مەكتەپتە وقۋشىنىڭ تەلەفون قولدانۋ ءتارتىبىن كىم ايقىندايدى
استانا. KAZINFORM - مەكتەپتە وقۋشىنىڭ تەلەفون قولدانۋ ءتارتىبىن ءار ءبىلىم ورداسى دەربەس ايقىندايدى. بۇل تۋرالى ۇكىمەت وتىرىسىنان كەيىنگى باسپا ءسوز ءماسليحاتىندا وقۋ-اعارتۋ ءبىرىنشى ۆيتسە-ءمينيسترى شىنار اقپاروۆا ءمالىم ەتتى.
ونىڭ ايتۋىنشا، وقۋ-اعارتۋ مينيسترلىگى ءبىلىم بەرۋ ۇيىمدارىندا ۇيالى تەلەفوندى قولدانۋدىڭ ءبىرىڭعاي تالابىن ازىرلەدى. ال بۇل تالاپتى ناقتى ىسكە اسىرۋدى ءار مەكتەپ دەربەس ايقىندايتىن بولادى.
- ساباق ۇستىندە بالا ۇيالى تەلەفوندى قولدانبايدى. ال ونى پەداگوگقا بەرۋ نەمەسە سىنىپ ىشىنە قويۋ سىندى ماسەلەگە قاتىستى ۇيىمداستىرۋ جايتتارىن مەكتەپتەگى جاعدايعا بايلانىستى ءبىلىم بەرۋ ۇيىمى ءوزى انىقتايدى، - دەدى ول.
ۆيتسە-ءمينيستردىڭ ايتۋىنشا، ءبىر مەكتەپتە ۇيالى تەلەفون سىنىپتا ساقتالسا، ەندى بىرىندە ول ءۇشىن ارنايى جاشىكتەر قاراستىرىلۋى مۇمكىن. وسىلايشا، ۇيالى تەلەفوندى قولدانۋ ءتارتىبى ءار مەكتەپتىڭ ىشكى ەرەجەسىندە بەكىتىلەدى.
