كەڭسە ءتىلى مەن قاراپايىم جۇرتتىڭ ءتىلى مۇلدە بولەك - نازگۇل قوجابەك
استانا. KAZINFORM - كەيدە ەكى قازاق قازاق تىلىندە سويلەسە تۇرا، ءبىر-ءبىرىن تۇسىنبەي جاتادى. ونىڭ سەبەبى نەدە؟ بۇل ساۋالعا «كالكاسىز قازاق ءتىلى» جوباسىنىڭ اۆتورى، اۋدارماشى، فيلولوگ نازگۇل قوجابەك Kazinform اگەنتتىگىنىڭ BIZDIÑ ORTA پودكاسىندا جاۋاپ بەردى.
- قازاق تىلىندە ديالەكت جوق دەپ ۇيرەتكەن ۇستازدارىمىز، ياعني تۇبەگەيلى ەرەكشەلەنەتىن ديالەكتىلەرى جوق، تەك جەرگىلىكتى ەرەكشەلىكتەرى بار. قازىر ءبىزدىڭ ءبىر-ءبىرىمىزدى تۇسىنبەي جاتقانىمىز، وڭىرلەرگە قاراي ەمەس، قىزمەت سالاسىنا قاتىستى. مىسالى، اكىمدىك قىزمەتكەرلەرىنىڭ ءتىلى، ياعني كەڭسە ءتىلى قاراپايىم جۇرتتىڭ تىلىنەن، سوت، مەديتسينا ءتىلى مۇلدە بولەك. سول ءتىلدى جاساپ وتىرعان مەنىڭ ارىپتەستەرىم، ءبىر-ءبىرىن تۇسىنبەيتىن ەتىپ قالىپتاستىرىپ وتىر، - دەدى نازگۇل قوجابەك اڭگىمە بارىسىندا.
ماماننىڭ مالىمدەۋىنشە، بىرەگەي ستاندارت جوق. ءار اۋدارماشى ءوز جاۋاپكەرشىلىگىن سەزىنۋ كەرەك.
- ءار مەكەمەدە ءبىر-بىردەن اۋدارماشى وتىرعانى - پارادوكس. مىسالى، ءبىر سوت وتىرىسىندا اكىمدىك قىزمەتكەرى، قاراپايىم ادام مەن سۋديا ۇشەۋى دە قازاق تىلىندە سويلەيدى ءبىراق، ءبىر-ءبىرىن تۇسىنبەي جاتادى. سەبەبى سۋديا سوت تىلىمەن، اكىمدىك قىزمەتكەرى كەڭسە تىلىمەن، ال قاراپايىم ادام جالپاق تىلمەن سويلەيدى. سودان بارىنە تۇسىنىكتى بولۋ ءۇشىن ورىس تىلىندە سويلەيىك دەپ شەشەدى. كومپانيالاردىڭ ماتىندەرىندەگى قاتەلەرگە قاتىستى ۇلكەن پارادوكس، ستەرەوتيپ قالىپتاسىپ كەلە جاتىر. فيلولوگتاردىڭ «كازاحوۆەد» دەگەن سۇيكىمسىز ءسوزى بار. كەيدە ءبىز مامان بولعان سوڭ ماڭدايشالارداعى جازۋعا سىن ايتامىز، كومپانيا يەلەرىنە مىناۋ دۇرىس ەمەس دەپ جازامىز، سول كەزدە «ناش كازاحوۆەد» دۇرىس دەپ ايتتى دەيدى. وسى جەردە كازاحوۆەد اتالىپ جۇرگەن ادامداردىڭ جاۋاپكەرشىلىگى بار، - دەيدى ول.
ايتا كەتسەك، «قازاق ءتىلىنىڭ ۇلتتىق سوزدىك قورى» اقپاراتتىق جۇيەسىن قالىپتاستىرۋ قاعيداسى ازىرلەندى.
سونداي-اق، بيىل كۇزدە قازاق ءتىلىن تەگىن ۇيرەتەتىن جاساندى زەيىن قوسىمشاسى قولدانىسقا بەرىلەدى.
ەسكە سالساق، بيىل بۋرابايدا وتكەن ۇلتتىق قۇرىلتايدا مەملەكەت باسشىسى قازاق تىلىندە تۇسىرىلگەن مۋلتفيلمدەر كوپ بولۋى قاجەتتىگىن ايتتى.
