مەكسيكادا ديماش قۇدايبەرگەنگە ارنالعان مۋرال پايدا بولدى

ەرەكشە تۋىندىنى جەرگىلىكتى جانكۇيەرلەر سۇيىكتى انشىسىنە ارناعان سىي رەتىندە تارتۋ ەتتى. ولاردى ديماشتىڭ شىعارماشىلىعىنا دەگەن ورتاق سۇيىسپەنشىلىك بىرىكتىرگەن.

باستامانى DimashDearsRegiasMty فان-كلۋبىنىڭ مۇشەلەرى مەكسيكالىق Dears por Dimash اليانسىنىڭ قولداۋىمەن جۇزەگە اسىردى. مۋرالدىڭ اۆتورى - Antonio Art Mural شىعارماشىلىق اتىمەن تانىمال سۋرەتشى انتونيو.

ديماشتىڭ ۇلكەن پورترەتى مونتەررەيدىڭ ورتالىعىنداعى Francisco Javier Mina 1140، Centro مەكەنجايىندا ورنالاسقان. ەندى قالا تۇرعىندارى مەن قوناقتارى مەكسيكالىق Dears ءتىڭ قازاقستاندىق ونەر يەسىنە دەگەن ىقىلاسىن بەينەلەيتىن تۋىندىنى تاماشالاي الادى.

فان-قوعامداستىق وكىلدەرىنىڭ ايتۋىنشا، مۋرالدىڭ ولار ءۇشىن ماڭىزى زور. بۇل - سۇيىكتى ءانشىنىڭ جاي عانا پورترەتى ەمەس، ونىڭ ونەرىنە دەگەن شىنايى ريزاشىلىق پەن مەكسيكا جانە قازاقستان اراسىنداعى مادەني بايلانىستىڭ سيمۆولى.

- ءبىزدىڭ ويىمىزشا، بۇل كوركەم تۋىندى جاي عانا ۆيزۋالدى ارناۋدان الدەقايدا ماڭىزدى. ول - مەكسيكالىق جانكۇيەرلەردىڭ، اسىرەسە مونتەررەيدەگى Dears قاۋىمداستىعىنىڭ شىنايى سۇيىسپەنشىلىگى مەن قۇرمەتىنىڭ كورىنىسى. ءبىز ديماش پەن ونىڭ وتانى - قازاقستان ارقىلى قالىپتاسقان ونەر جانە مادەني بايلانىسىمىزدى ايشىقتاعىمىز كەلەدى،- دەپ ءبولىستى Dears por Dimash مەكسيكالىق اليانسىنىڭ وكىلدەرى.

مۋرالدىڭ سالىنۋى ديماش قۇدايبەرگەننىڭ مونتەررەيدە وتەتىن كونتسەرتى قارساڭىندا ەرەكشە ماڭىزعا يە بولىپ وتىر. ءانشىنىڭ DIMENSIONS الەمدىك تۋرى اياسىنداعى كونسەرتى 14-قاراشادا وتەدى.

جانكۇيەرلەر وزدەرىنىڭ شىعارماشىلىق سىيى ەكى ەل اراسىنداعى دوستىقتىڭ تاعى ءبىر نىشانىنا اينالىپ، ونەرى بۇكىل الەم تىڭدارماندارىن بىرىكتىرەتىن قازاقستاندىق ءانشىنى مەكسيكا تۇرعىندارىنا كەڭىنەن تانىستىرادى دەپ ۇمىتتەنەدى.

وسىدان بۇرىن مەكسيكالىق جانكۇيەرلەر ديماش قۇدايبەرگەنگە مۋزىكالىق توسىنسىي جاساعانىن جازعانبىز.