ەكس-ەۋرودەپۋتاتتىڭ ۇلى حالىقارالىق ەسىرتكى جەلىسىن ۇيىمداستىردى دەگەن كۇدىككە ءىلىندى
استانا. KAZINFORM - دۇيسەنبى كۇنى بەلگيادا يسپانيا مەن بەلگيا اراسىندا كاننابيس ساتاتىن ءىرى جەلىنى ۇيىمداستىردى دەگەن كۇدىككە ىلىنگەن التى ادام ۇستالدى.
ولاردىڭ اراسىندا ەۋروپارلامەنتتىڭ ادام قۇقىقتارى جونىندەگى كوميتەتىنىڭ بۇرىنعى باسشىسى ماري ارەنانىڭ ۇلى دا بار.
بريۋسسەل پروكۋراتۋراسى سارسەنبىدە تەرگەۋ سۋدياسى يسپانيا مەن بەلگيا اراسىنداعى ءىرى كولەمدەگى كاننابيس كونترابانداسىنا قاتىستى تەرگەۋ اياسىندا قىلمىستىق ۇيىمعا قاتىسى بار جانە ەسىرتكى اكەلدى، ساقتادى جانە ساتتى دەگەن ايىپ تاعىپ، التى كۇدىكتىنى قاماۋدا ۇستاۋ تۋرالى شەشىم شىعارعانىن جاريالادى.
وسى تەرگەۋ اياسىندا بارلىعى ون بەسكە جۋىق كۇدىكتى قاماۋعا الىنعان.
دۇيسەنبىدە بريۋسسەلدىڭ فەدەرالدىق سوت پوليتسياسى ەل استاناسىنىڭ سوت وكرۋگىندەگى بىرنەشە مەكەنجايدا، سونداي-اق ۆاللوندىق برابانت، لەج جانە ناميۋر اۋداندارىندا ءتىنتۋ جۇرگىزدى.
- قاماۋعا الىنعان التى كۇدىكتىنىڭ ءبىرى قىلمىستىق ۇيىمنىڭ باسشىسى بولىپ سانالادى، - دەپ مالىمدەدى بريۋسسەل پروكۋراتۋراسى.
تۇتقىندالعان التى ادامنان باسقا، قالعاندارى بوساتىلدى.
RTBF تەلەارناسىنىڭ حابارلاۋىنشا، قاماۋعا الىنعان كۇدىكتىلەردىڭ اراسىندا ەۋروپارلامەنتتىڭ سوتسياليستىك پارتيادان دەپۋتاتى ماري ارەنانىڭ ۇلى ۋگو لەمەر بار.
سوڭعىسى كاننابيس ساتۋعا مامانداندىرىلعان BRC-Co كومپانياسىنىڭ نەگىزىن قالاعان.
بەلگيالىق تەلەارناداعى دەرەككوزدىڭ حابارلاۋىنشا، ۋگو لەمەر - قاماۋعا الىنعان التى كۇدىكتىنىڭ ءبىرى.
تەرگەۋ امالدارى 2023 -جىلدىڭ شىلدەسىندە سىبايلاس جەمقورلىققا قارسى كۇرەس جونىندەگى ورتالىق باسقارما (OCRC) جۇرگىزگەن باسقا تەرگەۋ كەزىندە انىقتالعان ەسىرتكىنىڭ زاڭسىز اينالىمىنا قاتىستى ايعاقتار نەگىزىندە باستالدى.
ءوز كەزەگىندە ەۋروپارلامەنتتە ادام قۇقىقتارى جونىندەگى شاعىن كوميتەتتىڭ ءتورايىمى قىزمەتىن اتقارعان ماري ارەنا ەۋروپارلامەنتتەگى ءبىر توپ ادام تاياۋ شىعىستاعى كەيبىر ەلدەرگە اقشا مەن باعالى سىيلىقتار ءۇشىن ساياسي قىزمەت كورسەتكەن تاعى ءبىر اتىشۋلى ىسكە قاتىسى بار.
وسى ءىس اياسىندا بەلگيا پوليتسياسى ەۋروپا استاناسىن ءدۇر سىلكىندىرگەن بىرنەشە ءتىنتۋ مەن تۇتقىنداۋ جۇرگىزدى. ءتىنتۋ كەزىندە كومپيۋتەرلەر، ۇيالى تەلەفوندار مەن 600 مىڭ ەۋرو تاركىلەندى.
