كوشپەندىلەر پاريجدە: ويىننىڭ امباسسادورى كولىكپەن فرانسياعا جەتتى
پاريج. KAZINFORM - وليمپيادا ويىندارى قارساڭىندا فرانسيا استاناسى پاريجگە قازاقستاننان كولىگى 5-دۇنيەجۇزىلىك كوشپەندىلەر ويىندارى ستيلىندە بەزەندىرىلگەن سپورت جانكۇيەرى جەتتى. ونى قازاقستاندىق قوعام قايراتكەرى، ساياحاتشى، استانادا وتەتىن 5-شى دۇنيەجۇزىلىك كوشپەندىلەر ويىندارىنىڭ برەند-امباسسارى ەرىك شىنىبەكوۆ تىزگىندەپ كەلدى.
كوشپەندى ەرىك شىنىبەكوۆ وليمپيادا ويىندارىندا قازاقستاندىق سپورتشىلاردى قولداۋ ماقساتىندا پاريجگە اتىراۋ قالاسىنان شىعىپ، رەسەي، گرۋزيا، تۇركيا، گرەكيا، يتاليا جانە گەرمانيا ەلدەرى ارقىلى ءجۇرىپ وتكەن.
وسى ميسسياسى اياسىندا 5- دۇنيەجۇزىلىك كوشپەندىلەر ويىنىن ناسيحاتتاپ، ويىن ۇلگىسىندە كولىگىن بەزەندىرۋ ارقىلى وتاندىق سپورتقا دەگەن ادالدىعىن، جاناشىرلىعىن بىلدىرمەك بولعان.
كولىكتىڭ ارتقى ەسىگىندە دالا فونىندا بۇركىت ۇشىرىپ تۇرعان بۇركىتشى بەينەلەنگەن.
دۇنيەجۇزىلىك كوشپەندىلەر ويىندارىنىڭ وتكىزىلەتىن كۇندەرى مەن (8-13-قىركۇيەك) ويىننىڭ رەسمي سايتى wng.kz كورسەتىلگەن. سونداي- اق، كولىكتىڭ ەكى جاعىنا سايىستىڭ رەسمي لوگوتيپىنىڭ سۋرەتى سالىنعان.
«مەنىڭ ويىمشا، ەرىكتىڭ ۇيىمداستىرعان اكتسياسى ونىڭ كوشپەندىلىك بولمىسىن بۇرىنعىدان دا اشا تۇسەدى. سونىمەن قاتار، 5- دۇنيەجۇزىلىك كوشپەندىلەر ويىندارىن ناسيحاتتاۋدى ۇيىمداستىرۋشىلار، مەملەكەتتىك مەكەمەلەر، سپورتتىق ۇيىمدار عانا ەمەس، قازاقستاننىڭ كەز كەلگەن ازاماتى، سپورت جانكۇيەرلەرىنىڭ دە بەلسەنە كىرىسكەنىن كورسەتەدى. ءبىز وسىنداي جاناشىرلارىمىزدىڭ ارقاسىندا الەمدەگى ەڭ ءىرى سپورت جانە مادەنيەت ورتالىقتارىنىڭ ءبىرى پاريجدە جاھاندىق كوشپەندىلەر مادەنيەتىن تانىستىرۋ مۇمكىندىگىنە يە بولعانىمىزعا قۋانىشتىمىز. بۇل ءبىزدىڭ مۇرامىزدى الەمگە جاريالاۋدىڭ جانە جانكۇيەرلەردى 5- دۇنيەجۇزىلىك كوشپەندىلەر ويىندارىنا شاقىرۋدىڭ تاماشا مۇمكىندىگى»، - دەدى ويىندار ديرەكتسياسىنىڭ ماركەتينگ جونىندەگى ديرەكتورى سەرىك بۋكسيكوۆ.
پاريج تۇرعىندارى مەن قوناقتارى كولىكتى سىرتىنان تاماشالاپ قانا قويماي، ويىندار تۋرالى كوبىرەك بىلۋگە جانە كوشپەلى حالىقتاردىڭ تاريحى مەن داستۇرىمەن تانىسۋعا مۇمكىندىك الدى.
ءوز كەزەگىندە، د ك و ۇيىمداستىرۋ كوميتەتى پاريجدەگى وليمپيادا ويىندارىندا قازاقستان قۇراماسىنا شىن جۇرەكتەن ساتتىلىك تىلەپ، قازاقستاندىق سپورتشىلاردىڭ ەل نامىسىن ابىرويمەن قورعايتىنىنا سەنىم بىلدىرەدى.
ايتا كەتەرلىگى، 8-13-قىركۇيەكتە استانا قالاسىندا 5- دۇنيەجۇزىلىك كوشپەندىلەر ويىندارى وتەدى.
ءىس- شاراعا 89 ەلدەن 2000 نان استام سپورتشى قاتىسادى دەپ جوسپارلانىپ وتىر.
اۆتور
جانات قاپالبايەۆا
