كەتكىمىز كەلمەيدى. وڭتۇستىكتەن كوشكەندەر تەرىسكەيدەگى جاعدايى تۋرالى ايتتى

استانا. kazinform - تۇستىكتەگى قازاقتىڭ تەرىسكەيگە كوش تۇزەۋى 2017 -جىلى باستالعان. مەملەكەتتىك «ەڭبەك» باعدارلاماسىنىڭ «جۇمىس كۇشىنىڭ ۇتقىرلىعىن ارتتىرۋ» اتتى ءۇشىنشى باعىتى 2021 -جىلعا دەيىن جالعاستى. سول ارالىقتا جۇمىس كۇشى كوپ وڭىرلەردەن جۇمىس كۇشى جەتىسپەيتىن وڭىرلەرگە 735 وتباسى (قۇرامىندا 1977 ادام) قونىس اۋداردى. ەلىمىزدەگى ەڭبەك كۇشىن رەتتەۋدى ماقسات ەتكەن كوشتىڭ بۇيداسى ۇزىلگەن جوق. 2022 -جىلى ول «قۋاتتى وڭىرلەر - ەل دامۋىنىڭ درايۆەرى» ۇلتتىق جوباسى اياسىندا جۇزەگە اسىرىلا باستادى. سولتۇستىكتى بەتكە العاندار سوندا ورنىعىپ قالعان.

اسى الپىسقا تاياعان ساۋلە ءسۇيىنوۆا سولتۇستىك قازاقستان وبلىسىنا التى جىل بۇرىن شىمكەنتتەن وتباسىمەن بارعان. وعان دەيىن ۇلكەن ۇلى ءۇي ىشىمەن كوشكەن ەكەن.

«كوشى-قون باعدارلاماسى تۋرالى جەرگىلىكتى تۇرعىنداردان 2017 -جىلى ەستىدىك. كەيىن تۇڭعىشىم مەن كەلىنىمدى بالالارىمەن بىرگە كوشىرۋ نيەتىم پايدا بولدى. سول جىلى تامىز ايىندا ۇلىم سولتۇستىككە بارىپ، كورىپ، جاعدايمەن تانىسىپ قايتتى. ۇناتتى. كەيىن بالا-شاعاسىن الىپ سولتۇستىك قازاقستان وبلىسى عابيت مۇسىرەپوۆ اۋدانىنىڭ كوۆىلنوە اۋىلىنا قونىس اۋداردى. سونداعى «اقسەلەۋ» شارۋاشىلىعىنىڭ باسشىسى سەرىك مالايەۆ دانەكەرلەۋشى ەتىپ جۇمىسقا قابىلدادى. ەكى-ءۇش ايدان كەيىن جولداسىم «بالالاردىڭ جاعدايىن ءبىلىپ كەلەيىن» دەپ كەتكەن. ول دا اۋىلدى ماقتاپ كەلدى. «ءبىز دە كوشەمىز» دەدى. ستۋدەنت ۇلىمدى قاراشاڭىراقتا قالدىرىپ، 2018 -جىلى ساۋىردە جولداسىم، ۇلىم، قىزىم بار، ءبىز دە سولتۇستىككە قونىس تەپتىك»، - دەدى ساۋلە اپا.

بارعان بويدا ۇلكەن ۇلى دا، وزدەرى دە ءۇيلى بولعان. جۇمىس جونىنەن دە قولداۋ كورگەن. كەيىپكەرىمىز سولتۇستىكتىڭ اۋا رايى دا، ادامدارى دا وتە جايلى بولعانىن ايتىپ وتىر.

