ەكسترەميستىك توپتارعا قوسىلعان 40 تان اسا ازامات ۇستالدى

تاشكەنت. KAZINFORM - تاشكەنت قالالىق ىشكى ىستەر باس باقارماسىمەن (ءى ءى ب ب) وزگە دە ۋاكىلەتتى ورگاندار بىرلەسىپ، شاھار اۋماعىندا ءدىني ەكسترەميزم مەن تەرروريزمنىڭ الدىن الۋعا باعىتتالعان رەيد جۇرگىزىپ جاتىر، دەپ حابارلايدى Kazinform اگەنتتىگىنىڭ تاشكەنتتەگى مەنشىكتى ءتىلشىسى ءاليحان اسقار.

قۇزىرلى ورگاننىڭ مالىمەتىنشە، 7-ساۋىردە وزبەكستان استاناسىندا ەكسترەميستىك راديكالدى توپتارعا قوسىلعان 45 ازاماتتىڭ ۇيىنە ءتىنتۋ جۇرگىزىلىپ، كۇدىكتىلەر قاماۋعا الىندى.

«قۇرمەتتى ازاماتتار، الەۋمەتتىك جەلى ارقىلى ءوز يدەيالارىڭىزدى ناسيحاتتاۋدان جانە ءتۇرلى راديكالدى توپتارعا قوسىلۋدان اۋلاق بولىڭىزدار! ءارقاشان بالاڭىزدىڭ قانداي چاتتارعا قوسىلاتىنىن، قانداي ۆيدەو مەن ماتەريالداردى كورەتىنىن باقىلاۋدا ۇستاڭىز»، - دەپ ەسكەرتتى تاشكەنت قالالىق ىشكى ىستەر باس باسقارماسىنان.

قۇقىق قورعاۋ ورگانىنىڭ اقپاراتىنا ساي، بيىل 3 ايدا ءدىني ەكسترەميزم مەن تەرروريزم فاكتىلەرى بويىنشا 50 قىلمىستىق ءىس قوزعالدى.

سونداي-اق، وسى ارالىقتا 188 اكىمشىلىك حاتتاما تولتىرىلىپ، 264 ادامعا قاتىستى زاڭدى شارا قولدانىلعان.