كريستالينا گەورگيەۆا حالىقارالىق ۆاليۋتا قورىنىڭ باسشىسى لاۋازىمىنا جالعىز ۇمىتكەر اتاندى
استانا. KAZINFORM - حالىقارالىق ۆاليۋتا قورىنىڭ (ح ۆ ق) باسقارۋشى ديرەكتورى لاۋازىمىنا جالعىز ۇمىتكەر ح ۆ ق-نىڭ قازىرگى باسشىسى كريستالينا گەورگيەۆا بولدى، دەپ حابارلادى IMF.
«3-ساۋىردە حالىقارالىق ۆاليۋتا قورىنىڭ باسقارۋشى ديرەكتورى لاۋازىمىنا كانديداتتاردى ۇسىنۋ پروتسەسى اياقتالدى. ءبىر كانديدات ۇسىنىلدى، ول ح ۆ ق-نىڭ قازىرگى باسقارۋشى ديرەكتورى كريستالينا گەورگيەۆا»، - دەلىنگەن ح ۆ ق باسپا ءسوز حابارلاماسىندا.
جاقىن ارادا گەورگيەۆا مەن ح ۆ ق اتقارۋشى ديرەكتورلارى اراسىنداعى كەزدەسۋلەر وتەدى جانە بۇل پروتسەستى «مۇمكىندىگىنشە تەزىرەك، 2024 -جىلدىڭ ءساۋىر ايىنىڭ سوڭىنا دەيىن» اياقتاۋ جوسپارلانۋدا.
كريستالينا گەورگيەۆا - بولگاريالىق ەكونوميست جانە دۇنيەجۇزىلىك بانكتىڭ بۇرىنعى باس اتقارۋشى ديرەكتورى. ول بۇل قىزمەتتى 2017 -جىلدىڭ قاڭتارىنان بەرى اتقارىپ كەلەدى. 2019 -جىلدىڭ 1-قازانىنان باستاپ - ح ۆ ق باسقارۋشى ديرەكتورى. ونىڭ وكىلەتتىگى 2024 -جىلدىڭ قىركۇيەگىندە اياقتالادى.
Bloomberg بۇعان دەيىن گەورگييەۆا ەۋروپالىق وداقتىڭ قارجى مينيسترلەرىنىڭ قولداۋىنا يە بولعانىن حابارلادى.
حالىقارالىق ۆاليۋتا قورى - باستى كەڭسەسى ۆاشينگتوندا ورنالاسقان بىرىككەن ۇلتتار ۇيىمىنىڭ مامانداندىرىلعان مەكەمەسى. 1946 -جىلدان باستاپ ح ۆ ق باسشىسى ءارقاشان ەۋروپانىڭ وكىلى بولدى.
اۆتور
زارينا تۋعانبايەۆا
