مەكتەپتەردەگى الىمجەتتىكتى ەرتە انىقتاۋ تاسىلدەرى بەكىتىلدى - سادەنوۆ
استانا. KAZINFORM - وقۋ ورىندارىندا زاڭسىز ارەكەتتەردى ەرتە انىقتاۋ تاسىلدەرى بەكىتىلدى. بۇل تۋرالى ۇكىمەت وتىرىسىندا ىشكى ىستەر ءمينيسترى ەرجان سادەنوۆ ءمالىم ەتتى.
- جاڭا پروفيلاكتيكا تۋرالى زاڭ اياسىندا ءبىلىم بەرۋ ۇيىمدارىندا بالالاردىڭ قۇقىقتارىن قورعاۋدىڭ قوسىمشا تەتىكتەرى كوزدەلگەن. ۆەدومستۆوارالىق ءوزارا ءىس-قيمىل الگوريتمدەرى، ونىڭ ىشىندە بۋللينگتى جانە باسقا دا زاڭسىز ارەكەتتەردى ەرتە انىقتاۋ تاسىلدەرى بەكىتىلدى. وسى جۇمىستىڭ تيىمدىلىگىن ارتتىرۋ ءۇشىن مەكتەپتەردە تالىمگەرلەردى ەنگىزۋ ۇسىنىلادى. ونىڭ تيىمدىلىگى جەتىسۋ وبلىسىندا جانە شەتەلدىك تاجىريبەمەن دە دالەلدەندى. قازىر جەتىسۋ وبلىسىنىڭ 110 مەكتەبىندە پيلوتتىق جوبا ىسكە اسىپ جاتىر. تالىمگەرلەر ءتيىستى توپتارمەن ناقتى جۇمىس، قيىن جاعدايداعى بالالارمەن الەۋمەتتىك وڭالتۋ شارالارىن جۇزەگە اسىرىپ جاتىر. ناتيجەسىندە، وسى مەكتەپتەردە وقۋشىلار اراسىندا قۇقىق بۇزۋ ارەكەتتەرىنە جول بەرىلمەدى،-دەدى ە. سادەنوۆ.
وسى ورايدا ۆەدومستۆو باسشىسى وقۋ-اعارتۋ ءمينيسترى مەن اكىمدىكتەر وسى مودەلدى بارلىق وبلىستاردا ەنگىزۋدى تەزدەتۋى قاجەت ەكەنىن ايتتى.
بۇعان دەيىن حابارلانعانداي، بيىل 1-سىنىپقا 380 مىڭنان استام بالا قابىلدانادى.
