كرەديتتى تولەۋگە اقشاڭىز جەتپەسە، بانك نە ىستەۋى كەرەك

بۇل ماسەلە قارجى نارىعىن رەتتەۋ جانە دامىتۋ اگەنتتىگىنىڭ ءتوراعاسى ءمادينا ءابىلقاسىموۆانىڭ قارجى ۇيىمدارىنىڭ باسشىلارىمەن كەزدەسۋىندە تالقىلاندى.

كەزدەسۋدە حالىقتىڭ شامادان تىس كرەديت الۋىن ازايتۋ، پروبلەمالىق بەرەشەكتى رەتتەۋ، ازاماتتاردىڭ وتىنىشتەرىن قاراۋ ساپاسى جانە قارجىلىق الاياقتىققا قارسى ءىس-قيمىل ماسەلەلەرى كوتەرىلدى.

اگەنتتىك مالىمەتىنشە، كەيىنگى ەكى جىلدا كەپىلسىز تۇتىنۋشىلىق كرەديت بەرۋگە قويىلاتىن تالاپتار كۇشەيتىلدى. بورىش جۇكتەمەسى كوەففيتسيەنتىنە قاتىستى تالاپتار قاتاڭداتىلىپ، تولەم مەرزىمى 90 كۇننەن استام كەشىكتىرىلگەن جاعدايدا قارىز بەرۋگە تىيىم سالىندى. سونىمەن قاتار تۇتىنۋشىلىق كرەديت سوماسىنا شەكتەۋلەر ەنگىزىلىپ، سىياقىنىڭ شەكتى جىلدىق ءتيىمدى مولشەرلەمەسى تومەندەتىلدى.

قابىلدانعان شارالاردان كەيىن كرەديتتىك پورتفەلدىڭ ءوسۋ قارقىنى 2025-جىلعى تامىزداعى 14,6 پايىزدان 2026-جىلعى تامىزدا 7,5 پايىزعا دەيىن تومەندەدى.

بانكتەر كليەنتتەردىڭ ماسەلەسىن وزدەرى شەشۋگە ءتيىس

اگەنتتىككە ازاماتتاردان تۇسەتىن وتىنىشتەردىڭ نەگىزگى سەبەپتەرىنىڭ ءبىرى - بەرەشەكتى رەتتەۋ ماسەلەسى. بيىلعى توعىز ايدا 144,3 مىڭ ءوتىنىش قارالعان. ونىڭ 48 پايىزى بانك سەكتورىنا، 33 پايىزى ميكروقارجى ۇيىمدارىنا، 9 پايىزى كوللەكتورلىق قىزمەتتەرگە قاتىستى بولعان.

ازاماتتار سونداي-اق بانكتىك شوتتاردى بۇعاتتاۋ، قارجىلىق الاياقتىق جانە كرەديتتىك تاريح ماسەلەلەرى بويىنشا جۇگىنگەن.

وسىعان بايلانىستى قارجى ۇيىمدارىنا پروبلەمالىق قارىزى بار كليەنتتەرمەن جۇمىستى كۇشەيتۋ جونىندە ۇسىنىستار بەرىلدى. اتاپ ايتقاندا، بانكتەر مەن ميكروقارجى ۇيىمدارى بەرەشەكتى رەتتەۋ شارالارىن قابىلداپ، قارىز الۋشىنىڭ تابىسى مەن ناقتى مۇمكىندىكتەرىن ەسكەرىپ شەشىم ۇسىنۋى قاجەت.

سونىمەن قاتار كليەنتتەردىڭ ماسەلەلەرىن مەملەكەتتىك ورگاندارعا جۇكتەمەي، قارجى ۇيىمدارىنىڭ وزدەرى شەشۋگە ءتيىس ەكەنى اتاپ ءوتىلدى. بانكتەر مەن ميكروقارجى ۇيىمدارىنداعى كليەنتتەردىڭ قۇقىقتارىن قورعاۋ بولىمشەلەرى وتىنىشتەردى ءمانى بويىنشا قاراپ، ماسەلەنى رەتتەۋ ءۇشىن ناقتى شارالار قابىلداۋى كەرەك.

