كەسكەن-كۇيىك: كونە قالانىڭ جاڭا قۇپيالارى زەرتتەلىپ جاتىر
جوبانى ەۋرازيانى زەرتتەۋ قوعامىنىڭ قارجىلىق قولداۋىمەن «Rutrum» ج ش س قولعا الدى. قازاقستانداعى جەتەكشىسى - تاريح عىلىمدارىنىڭ كانديداتى دميتري ۆوياكين.
- سيتادەلدەگى قازبا جۇمىسى بارىسىندا 6 قۇرىلىس نىسانى، بىرنەشە قايتا قۇرىلۋ كەزەڭى جانە ءبىر بولمەدەگى التارلىق ورىنداردىڭ 5 دەڭگەيى انىقتالدى. قۇرىلىس قاباتتارىنىڭ بىرىنەن جاقسى ساقتالعان مونەتا تابىلدى. الداعى زەرتتەۋلەر ەسكەرتكىشتىڭ حرونولوگياسىن ناقتىلاۋعا مۇمكىندىك بەرەدى،-دەپ مالىمدەدى قازالى اۋداندىق مادەنيەت ءبولىمى.
كەسكەن- كۇيىك قالاشىعى ەجەلگى دەرەككوزدەردە حۋۆارا قالاسى دەپ اتالادى. حۋ «جاقسى قالا»، ۆار «ورىن» دەگەن ماعىنانى بىلدىرەدى.
- كولەمى جاعىنان بۇل قالا وسى ايماقتا استانا بولعان جانكەنت قالاشىعىنان اسىپ تۇسەدى. زەرتتەۋ بارىسىندا زاماناۋي گەودەزيالىق ءتۇسىرىلىم، 3D سكانەرلەۋ، فوتوگراممەتريا جانە ءاەروفوتوتۇسىرىلىم ادىستەرى قولدانىلدى،-دەلىنگەن حابارلامادا.
ماماندار ەجەلگى شاھاردى جۇيەلى زەرتتەۋ قازالى ءوڭىرىنىڭ كونە تاريحى مەن مادەني مۇراسىن عىلىمي تۇرعىدان زەردەلەۋگە ىقپال ەتەدى دەپ ەسەپتەيدى.
ەسكە سالايىق، مادەنيەت جانە اقپارات مينيسترلىگىنىڭ جوسپارىنا سايكەس بيىل قىزىلوردا وبلىسىنداعى رەسپۋبليكالىق ماڭىزى بار تاريحي-مادەني ەسكەرتكىشتەر رەستاۆراتسيادان ءوتىپ جاتىر.
