كوشپەندىلەر ويىندارىنا لايىقتى دەلەگاتسيا جىبەرۋگە تىرىسامىز - يران ەلشىسى

استانا. KAZINFORM - يران يسلام رەسپۋبليكاسىنىڭ قازاقستانداعى توتەنشە جانە وكىلەتتى ەلشىسى الي اكبار دجوۋكار بيىل استانادا وتەتىن كوشپەندىلەر ويىندارىنا يران تارابى تىڭعىلىقتى دايىندىقپەن كەلەتىنىن ايتتى.

«مادەنيەت پەن عىلىمدا، الەۋمەتتىك سالادا قارىم-قاتىناستى دامىتۋدا تۋريزم سالاسىنىڭ ەرەكشە ورىن الاتىنى ءسوزسىز. باقىتىمىزعا وراي، يران مەن قازاقستاننىڭ سپورت سالاسىنداعى ءوزارا بايلانىسى حالىقتارىمىزدىڭ اراسىنداعى ىقپالداستىقتىڭ نەگىزگى باعىتى بولىپ وتىر. ەكى ەلدىڭ سپورت كوماندالارى، دەلەگاتسيالارى ەكى ارادا ءجيى قاتىناپ تۇرادى»، - دەدى ەلشى.

ديپلومات استانادا وتەتىن كوشپەندىلەر ويىندارى سپورتتىق جارىستارمەن شەكتەلمەي، مادەني بايلانىستاردى نىعايتا الاتىن اۋقىمدى شارا ەكەنىن ايتادى.

«ءبىز يراننان بۇل ويىندارعا لايىقتى دەلەگاتسيا جىبەرۋگە تىرىسامىز. ارينە، بۇل اۋقىمدى شاراعا قاتىساتىن وزگە ەلدەردە دە، قازاقستاندا دا يران مادەنيەتىمەن، دەلەگاتسياسىمەن تانىسۋدىڭ جاقسى مۇمكىندىگى بولادى. ويتكەنى ءقازىر ەكى ەلدىڭ اراسىندا مادەني، تاريحي قۇندىلىقتار تۋرالى اقپارات تاپشىلىعى بايقالادى. ارامىزدى تۋريزم باعىتىنداعى بايلانىستار نىعايعان سايىن مادەني، الەۋمەتتىك-قوعامدىق قارىم-قاتىناس دامي تۇسەدى»، - دەدى الي اكبار دجوۋكار.