ولاردىڭ جۇمىسىنىڭ تيىمدىلىگى وتىنىشتەرگە ۋاقىتىندا جاۋاپ بەرۋىمەن عانا ەمەس، كليەنتتەردىڭ ماسەلەلەرىن شەشۋ ناتيجەلەرىمەن دە باعالانۋعا ءتيىس.

ازاماتتاردىڭ وتىنىشتەرىن قاراۋ ءتارتىبى جەتىلدىرىلەدى

كەزدەسۋدە قارجى ومبۋدسمانى قىزمەتىن ودان ءارى دامىتۋ ماسەلەسى دە تالقىلاندى. ەگەر داۋ قارجى ۇيىمىنىڭ دەڭگەيىندە شەشىلمەسە، ومبۋدسمان ونى قولجەتىمدى ءارى تاۋەلسىز قاراۋعا مۇمكىندىك بەرۋگە ءتيىس.

وسى ماقساتتا FinKomek تسيفرلىق پلاتفورماسى بازاسىندا وتىنىشتەرمەن جۇمىس ىستەۋدىڭ بارلىق كەزەڭىن بىرىكتىرۋ مىندەتى قويىلدى. جۇيە ءوتىنىشتى قابىلداۋدان باستاپ، ونى ءتيىستى قارجى ۇيىمىنا نەمەسە قارجى ومبۋدسمانىنا جولداۋعا، قاراۋ مەرزىمىن باقىلاۋعا جانە ءوتىنىش بەرۋشىنى ناتيجەدەن حاباردار ەتۋگە دەيىنگى پروتسەستى قامتۋى كەرەك.

اگەنتتىك ازاماتتاردىڭ شاعىمدارىن تالداپ، انىقتالعان بۇزۋشىلىقتار بويىنشا قاداعالاۋ شارالارىن قابىلداماق. قايتالاناتىن شاعىمدار جۇيەلى ماسەلەلەردى انىقتاۋ جانە وسىنداي بۇزۋشىلىقتاردىڭ الدىن الۋ ءۇشىن پايدالانىلاتىن بولادى.

الاياقتىق جولمەن راسىمدەلگەن كرەديتتەر ازايدى

كەزدەسۋدە قارجىلىق الاياقتىققا قارسى شارالار دا قارالدى. الاياقتىق جولمەن قارىز راسىمدەۋدىڭ الدىن الۋ ءۇشىن شەشىم قابىلداۋ كەزەڭى، العاشقى قارىزدى الۋ كەزىندەگى جەكە قاتىسۋ تالابى جانە جەكەلەگەن جاس ساناتىنداعى كليەنتتەر ءۇشىن كەلىسىمدى قوسىمشا راستاۋ تالاپتارى ەنگىزىلگەن. ونلاين قارىز راسىمدەگەن كەزدە بيومەتريالىق سايكەستەندىرۋ دە كوزدەلگەن.

ۇسىنىلعان دەرەكتەرگە سايكەس، الاياقتىق جولمەن راسىمدەلگەن قارىزدار سانى 2024-جىلعى 8,7 مىڭنان 2026-جىلى 1,9 مىڭعا دەيىن ازايعان.

الداعى ۋاقىتتا قارجى ۇيىمدارىنىڭ الاياقتىققا قارسى جۇيەلەرىن جەتىلدىرۋ جانە ولاردىڭ تيىمدىلىگىن باعالاۋ ءۇشىن تاۋەلسىز اۋديت جۇرگىزۋ جوسپارلانىپ وتىر.

ەسكە سالايىق، مۇنىڭ الدىندا نەسيە الۋعا «ستوپ-كرەديت» قويعاندار قانداي قارىزداردى ءبارىبىر راسىمدەي الاتىنىن جازعانبىز.