كوپبالالى وتباسىلارعا بەرىلەتىن جاردەماقى مولشەرى ارتتى

استانا. قازاقپارات - 1-قاڭتاردان باستاپ كوپبالالى وتباسىلارعا بەرىلەتىن جاردەماقى مولشەرى ءوستى.

ەلىمىزدىڭ زاڭناماسى بويىنشا 4 جانە ودان كوپ بالاسى بار وتباسىلارعا جاردەماقى ارنايى كەستەگە ساي بەلگىلەنەدى.

- 4 بالاسى بار وتباسىلارعا - 16,03 ا ە ك؛

- 5 بالاعا - 20,04 ا ە ك؛

- 6 بالاعا - 24,05 ا ە ك؛

- 7 بالاعا - 28,06 ا ە ك؛

- 8 جانە ودان دا كوپ بالاسى بار وتباسىلارعا - ءار بالاعا 4 ا ە ك مولشەرىندە جاردەماقى تولەنەدى.

1-قاڭتاردان باستاپ ايلىق ەسەپتىك كورسەتكىش (ا ە ك) 3692 تەڭگەدەن 3932 تەڭگەگە دەيىن كوبەيتىلدى. سايكەسىنشە 2025 -جىلعى تولەم بىلاي بەلگىلەندى:

- ءتورت بالاعا - 63030 تەڭگە (2024 -جىلى - 59183 تەڭگە)؛

- بەس بالاعا - 78798 تەڭگە (2024 -جىلى - 73988 تەڭگە)؛

- التى بالاعا - 94565 تەڭگە (2024 -جىلى - 88973 تەڭگە)؛

- جەتى بالاعا - 110332 تەڭگە (2024 -جىلى - 103598 تەڭگە)؛

- سەگىز جانە ودان كوپ بالاسى بار وتباسىلارعا - ءار بالاعا 15728 تەڭگەدەن (4 ا ە ك) قوسىلادى (2024 -جىلى - 14768 تەڭگەدەن).

«نەكە جانە وتباسى تۋرالى» كودەكسكە سايكەس، كوپبالالى وتباسى بولىپ كامەلەتكە تولماعان ءتورت جانە ودان دا كوپ بالاسى بار، ونىڭ ىشىندە كامەلەتتىك جاسقا تولعاننان كەيىن ءبىلىم بەرۋ ۇيىمدارىن بىتىرەتىن ۋاقىتقا دەيىن (ءبىراق 23 جاستان اسپاعان بولۋى كەرەك) ورتا، تەحنيكالىق جانە كاسىپتىك، ورتا بىلىمنەن كەيىنگى، جوعارى نەمەسە جوعارى وقۋ ورنىنان كەيىنگى ءبىلىم بەرۋ ۇيىمدارىندا كۇندىزگى وقۋ نىسانى بويىنشا ءبىلىم الاتىن بالالارى بار وتباسىلار جاتادى.