كەتچۋپ پەن مايونەزدى ارالاستىرىپ جەۋگە بولا ما؟ دارىگەر جاۋاپ بەردى
استانا. KAZINFORM - دۇرىس تاماقتانۋ - جاقسى ءارى پايدالى، ءبىراق ەرتە مە كەش پە شۇجىق قويىلعان بۋتەربرود نەمەسە مايونەز قوسىلعان سالات جەگىڭىز كەلەدى. دارىگەرلەردىڭ ايتۋىنشا، جالپى اراسىندا مۇنداي تاعام جەۋ قاۋىپتى ەمەس، باستىسى راتسيونىڭىز تولىقتاي وسىنداي تاعامداردان تۇرماۋى كەرەك. ال مايونەز بەن كەتچۋپتى ارالاستىرسا نە بولادى؟ بۇل ەكى تۇزدىق تا پايدالى ونىمگە جاتپايدى. ەكەۋىن ارالاستىرسا، اعزاعا ودان بەتەر زيان با؟ بۇل سۇراقتارعا Naked Sceince-كە تەراپيەۆت جانە توكسيكولوگ الەكسەي ۆودوۆوزوۆ جاۋاپ بەردى.
بۇل تۇزدىق بۇرىننان بار
بۇل تۇزدىقتى رەسمي تۇردە ارگەنتينالىق دارىگەر، بيوحيميك جانە حيميا بويىنشا نوبەل سىيلىعىنىڭ لاۋرەاتى لۋيس فەدەريكو لەلۋارۋ ۇسىندى. عالىم قۇرمەت ماداقتاماسىن 1970 -جىلى لاكتوزانىڭ ماتابوليستىك جولدارىن زەرتتەگەنى ءۇشىن العان بولاتىن.
ارينە، «كەتچۋنەزدى» دايىنداۋدىڭ قاتاڭ رەتسەپتى جوق. بىرەۋلەر تۇزدىقتاردى 1:1 پروپورتسيادا ارالاستىرادى، ال باسقالار مايونەزدى نەمەسە كەتچۋپتى ءسال كوبىرەك قوسادى. بۇل ۇيلەسىم جاڭا دۇنيە ەمەس، ول بۇرىننان بار. سوندىقتان ولاردى ارالاستىرۋعا بولمايدى دەپ ايتۋعا كەلمەيدى. الايدا مۇنداي ۇيلەسىم دەنساۋلىققا قالاي اسەر ەتەدى؟
شامانى ءبىلۋ ماڭىزدى
الەكسەي ۆودوۆوزوۆتىڭ ايتۋىنشا، بۇل ءسىزدىڭ تۇزدىقتى قالاي دايىندايتىنىڭىزعا جانە ونى قالاي جەپ ۇيرەنگەنىڭىزگە بايلانىستى. ارينە، ەگەر كۇندە مايلى فريدى «كەتچۋنەزگە» ارالاستىرىپ جەسەڭىز، تاماقتانۋىڭىز پايدالى ەمەس بولادى جانە ۋاقىت وتە ول جاعىمسىز سالدارلارعا اكەلەدى. ال ۆەگاندىق مايونەزدى قانتى جوق كەتچۋپپەن ارالاستىرساڭىز، مۇنداي تۇزدىق زيان كەلتىرە قويمايدى. قاراپايىم كەتچۋپ پەن مايونەزدى ارالاستىرىپ، بۇل تۇزدىقتى اراسىندا جانە كوپ مولشەردە جەمەسەڭىز، دەنساۋلىعىڭىزعا قورقىنىشتى ەشتەڭە بولا قويمايدى.
Massaget.kz
