارماشىلىق ۇجىمدارى مەن سوليستەرى، سونداي-اق بەلگىلى ونەر قايراتكەرلەرى مەن وتاندىق ەسترادا جۇلدىزدارى قاتىسادى.
كونسەرتتىك باعدارلاما ەتنواۋىلداردا ساعات 18:00 دەن 20:00 گە دەيىن ۇيىمداستىرىلادى.
ەسىل اۋدانىنىڭ اۋماعىندا ەتنواۋىل «بايتەرەك» مونۋمەنتىنىڭ الاڭىندا ۇيىمداستىرىلادى
الماتى اۋدانىنىڭ اۋماعىندا ەتنواۋىل «قازاق ەلى» مونۋمەنتىنىڭ جانىندا ورنالاسقان.
بايقوڭىر اۋدانىنىڭ اۋماعىندا ەتنواۋىل «اتاتۇرىك» ساياباعىندا ۇيىمداستىرىلادى.
نۇرا اۋدانىنىڭ اۋماعىندا ەتنواۋىل ورتالىق ساياباقتا ورنالاساتىن بولادى.
ال 7-قىركۇيەك كۇنى ساعات 11:00 دە «قازانات» يپپودرومىنىڭ جانىندا 10 گەكتار جەردە باستى «كوشپەندىلەر الەمى» ەتنواۋىلى اشىلادى.
ەتنواۋىل بىرنەشە ورىنعا بولىنەدى: ورتالىق الاڭ، ۇلتتىق ويىندارعا ارنالعان بالالار ويىن الاڭى، حالىق مۋزىكاسىنا ارنالعان شاتىر، اشىق اسپان استىنداعى كوشپەلى وركەنيەتتەر مۇراجايى، سپورتتىق ءىس- شارالار، ۇلتتىق تاعامدار، باستى ساحنا، ايماقتاردىڭ ەتنوقونىستارى، قولونەرشىلەر جانە شىعىس بازارى بار ارنايى قالا.
سونداي-اق ەتنواۋىل اۋماعىندا كوپتەگەن كادەسىيلار تابۋعا بولاتىن شىعىس بازارى ۇيىمداستىرىلادى. ەلىمىزدىڭ ەكى جۇزدەن استام قولونەرشىلەرى ءوز ونىمدەرىن ۇسىنادى.
ەتنواۋىلدا تۋريستەر مەن قوناقتار ءداستۇرلى جانە ۇلتتىق تاعامداردان ءدام تاتۋ ءۇشىن قازاق ۇلتتىق تاعامدارىنىڭ مەيرامحانالارى ۇسىنىلادى.
«بالالار الاڭى» ويىن الاڭى قاراستىرىلعان، وندا ولار كوڭىلدى جانە تانىمدىق باعىتتا ۋاقىت وتكىزە الادى.
ايتا كەتەيىك، 5- دۇنيەجۇزىلىك كوشپەندىلەر ويىندارى استانادا 8-13-قىركۇيەك ارالىعىندا وتەدى، وعان الەمنىڭ 89 ەلىنەن 2500 دەن استام قاتىسۋشى قاتىسادى.
ەلوردا تۇرعىندارى مەن قوناقتارىن دۇنيەجۇزىلىك كوشپەندىلەر ويىندارىن وتكىزۋ ورىندارىنا قوعامدىق كولىكپەن قامتاماسىز ەتۋ ماقساتىندا 15-قىركۇيەكتى قوسا العاندا № 18، 37، 303، 323 مارشرۋتتاردىڭ قوزعالىس سىزباسى ۋاقىتشا وزگەردى.
ەلوردا تۇرعىندارى مەن قوناقتارى قوزعالىس باعىتىن الدىن الا جوسپارلاپ العانى ءجون.
