كوشپەندىلەر ويىندارى: قۇسبەگىلەر باسەكەسى باستالدى

استانا. KAZINFORM - ءدال قازىر سپورتشىلار بۇركىتتى قولعا شاقىرۋ باعىتى بويىنشا سىنعا ءتۇسىپ جاتىر. ايتا كەتەيىك، قۇسبەگىلىك الدىڭعى ءتورت ويىننىڭ باعدارلاماسىنا ەنبەگەن ەدى. ياعني، اتالعان سپورت ءتۇرى بويىنشا استانا تورىندە دودا تاريحىنداعى العاشقى جۇلدەگەرلەر انىقتالادى.

بايراقتى باسەكەدە قازاقستاننىڭ نامىسىن قۇسبەگىلىكتەن 9 سپورتشى قورعايدى. ولار، بۇركىت قۇسى بويىنشا - سەرىكبەك كۋنتۋعان، ەرزات بايقاداموۆ، ارمان كۋشكاروۆ، قارشىعا قۇسى بويىنشا - داۋرەن ارشاباي، باعدات كەۋەنوۆ، قۇدايبەرگەن راۋيل ۇلى جانە يتەلگى قۇسى بويىنشا - ەرلان كەنجەتايەۆ، باقداۋلەت باباجان، يبراگيم بازاربايەۆ.

جوعارىدا اتى اتالعان 9 ازامات - ەل ىشىندەگى چەمپيوناتتارىمىزدا جۇزدەن جۇيرىك شىققان ۇزدىكتەر. جىل باسىنان بەرى ۇلتتىق قۇراما ساپىنداعى قۇسبەگىلەر ءۇشىن الماتى قالاسى مەن اقمولا وبلىسىندا ەكى وقۋ-جاتتىعۋ جيىنى وتكەن بولاتىن. ءۇشىنشى وقۋ-جاتتىعۋ جيىنى استانا قالاسىندا ۇيىمداستىرىلدى.

«ۇلى دالا ءدۇبىرى» ۇرانىمەن ءوتىپ جاتقان كوشپەندىلەر ويىندارىنا قۇسبەگىلىك سپورت ءتۇرى بويىنشا 10 مەملەكەتتەن 42 سپورتشى قاتىسىپ جاتقانىن اتاپ وتكەن ءجون.

ەسكە سالا كەتەيىك، بۇعان دەيىن قازاق بالۋاندارى V دۇنيەجۇزىلىك كوشپەندىلەر ويىندارىن قورىتىندىلاعانىن جازعان ەدىك.

اۆتور
ورالحان قوجانوۆ