كرەديتىن وتەي المايتىن جاعدايعا تاپ بولعان ادام نە ىستەۋى كەرەك

استانا. Kazinform - بانك ومبۋدسمانى دارحان نۇرپەيىسوۆ بانكتەن نەسيە العان ادام قارىزىن وتەي المايتىن جاعدايعا تاپ بولسا، ءبىرىنشى كەزەكتە نە ىستەۋى كەرەگىن ايتتى.

несие
Коллаж: Canva

- ومىردە ءارتۇرلى جاعداي بولادى. قارىز الۋشى سونداي قيىن جاعدايعا تاپ بولسا، ول بانك ومبۋدسمانىنا جۇگىنۋگە قۇقىلى. ءبىراق وعان دەيىن ول بانكتىڭ ءوزى نەمەسە كوللەكتورلىق ۇيىمعا بارۋى كەرەك. ماسەلەسىن ايتىپ، ءوز ۇسىنىستارىن بەرۋى كەرەك. بانك 15 كۇننىڭ ىشىندە قارىز الۋشىنىڭ ۇسىنىستارىن قاراپ، نە كەلىسۋى كەرەك، نە كەلىسپەۋشىلىگىن ءبىلدىرىپ، ءوزىنىڭ ۇسىنىستارىن بەرۋى كەرەك. سودان كەيىن عانا ازامات ومبۋدسمان قىزمەتىنە جۇگىنە الادى. ونداي كەزدە ءبىز قارىز الۋشىنىڭ قارجىلىق جاعدايىن قاراپ، قۇجاتتارىن كورىپ، ءمان-جايعا كوز جەتكىزگەننەن كەيىن بىرگە وتىرىپ، بانككە ۇسىنىستارىمىزدى جىبەرەمىز. بۇل ۇسىنىستى بانك قاراپ، جاۋابىن بەرۋى كەرەك، - دەدى ول و ك ق الاڭىندا وتكەن باسپا ءسوز ءماسليحاتىندا.

سونداي - اق مامان ومبۋدسماننىڭ ارالاسۋىنان كەيىن دە بانك تاراپى نەسيە شارتتارىن قايتا قاراۋدان باس تارتسا، ازاماتتار نە ىستەۋى كەرەگىن ايتتى.

- بانك ءبىزدىڭ دە ۇسىنىستارىمىزبەن كەلىسپەسە نەمەسە زاڭدى تۇردە ونى قابىلدايتىن قۇقىعى بولماسا، وندا قارىز الۋشىنىڭ مەملەكەتتىك ورگانعا نەمەسە سوتقا جۇگىنۋگە قۇقىعى بار، - دەپ ءتۇيدى ءسوزىن دارحان نۇرپەيىسوۆ.

ايتا كەتەيىك، بۇعان دەيىن بانك ومبۋدسمانى ازاماتتاردىڭ بارلىق كرەديتى بويىنشا داۋلاردى رەتتەۋگە مىندەتتى بولاتىنى جايلى جازعان ەدىك.

سوڭعى جاڭالىقتار