مەكتەپ فورماسىن كيمەگەن وقۋشى ساباقتان شەتتەتىلە مە
استانا. KAZINFORM - مەكتەپ فورماسىنا قويىلاتىن تالاپتاردى ساقتاماعان وقۋشىنى مەكتەپكە كىرگىزبەۋگە نەمەسە ساباقتان شەتتەتۋگە بولمايدى. بۇل تۋرالى ق ر وقۋ-اعارتۋ مينيسترلىگىنىڭ ءبىرىنشى ۆيتسە-ءمينيسترى شىنار اقپاروۆا مالىمدەدى.
ونىڭ ايتۋىنشا، قولدانىستاعى زاڭناماعا سايكەس، بالانى وقۋ پروتسەسىنەن شەتتەتۋگە جول بەرىلمەيدى.
- بالا ساپالى ءبىلىم الۋعا قۇقىلى. سوندىقتان وقۋشىنى مەكتەپكە كىرگىزبەۋگە بولمايدى، - دەدى شىنار اقپاروۆا.
سونىمەن قاتار ءبىرىنشى ۆيتسە-مينيستر اتا-انالار مەن ءبىلىم الۋشىلاردىڭ مەكتەپ فورماسىنا قاتىستى بەلگىلەنگەن تالاپتاردى ساقتاۋى ءتيىس ەكەنىن اتاپ ءوتتى.
- الايدا قازاقستان رەسپۋبليكاسىنىڭ زاڭناماسى بار ەكەنىن جانە ونىڭ تالاپتارى ورىندالۋى ءتيىس ەكەنىن اتاپ وتكىم كەلەدى. بۇل تالاپتار قازاقستان رەسپۋبليكاسىنىڭ كونستيتۋتسياسىندا دا بەكىتىلگەن. ءبىلىم الۋشىلارعا قاتىستى تالاپتار «ءبىلىم تۋرالى» زاڭنىڭ 47-بابىندا، ال اتا-انالاردىڭ مىندەتتەرى 49-باپتا كورسەتىلگەن. اتا-انالار ءبىلىم بەرۋ ۇيىمى بەلگىلەگەن مەكتەپ فورماسىن ساقتاۋىن قامتاماسىز ەتۋگە مىندەتتى، - دەدى سپيكەر.
مەكتەپ فورماسىنا قويىلاتىن تالاپتاردى ءبىلىم بەرۋ ۇيىمى اتا-انالار قاۋىمداستىعىمەن جانە قامقورشىلىق كەڭەسپەن بىرلەسىپ ايقىندايدى.
- مەكتەپ فورماسى ءبىلىم بەرۋ ۇيىمى تاراپىنان بەكىتىلەدى. ونىڭ تالاپتارىن ساقتاماعان جاعدايدا زاڭنامادا ءتيىستى جاۋاپكەرشىلىك قاراستىرىلعان، - دەپ تولىقتىردى ءبىرىنشى ۆيتسە-مينيستر.
ايتا كەتەيىك، مەكتەپتەگى ارالىق باعالاۋ نە ءۇشىن كەرەك ەكەنىن جازعانبىز.
