كريشتيانۋ رونالدۋ سەريال تۇسىرمەك

فۋتبول جۇلدىزى بۇل جوبانى بريتانيالىق رەجيسسەر مەتتيۋ ۆونمەن بىرلەسىپ جۇزەگە اسىرىپ جاتىر، دەپ حابارلايدى Kursiv Media.

رونالدۋ جاڭا جوباسى تۋرالى Instagram پاراقشاسىندا حابارلادى.

«كەرەمەت جاڭالىق! مەنىڭ العاشقى Day 1s تەلەسەريالىمنىڭ ءوندىرىسى باستالدى. جاقىندا تولىعىراق اقپارات جاريالايمىز»، - دەپ جازدى فۋتبولشى.

جاريالانىمدا بريتانيالىق اكتەر دەميان ليۋيس پەن رەپەر دەيۆتىڭ سۋرەتتەرى، سونداي-اق انگليانىڭ «برەنتفورد» فۋتبول كلۋبىنىڭ كيىم اۋىستىراتىن بولمەسىنەن تۇسىرىلگەن كادر كورسەتىلگەن.

بۇعان دەيىن The Sun باسىلىمى سەريالدىڭ سيۋجەتى ۇلى بريتانياداعى فۋتبول اگەنتىنىڭ ءومىرى توڭىرەگىندە ءوربيتىنىن حابارلاعان. باستى كەيىپكەردى «وتان» (Homeland) تەلەسەريالى ارقىلى تانىلعان اكتەر دەميان ليۋيس سومدايدى.

باسىلىم مالىمەتىنشە، جوبانىڭ يدەياسى كەزىندە تەرري ءانريدىڭ اگەنتى بولعان داررەن دەينگە تيەسىلى. ونىڭ دا سەريالعا ءتۇسۋى مۇمكىن ەكەنى ايتىلعان.

كريشتيانۋ رونالدۋ سەريالدىڭ اتقارۋشى پروديۋسەرى قىزمەتىن اتقارادى. سونىمەن قاتار فۋتبولشىنىڭ كەيبىر ەپيزودتارعا ءوزى قاتىسۋى دا مۇمكىن.

رونالدۋ گولليۆۋد رەجيسسەرىمەن كومپانيا قۇرعان

«Day 1s» - رونالدۋ مەن بريتانيالىق رەجيسسەر مەتتيۋ ۆون 2025 -جىلدىڭ ساۋىرىندە نەگىزىن قالاعان UR·MARV Studios كومپانياسىنىڭ العاشقى ءىرى جوبالارىنىڭ ءبىرى. مەتتيۋ ۆون كورەرمەنگە «Kingsman» جانە «Kick-Ass» فيلمدەرىنىڭ رەجيسسەرى رەتىندە تانىمال.

كومپانيا كينو جانە تەليەۆيزيا سالاسىندا بىرنەشە جوبا ازىرلەپ جاتىر. سولاردىڭ ءبىرى - «Stuntnuts» ءفيلمى. باق مالىمەتىنشە، وعان گولليۆۋد جۇلدىزدارى مەتت دەيمون مەن كريس حەمسۆورت قاتىسادى دەپ كۇتىلۋدە.

ايتا كەتەيىك، كريشتيانۋ رونالدۋ 2026-جىلعى قاراشادا پورتۋگاليا قۇراماسىنداعى مانسابىن اياقتايتىنىن جاريالاعان. الايدا ول كلۋبتىق دەڭگەيدە فۋتبول ويناۋىن جالعاستىرىپ جاتىر. قازىر 41 جاستاعى شابۋىلشى ساۋد ارابياسىنىڭ «ءال- ناسر» كومانداسىندا ونەر كورسەتەدى.