كرۋيز لاينەرىندە 148 ادام بەلگىسىز دەرتكە شالدىقتى
استانا.قازاقپارات - كاريب تەڭىزىمەن ساياحاتتاپ جۇرگەن Caribbean Princess كرۋيز لاينەرىندە 148 ادامنان اسقازان- ىشەك اۋرۋىنىڭ بەلگىلەرى انىقتالدى.
بۇل تۋرالى ا ق ش اۋرۋلاردى باقىلاۋ جانە الدىن الۋ ورتالىعىنا (CDC) سىلتەمە جاساپ The New York Post باسىلىمى حابارلادى. ازىرگە جاپپاي سىرقاتتانۋدىڭ ناقتى سەبەبى بەلگىسىز.
17-قاراشاداعى دەرەكتەرگە سايكەس، بورتتاعى 2936 جولاۋشىنىڭ 134 ى جانە 1132 ەكيپاج مۇشەسىنىڭ 14 ءى وزدەرىن جايسىز سەزىنگەن. ناۋقاستاردىڭ بارلىعىندا قۇسۋ مەن ديارەيا بەلگىلەرى بايقالعان.
لاينەر 11-قاراشادا ا ق ش-تىڭ فلوريدا شتاتىنداعى فورت-لودەردەيل پورتىنان 12 كۇندىك ساياحاتقا شىققان. كەمە كولۋمبيا مەن پاناما كانالى ارقىلى وتەتىن باعىتتا ءجۇزىپ بارادى. ساپار باستالعاننان كەيىن ءتورت كۇن وتكەن سوڭ كەمە وپەراتورى Princess Cruises ينفەكتسيانىڭ ءورشۋى تۋرالى سانيتارلىق قىزمەتكە حابارلاعان.
قازىرگى ۋاقىتتا اۋىرعان جولاۋشىلار مەن قىزمەتكەرلەر وقشاۋلانىپ، كەمەدە دەزينفەكتسيالاۋ جۇمىستارى كۇشەيتىلدى. زەرتحانالىق ساراپتاما جۇرگىزۋ ءۇشىن سىنامالار الىندى، الايدا ونىڭ ناتيجەلەرى ءالى جاريالانعان جوق.
Princess Cruises كومپانياسى اۋرۋدىڭ جەڭىل تۇردە ءوتىپ جاتقانىن مالىمدەدى. لاينەر كەستەگە ساي باعىتىن جالعاستىرىپ، 23-قاراشادا فلوريداعا ورالۋى ءتيىس. ايتا كەتەيىك، بۇل - 2026-جىلى اتالعان كومپانيانىڭ كەمەلەرىندە تىركەلگەن ءتورتىنشى جاپپاي اسقازان-ىشەك ينفەكتسياسى.