«كوشپەندىلەر دالاسى»: الماتىداعى حالىقارالىق كورمەدە تازىلار تانىستىرىلدى
الماتى. KAZINFORM - الماتىدا قازاق تازىسىنىڭ جانە وزگە دە يت تۇقىمدارىنىڭ قاتىسۋىمەن «كوشپەندىلەر دالاسى» اتتى كورمە ءوتىپ جاتىر. ءىس-شارانى «اۆرورا» كينولوگيالىق كلۋبى ۇيىمداستىرىپ وتىر.
حالىقارالىق كورمەگە قازاقستان، وزبەكستان، قىرعىزستان جانە رەسەيدەن بارلىعى 500 دەن استام ءيت اكەلىنگەن.
سونداي-اق، كورمە كەزىندە 50 دەن استام ءيت، ونىڭ ىشىندە قازاق تازىلارى اسىل تۇقىمدى يتتەردىڭ رەسمي ستاندارتىنا سايكەس باعالانىپ، ۇلتتىق جانە حالىقارالىق چەمپيوندىق اتاقتى ساراپقا سالادى. وعان نيدەرلاند، سلوۆاكيا، گرەكيا جانە قىتايدان كەلگەن حالىقارالىق ساراپشىلار تورەلىك ەتەدى.
- 28-29-قىركۇيەك كۇندەرى الماتىدا ءۇش ءىس-شارا ءوتىپ جاتىر. ولار: ۇلتتىق كورمە، حالىقارالىق كورمە جانە مونوتۇقىمدى تازىعا ارنالعان ارنايى كورمە. مونوتۇقىمدى كورمەگە 30 دان استام تازى قاتىسىپ وتىر. بۇل تاريحي وقيعا. سەبەبى تازىنى الەمدىك دەڭگەيدە مويىنداعانعا دەيىن ءبىزدىڭ يتتەرىمىز مويىندالماعان توپتىڭ ىشىندە ونەر كورسەتەتىن. بۇگىن وزىنە ۇقساس مويىندالعا يتتەردىڭ اراسىندا سايىسقا تۇسەدى، - دەدى قازاقستان كينولوگتار وداعىنىڭ پرەزيدەنتى باۋىرجان سەرىكقالي.
ق ر پرەزيدەنتى ءىس باسقارماسىنىڭ وكىلى قايسار جۇماباي ۇلى الداعى 10 جىلدا تازىلاردىڭ سانىن كوبەيتۋ جانە حالىقارالىق ارەنادا تانىتۋ بويىنشا جۇمىستار جۇرگىزىلەتىنىن اتاپ ءوتتى.
- پرەزيدەنتىمىزدىڭ تاپسىرماسىمەن سوڭعى 2 جىلدا ايتارلىقتاي جۇمىس اتقارىلدى. حالىقارالىق كينولوگيالىق فەدەراتسيا قازاق تازىسىن رەسمي تۇردە يت تۇقىمى دەپ الدىن الا تانۋ تۋرالى شەشىم قابىلدادى ەندى الداعى 10 جىلدا ءبىراز ەڭبەك ەتۋ كەرەك. حالىقارالىق كينولوگيالىق فەدەراتسيانىڭ تالابىنا سايكەس اسىل تۇقىمدى تازىلاردىڭ سانىن كوبەيتۋ، حالىقارالىق ءىس-شارالارعا ءجيى قاتىسىپ، ولاردى ەلىمىزدە وتكىزۋ قاجەت. سوندا تولىقتاي مويىندالىپ، الەمگە دارەجەگە كوتەرىلەمىز دەپ سەنەمىن، - دەدى قايسار جۇماباي ۇلى.
حالىقارالىق كورمەگە كوپ جىلدان بەرى تازى اسىراۋمەن اينالىساتىن وتباسىلار دا قاتىستى. ولاردىڭ ءبىرى - ەرنار مۇتەكەيەۆتىڭ وتباسى. يتبەگىنىڭ ايتۋىنشا، جەتى قازىنانىڭ بىرىنە جاتاتىن جانۋاردى وسىرۋمەن اينالىسقانىنا 15 جىلدان اسقان. ول وسى جىلداردىڭ ىشىندە قازاقى تازىنىڭ ادالدىعى مەن اقىلدىلىعىنا ءتانتى بولعان.
- وسى الماتىدا تۇرامىز. قازىرگى ۋاقىتتا ەرەسەك 12 تازى جانە 5 كۇشىگىمىز بار. تازىنىڭ مىنەزى جاقسى، ادامعا جاقىن، يەسىنە ادال بولادى. اڭشىلىققا جارالعان ءيت، وتە جىلدام كەلەدى. جەتىسىنە ءبىر رەت تازىلارىمىزبەن اڭعا شىعىپ تۇرامىز، - دەدى ەرنار مۇتەكەيەۆ.
كورمەنىڭ تاعى ءبىر قاتىسۋشىسى مەرۋەرت ەسەنوۆا اقساۋىت ەسىمدى تازىنى باپتاپ جۇرگەنىنە 2 جىل بولعانىن ايتتى. ونىڭ سوزىنشە، ءيتتىڭ بۇل تۇقىمىن ءجيى جۇگىرتىپ تۇرۋ قاجەت.
- 3 ايلىق كەزدەن ءوزىم باعىپ كەلەمىن. اتى - اقساۋىت، جاسى 2 دە. تازى باسقا تۇقىمدارعا قاراعاندا وتە سابىرلى، ادامدى مۇلدەم قاپپايدى جانە تازا كەلەدى. ءوزى وتىرعان جەرگە دارەت سىندىرمايدى. ەندى تازى اسىراۋدىڭ ءبىر ەرەكشەلىگى - تازىنى جىلقى سەكىلدى كۇندە جۇگىرتىپ تۇرۋ كەرەك. 3-4 كۇن ۇيدە وتىرىپ قالسا، كۇشى جينالىپ قالادى. ويتكەنى ولاردا ەنەرگيا تولىپ تۇرادى، - دەدى ول.
ەسكە سالايىق، حالىقارالىق كينولوگيالىق فەدەراتسيانىڭ باس كوميتەتى قازاق تازىسىن رەسمي تۇردە ءيت تۇقىمى دەپ ادەپكى (الدىن الا) تانۋ تۋرالى شەشىم قابىلدادى.
