كوپبالالى انا سوتتىڭ كومەگىمەن باسپانا كەزەگىنە قايتا قويىلدى
پاۆلودار. KAZINFORM - ەكى جىل بۇرىن ايەل ادامعا كەزەگى بويىنشا اكىمدىك جەر ءۇي بەرگەن. الايدا تۇرعىن دەنساۋلىق جاعدايىنا بايلانىستى ۇيگە پەش جاعا الماپتى. ول مۇگەدەكتىگى بار جاندارعا قولايلى باسپانا تاۋىپ بەرۋدى سۇراعانىمەن اكىمدىك باس تارتقان.
بەلگىلى بولعانداي، كوپ بالالى انا ك. مەملەكەتتىك تۇرعىن ءۇي قورىنان تۇرعىن ۇيگە مۇقتاج تۇلعالار رەتىندە ۇزاق ۋاقىت بويى ەسەپتە تۇرعان. 2022 -جىلى اكىمدىك وعان پاۆلودار قالاسى كەنجەكول اۋىلىندا پەشپەن جىلىتىلاتىن جاڭا ۇيدەن پاتەر بەرىلگەن. الايدا ول ۇيدە سۋمەن جابدىقتاۋ جانە كارىز بويىنشا كوپتەگەن ماسەلەلەر انىقتالدى.
2023 -جىلى ك. مۇگەدەك دەپ تانىلىپ، دارىگەرلەر وعان فيزيكالىق جۇكتەمەن اينالىسۋعا بولمايتىنىن ەسكەرتكەن. سونىڭ سالدارىنان تالاپ قويۋشىنىڭ پەشتى جاعۋعا فيزيكالىق تۇرعىدان مۇمكىندىگى بولماي قالعان.
«ك. جەرگىلىكتى اكىمگە تۇرعىن ءۇي كەزەگىن قالپىنا كەلتىرۋ نەمەسە مۇگەدەك مارتەبەسىنە سايكەس باسقا تۇرعىن ءۇي بەرۋ تۋرالى وتىنىشىمەن جۇگىنگەن. ءبىراق اكىمدىكتەگىلەر ونى قاناعاتتاندىرۋدان باس تارتقان. ءىستى قاراۋ بارىسىندا سوت ادىلدىك پەن اقىلعا قونىمدىلىق قاعيداتتارىنىڭ، سونداي-اق اكىمشىلىك ءىس جۇرگىزۋ ءتارتىبىنىڭ بۇزىلۋىن انىقتادى»، - دەپ حابارلادى وبلىستىق سوتتىڭ باسپا ءسوز قىزمەتىنەن.
سوت شەشىمىمەن جاۋاپكەر مەن تالاپ قويۋشى اراسىنداعى پاتەردى جالداۋ شارتى بۇزىلدى. ك. -نىڭ مۇگەدەكتىك مارتەبەسىنە سايكەس، 2014 -جىلدىڭ 27-ماۋسىمىنان كوپبالالى وتباسى ساناتى رەتىندە تىركەلگەن كەزدەن باستاپ مەملەكەتتىك تۇرعىن ءۇي قورىنان باسپانا الۋ كەزەگى قالپىنا كەلتىرىلدى. سونداي-اق سوتتىڭ شەشىمىمەن جەرگىلىكتى اتقارۋشى بيلىك مۇگەدەك جاندى سايكەس باسپانامەن قامتاماسىز ەتۋگە ماجبۇرلەندى.
اۆتور
مۇرات اياعان
