كوپبالالى وتباسىلارعا ارنالعان جاردەماقى مولشەرى ءوستى
استانا. kazinform - ەڭبەك جانە حالىقتى الەۋمەتتىك قورعاۋ مينيسترلىگى زەينەتاقى مەن جاردەماقىعا قانشا تەڭگە قوسىلعانىن ايتتى.
2025 -جىلعى 1 - قاڭتاردان باستاپ مەملەكەتتىك جاردەماقىلار مەن بازالىق زەينەتاقى تولەمدەرىنىڭ بارلىق ءتۇرىنىڭ مولشەرى ق ر ۇلتتىق بانكى ايقىندايتىن ينفلياتسيانىڭ بولجامدى دەڭگەيىنە سايكەس %6,5 عا، ىنتىماقتى زەينەتاقى %8,5 عا، ياعني ينفلياتسيا دەڭگەيىنەن %2 عا وزا وتىرىپ ۇلعايتىلدى.
بۇدان باسقا مەملەكەت باسشىسىنىڭ تاپسىرماسى بويىنشا 2023 -جىلدان باستاپ بەس جىل ىشىندە ەڭ تومەن بازالىق زەينەتاقىنى ەڭ تومەن كۇنكورىس دەڭگەيىنىڭ %70 نا دەيىن، ەڭ جوعارى - %12- عا دەيىن جىل سايىن كەزەڭ-كەزەڭىمەن ارتتىرۋ جۇزەگە اسىرىلادى.
ماسەلەن، 2025-جىلعى 1-قاڭتاردان باستاپ بازالىق زەينەتاقىنىڭ ەڭ تومەن مولشەرى ەڭ تومەن كۇنكورىس دەڭگەيىنىڭ %65 نان %70 عا دەيىن ۇلعايتىلدى، بۇل 32360 تەڭگەنى قۇراپ، ونىڭ ەڭ جوعارى مولشەرى ەڭ تومەن كۇنكورىس دەڭگەيىنەن 105 تەن %110 عا دەيىن ارتتىرىلىپ، 50851 تەڭگەنى قۇرايدى،
مىسالى، 2019 -جىلى زەينەتكەرلىككە شىققان 69 جاستاعى زەينەتكەردىڭ 2024 -جىلى بيۋدجەتتەن تولەنەتىن زەينەتاقى مولشەرى 156856 تەڭگەنى قۇرادى، ونىڭ ىشىندە بازالىق زەينەتاقى تولەمى - 45578 تەڭگە، ىنتىماقتى زەينەتاقى - 111278 تەڭگە. 2025 -جىلعى 1- قاڭتاردان باستاپ ءوسىمدى ەسكەرە وتىرىپ، وسى زەينەتكەر ءۇشىن زەينەتاقىنىڭ جالپى سوماسى 171588 تەڭگەگە دەيىن ۇلعايدى، ونىڭ ىشىندە بازالىق زەينەتاقى - 50851 تەڭگەنى، ىنتىماقتى زەينەتاقى - 120737 تەڭگەنى قۇرادى. اتالعان سومالارعا ب ج ز ق- داعى تولەمدەر كىرمەيتىنىن اتاپ ءوتۋ ماڭىزدى.
2025 -جىلعى 1- قاڭتاردان باستاپ مەملەكەتتىك جاردەماقىلاردىڭ ۇلعايۋىنىڭ بىرنەشە ۇلگىسى:
— 1, 2, 3 بالا تۋعاندا بەرىلەتىن جاردەماقى 140296 تەڭگەدەن 149416 تەڭگەگە دەيىن، 4 جانە ودان دا كوپ بالا تۋعاندا بەرىلەتىن جاردەماقى - 232596 تەڭگەدەن 247716 تەڭگەگە دەيىن ۇلعايدى؛
— مولشەرى بالالار سانىنا بايلانىستى بەرىلەتىن كوپبالالى وتباسىلارعا ارنالعان جاردەماقى 4 بالاسى بار وتباسىلار ءۇشىن 59183 تەڭگەدەن 63030 تەڭگەگە دەيىن، 10 بالاسى بار وتباسىلار ءۇشىن - 147680 تەڭگەدەن 157280 تەڭگەگە دەيىن ارتتى؛
— I توپ مۇگەدەكتىگى بار ادامدارعا ارنالعان جاردەماقى 95496 تەڭگەدەن 101702 تەڭگەگە دەيىن، II توپ — 76397 تەڭگەدەن 81362 تەڭگەگە دەيىن، III توپ — 52089 تەڭگەدەن 55474 تەڭگەگە دەيىن ءوستى.
سونداي- اق، مەملەكەتتىك الەۋمەتتىك ساقتاندىرۋ قورىنان (بۇدان ءارى — م ءا س ق) اسىراۋشىسىنان ايىرىلۋ جانە ەڭبەككە قابىلەتتىلىگىنەن ايىرىلۋ بويىنشا تولەمدەر مولشەرى %6,5 عا ارتتى.
اتالعان تولەمدەر مىندەتتى الەۋمەتتىك ساقتاندىرۋ جۇيەسىنە قاتىسۋشىلارعا بيۋدجەتتەن بەرىلەتىن مەملەكەتتىك جاردەماقىلارعا قوسىمشا جۇزەگە اسىرىلادى.
تولەمدەردىڭ مولشەرى جەكە ساناتتارعا جانە كەلەسىلەرگە بايلانىستى بولادى: سوڭعى 2 جىلدا م ءا س ق- عا الەۋمەتتىك اۋدارىمدار جۇرگىزىلگەن ورتاشا ايلىق تابىس، ەڭبەككە قابىلەتتىلىگىنەن ايىرىلۋ كوەففيتسيەنتتەرى، اسىراۋىنداعى ادامدار سانى، مىندەتتى الەۋمەتتىك ساقتاندىرۋ جۇيەسىنە قاتىسۋ ءوتىلى جانە تابىستى الماستىرۋ.
بۇعان دەيىن ەلىمىزدە 2025 -جىلى زەينەت جاسى وزگەرمەيتىنى، ياعني ەرلەر - 63 جاس، ايەلدەر - 61 جاسىندا زەينەتكە شىعاتىنىن جازدىق.
