كەڭەس داۋىرىندەگى قازاقستان دەموگرافياسى زەرتتەلىپ جاتىر - ولجاس بەكتەنوۆ
استانا. KAZINFORM - پرەمەر- مينيستر ولجاس بەكتەنوۆ سەنات دەپۋتاتىنىڭ ساۋالىنا جولداعان جاۋاپتا قازاقستان تاريحىنىڭ جاڭا 7 تومدىعى اياسىندا كەڭەس داۋىرىندەگى دەموگرافيا ماسەلەلەرى زەرتتەلىپ جاتقانىن ءمالىم ەتتى.
- مەملەكەت باسشىسىنىڭ تاپسىرماسىنا سايكەس وتاندىق تاريحشى عالىمدار «ەجەلگى داۋىردەن بۇگىنگى كۇنگە دەيىنگى قازاقستان تاريحى» اتتى جاڭا جەتى تومدىق اكادەميالىق باسىلىم ازىرلەپ جاتىر. 7 توم اياسىندا كەڭەس ءداۋىرىنىڭ دەموگرافياسى ماسەلەلەرى كەڭىنەن زەرتتەلىپ جاتىر، - دەپ جازىلعان جاۋاپتا.
سونداي-اق، ول دەپۋتاتتىڭ دەموگرافيالىق پروتسەستەردى تالداۋدىڭ ۇلتتىق ورتالىعىن قۇرۋ تۋرالى ۇسىنىسىن قازىر ورىنداۋ مۇمكىن ەمەس ەكەنىن ايتقان.
- ۇكىمەت 2026 -جىلعى 31 - جەلتوقسانعا دەيىن كۆازيمەملەكەتتىك سەكتور سۋبەكتىلەرىن قۇرۋعا موراتوري ەنگىزگەنىن حابارلايمىز، - دەلىنگەن ۇكىمەت باسشىسىنىڭ جاۋابىندا.
ولجاس بەكتەنوۆ قازاقستانداعى دەموگرافيالىق ءوسىم تەندەنتسيالارى تابىس دەڭگەيى ورتاشادان جوعارى ەلدەردىڭ كورسەتكىشىنەن جوعارى ەكەنىن ەسكە سالادى.
- حالىقارالىق ۇيىمداردىڭ (بىرىككەن ۇلتتار ۇيىمىنىڭ دامۋ باعدارلاماسى) تالداۋىنا سايكەس قازاقستاندا ايتارلىقتاي دەموگرافيالىق وزگەرىستەر بولىپ جاتىر. حالىق سانى بۇگىندە 20,3 ميلليون ادامنان 2050 -جىلى 24,3 ميلليون ادامعا دەيىن وسەدى دەپ بولجانىپ وتىر (ءوسىم %23). بۇل ءوسۋ ءومىر ءسۇرۋ ۇزاقتىعىنىڭ ۇلعايۋىنا جانە تۋۋدىڭ سالىستىرمالى تۇردە جوعارى كورسەتكىشتەرىنە بايلانىستى - ءبىر ايەلگە 3 بالا. بۇل تابىس دەڭگەيى ورتاشا دەڭگەيدەن جوعارى باسقا ەلدەردىڭ كورسەتكىشتەرىنەن ايتارلىقتاي جوعارى، - دەيدى پرەمەر-مينيستر.