«وبلىس ورتالىعىنان الىس دەمەسەڭ، كوۆىلنوە اۋىلى وزىمىزگە جايلى ءتيدى. وتاعاسى ەكەۋمىز زەينەت جاسىنا جەتىپ قالدىق. ءبىراق ۇيرەنگەن ورنىمىزدى سۋىتقىمىز كەلمەيدى. ۋادە ەتىلگەن مەملەكەتتىك قولداۋعا قول جەتكىزدىك. قولىمنان كەلسە، وڭتۇستىكتەگى ءۇي-جايى، جۇمىسى جوق وتباسىلاردىڭ وسىندا كوشۋىنە اتسالىسار ەدىم. ماعان باعدارلامانىڭ ناسيحاتى از سياقتى كورىنەدى. كوپشىلىككە كوشۋگە قولايلى جەرلەردى انىقتاپ ايتسا ەكەن. پاتەر اۋىستىرىپ شارشاعان جاستار مۇمكىندىكتى پايدالانسا ەكەن»، - دەدى باعدارلامانىڭ شاراپاتىن كورگەن اۋىل تۇرعىنى.

ال ادەمى جايماحانوۆا كۇنى كەشەگە دەيىن قىزىلوردا وبلىسى قازالى اۋدانىنىڭ بىرلىك اۋىلىندا تۇرعان. اۋىلدا ەكى قولعا ءبىر كۇرەك تاپپاعان سوڭ جاس وتباسى مەملەكەت ۇسىنعان ءتاۋىر مۇمكىندىكتەن ايىرىلعىسى كەلمەپتى.

«قوستاناي وبلىسى اۋليەكول اۋدانىنىڭ فەدوسەيەۆ اۋىلىنا 2021 -جىلى كوشىپ كەلدىك. جولداسىم دەنە شىنىقتىرۋ ءپانىنىڭ مۇعالىمى ماماندىعىن، ءوزىم اسپازدىقتى بىتىرگەنبىز. وكىنىشكە قاراي جولداسىم سىرقاتتانىپ قالدى. ءوزىم مەكتەپكە تازالىقشى بولىپ ورنالاستىم. كەلگەنىمىزگە وكىنبەيمىز. اۋا رايى ۇنادى. بىزدىكىندەي ىستىق جوق»، - دەدى ادەمى.

كەيىپكەرىمىزدىڭ ماقتاۋى وزگەلەرگە وتكەن سياقتى. ارتىنشا ءىنىسى مەن كەلىنى دە كەلىپتى.

«ءىنىم مال شارۋاشىلىعىن قولعا الدى. كەلىنىم مەدبيكە بولىپ جۇمىسقا ورنالاستى. اپامىز بەن جەزدەمىز، تاتەمىز دە قونىس اۋداردى. تاتەمىز اۋىلدان دۇكەن اشىپ، مال جيناپ، جاعدايىن جاقسارتىپ الدى. ءوزىم دە بوس ۋاقىتىمدا تورت، ءبالىش ءپىسىرىپ، قوسىمشا ءناپاقا تابامىن. بىرگە كوشىپ كەلگەن ون شاقتى وتباسى ارالاسىپ تۇرامىز. مۇندا ماماندىق بويىنشا جۇمىس تابۋعا بولادى. اۋىزبىرشىلىگى مول اۋىلعا كەلگەنىمە قۋانامىن»، - دەدى ول.

كوشى-قون كوميتەتىنىڭ مالىمەتىنشە، 2024 -جىلى باعدارلاما اياسىندا 7 مىڭ كۆوتا بولىنگەن. كۆوتاعا قاتىسقىسى كەلەتىندەر 7 ءوڭىردىڭ ءبىرىن تاڭداي الادى. ولار - قاراعاندى، اباي، ۇلىتاۋ، شىعىس قازاقستان، قوستاناي، پاۆلودار جانە سولتۇستىك قازاقستان وبلىستارى. بيىلعى قارجىلاي قولداۋ كولەمى وتباسىنداعى ءاربىر ادام ءۇشىن 258 مىڭ تەڭگە بولىپ بەكىتىلدى. بۇل ءبىر رەت بەرىلەدى. ال ءۇيدى قونىس اۋدارۋشى ءوزى ساتىپ الا الادى. ونىڭ 4 ميلليون 282 مىڭ تەڭگەسىن مەملەكەت وتەيدى.

 

 Massaget.kz