مەكتەپكە ءدىني كيىممەن كەلگەن وقۋشىنىڭ اتا-اناسىنا ايىپپۇل سالىنا ما؟

مەكتەپ فورماسىنا قويىلاتىن تالاپتاردى بۇزىپ، ءبىلىم بەرۋ ۇيىمىنا ءدىني سيپاتتاعى كيىممەن نەمەسە باس كيىممەن كەلگەن وقۋشىعا قاتىستى مەكتەپ قانداي شارا قولدانا الادى؟ بۇل ماسەلەنى وقۋ-اعارتۋ ءبىرىنشى ۆيتسە-ءمينيسترى شىنار اقپاروۆا و ك ق الاڭىندا وتكەن بريفينگتە ءتۇسىندىردى.
ونىڭ ايتۋىنشا، مەكتەپ فورماسىنا قويىلاتىن جالپى تالاپتار وقۋ-اعارتۋ مينيسترلىگىنىڭ ءتيىستى بۇيرىعىمەن بەلگىلەنگەن. ءبىلىم بەرۋ ۇيىمىنىڭ قابىرعاسىندا باس كيىممەن جۇرۋگە جول بەرىلمەيدى.
قولدانىستاعى تالاپتارعا سايكەس، ءبىلىم بەرۋ ۇيىمىنىڭ ىشىندە باس كيىم كيۋگە جول بەرىلمەيدى. بۇل تالاپتاردى بۇزعان جاعدايدا اكىمشىلىك قۇقىق بۇزۋشىلىق تۋرالى كودەكسكە سايكەس جاۋاپكەرشىلىك قاراستىرىلعان، - دەدى شىنار اقپاروۆا.
ۆيتسە-ءمينيستردىڭ ايتۋىنشا، تالاپ بۇزىلعان جاعدايدا مەكتەپ بىردەن جازالاۋ شاراسىنا جۇگىنبەيدى. الدىمەن الەۋمەتتىك پەداگوگ پەن سىنىپ جەتەكشىسى اتا-انامەن ءتۇسىندىرۋ جۇمىستارىن جۇرگىزەدى.
بالانى مەكتەپكە قابىلداعان كەزدە اتا-انالار ءبىلىم بەرۋ ۇيىمىنىڭ جارعىسىمەن تانىسادى. سوندىقتان ولار مەكتەپ جارعىسىندا بەلگىلەنگەن تالاپتاردى ساقتاۋعا مىندەتتى. سونىمەن قاتار مەكتەپ پەن اتا-انا اراسىندا كەلىسىم جاسالادى. وندا دا اتا-انالاردىڭ ساقتاۋى ءتيىس تالاپتارى ناقتى كورسەتىلەدى، - دەدى ول.
شىنار اقپاروۆا اتا-انالار مەن بالانىڭ زاڭدى وكىلدەرى ءبىلىم بەرۋ سالاسىنداعى زاڭنامادا جانە مەكتەپ جارعىسىندا بەلگىلەنگەن تالاپتاردى ساقتاۋعا جاۋاپتى ەكەنىن اتاپ ءوتتى.
قايتالانعان جاعدايدا 5 ا ە ك ايىپپۇل سالىنادى
جۋرناليستەردىڭ ناقتىلاۋ سۇراعىنا جاۋاپ بەرگەن ءبىرىنشى ۆيتسە-مينيستر اكىمشىلىك جاۋاپكەرشىلىك شارالارىنا دا توقتالدى.
ونىڭ ايتۋىنشا، اكىمشىلىك قۇقىق بۇزۋشىلىق تۋرالى كودەكستىڭ 49-بابىنا سايكەس، مۇنداي قۇقىق بۇزۋشىلىق ءۇشىن الدىمەن ەسكەرتۋ جاسالادى.
ەگەر اتا-انا ءبىر جىل ىشىندە وسى قۇقىق بۇزۋشىلىقتى قايتا جاساسا، وندا 5 ا ە ك مولشەرىندە ايىپپۇل قاراستىرىلعان.