كروكۋس سيتي حوللداعى شابۋىل كەزىندە قىز ءوزىن ءولى ەتىپ كورسەتىپ، ءومىرىن قۇتقارىپ قالدى

استانا. قازاقپارات – «كروكۋس سيتي حوللدا» لاڭكەستەردىڭ شابۋىلىنان زارداپ شەككەندەردىڭ ءبىرى ءوزىن قۇتقارۋ ءۇشىن ءولى ادام سەكىلدى ۇستاعان.

قىز جانتۇرشىگەرلىك وقيعا تۋرالى «112» Telegram-ارناسىندا ايتىپ بەردى.

SMARTNEWS. KZ باسىلىمىنىڭ حابارلاۋىنشا، جابىرلەنۋشى امان قالۋ ءۇشىن ءوزىن ءولى سەكىلدى كورسەتىپ، ەدەنگە قۇلاعانىن ايتتى. جاقىن ماڭداعى ادامدارعا شابۋىلداۋشىلاردىڭ ءبىرى وق جاۋدىردى. لاڭكەستىك شابۋىلدىڭ كۋاگەرلەرىنىڭ ايتۋىنشا، بەلگىسىز ادامدار ونىڭ كوزىنشە قىزدى اتىپ ولتىرگەن.

«ولار ەسىكتىڭ جانىندا تۇردى. ءبىزدى كوردى. ولاردىڭ بىرەۋى قايتادان بەرى قاراي جۇگىرىپ، ادامدارعا وق جاۋدىرا باستادى»، - دەدى قىز.

كۋاگەر قىز تەك زالدا جالىن تۇتانا باستاعاننان كەيىن ءوزىن قۇتقارا العان. الايدا قازىر ول اۋرۋحانادا جاتىر. قىزدىڭ بۇكىل دەنەسىن قاتتى كۇيىك شالعان. بۇگىندە دارىگەرلەر وعان بارلىق قاجەتتى ەم-دومدى بەرىپ جاتىر.

ەسكە سالايىق، رەسەيدەگى «كروكۋس سيتي حولل» قوجايىنى اراز اگالاروۆ العاش رەت كونسەرت زالىندا بولعان لاڭكەستىككە قاتىستى پىكىر ءبىلدىردى. 22-ناۋرىزدا ماسكەۋدەگى «كروكۋس سيتي حوللعا» كونسەرت كەزىندە تەررورلىق شابۋىل جاسالىپ، عيمارات ورتكە وراندى. تەرروريستەر عيماراتتا 18 مينۋت بولعان.