كرەديتتى مەرزىمىنەن بۇرىن وتەۋ ءتيىمدى مە؟
كرەديتتى مەرزىمىنەن بۇرىن وتەگەن كەزدە نەنى ءبىلۋ كەرەك؟ Fingramota.kz ماڭىزدى سۇراقتارعا جاۋاپ بەردى.
بانكتەر نەمەسە م ق ۇ-دا قارىز شارتىن جاساعان كەزدە وعان قوسا مىندەتتى تۇردە تولەمدەر كەستەسى بەرىلەدى. وندا قارىزدى وتەۋ مەرزىمدەرى مەن مولشەرلەرى كورسەتىلەدى.
مەرزىمىنەن بۇرىن وتەگەن كەزدە ءسىز كرەديتتى پايدالانعان ناقتى مەرزىمگە عانا تولەم جاساي وتىرىپ، ارتىق تولەمدى ازايتاسىز. ەگەر كرەديت، مىسالى، ءبولىپ تولەۋ سياقتى پايىزسىز بولماسا، وسى فۋنكتسيانى پايدالانا وتىرىپ، ءبىرشاما ۇنەمدەۋگە بولادى.
كرەديت راسىمدەۋ كەزىندە اتالعان قارجى قۇرالىن قالاي پايدالانۋ كەرەكتىگىن ءتۇسىنۋ وتە ماڭىزدى. اي سايىنعى تولەم جاساۋ ارقىلى ءسىز قاراجاتتىڭ ءبىر بولىگىن بانكتىڭ پايداسىنا اۋداراسىز - بۇل قارجى ينستيتۋتى الاتىن پايىزدار، ال اقشانىڭ ءبىر بولىگى نەگىزگى بورىشتى وتەۋگە جۇمسالادى. كەلەسى ايدا پايىزدار تۇتاستاي كرەديتكە ەمەس، نەگىزگى بورىشتىڭ قالدىعىنا ەسەپتەلەدى.
كرەديتتى مەرزىمىنەن بۇرىن وتەۋ ءتيىمدى
ءسىز 1 جىلعا جىلدىق %25 بەن 1 ميلليون تەڭگە الدىڭىز دەيىك. تولەم جاساۋ اننۋيتەتتى كەستە بويىنشا، ياعني اي سايىن تەڭدەي تولەمدەرمەن جۇرگىزىلەدى.
كرەديت بويىنشا پايىزدار اي سايىن ازايا بەرەدى، ال نەگىزگى بورىشتى تولەۋگە اي سايىنعى تولەمنىڭ كوپ بولىگى جۇمسالادى. تيىسىنشە، نەگىزگى بورىشتىڭ تولەنۋگە ءتيىس قالعان بولىگىنىڭ مولشەرى نەعۇرلىم از بولسا، ءسىز بانككە سوعۇرلىم ازىراق پايىز تولەيتىن بولاسىز.
ءسىز مەرزىمىنەن بۇرىن وتەۋدىڭ شەڭبەرىندە تولەم جاسايتىن ۋاقىتتا بۇل اقشا ءدال نەگىزگى بورىشتى وتەۋگە كەتەدى، ال پايىزدار تەك تومەندەيدى. وسىلايشا، ءسىز كرەديتتى ەرتەرەك جاباسىز جانە ول بويىنشا ارتىق تولەم بارىنشا از بولادى.
مىسالى، ەگەر 2024 -جىلعى جەلتوقساندا ءسىز 300000 تەڭگەنى مەرزىمىنەن بۇرىن وتەۋ تۋرالى شەشىم قابىلداساڭىز، ءسىز كرەديتتى 4 ايعا ەرتەرەك وتەپ تاستايسىز
جانە 140531-89070 = 51461 تەڭگە ۇنەمدەيسىز. ەگەر ءسىز مەرزىمىنەن بۇرىن باسقا سومانى وتەيتىن بولساڭىز نەمەسە وسىلاي بىرنەشە رەت جاسايتىن بولساڭىز بانكتىڭ ءموبيلدى قوسىمشاسىندا سىزگە ءسىزدىڭ قانشا ۋاقىت پەن قانشا اقشا ۇنەمدەيتىنىڭىزدى ەسەپتەپ كورسەتەدى.
كرەديتتى مەرزىمىنەن بۇرىن وتەگەن كەزدە نەنى ءبىلۋ كەرەك؟
كوپ جاعدايدا اي سايىنعى تولەم ەسەپتەن شىعارىلىپ تۇراتىن شوتقا اقشا ەنگىزۋ جەتكىلىكسىز بولىپ جاتادى. مەرزىمىنەن بۇرىن وتەۋ وپەراتسياسىن ارنايى جۇرگىزۋ ماڭىزدى. ءموبيلدى قوسىمشادا بۇل ءۇشىن ارنايى كوماندا بەرىلۋى مۇمكىن. كەيبىر قارجى ۇيىمدارى ءتىپتى ءتيىستى ءوتىنىش جازىپ بەرۋدى سۇرايدى. بۇل جاعداي ايتارلىقتاي ماڭىزدى، سەبەبى ەگەر ءسىز بارلىق راسىمدەردى ورىنداماساڭىز، ءسىزدىڭ اقشاڭىز شوتتا قالىپ قويىپ، كەستەگە سايكەس ەسەپتەن شىعارىلۋى مۇمكىن. بۇل رەتتە تيىمدىلىك بولمايدى، ياعني بۇل ارتىق تولەمنىڭ جانە كرەديت مەرزىمىنىڭ ازايۋىنا الىپ كەلمەيدى.
كەيبىر جاعدايلاردا كرەديت مەرزىمىنە قاراي العاشقى 3 نەمەسە 6 ايدا مەرزىمىنەن بۇرىن وتەۋگە تىيىم سالىنعان. ءتيىستى تارماق مىندەتتى تۇردە قارىز شارتىندا كورسەتىلۋى كەرەك جانە كرەديتتىك ۇيىمنىڭ مەنەدجەرى بۇل تۋرالى قارىز الۋشىعا حابارلاۋعا ءتيىس.
قارىزدى مەرزىمىنەن بۇرىن وتەي وتىرىپ، كرەديت بەرۋ مەرزىمىن قىسقارتپاي، اي سايىنعى تولەمدى، ياعني ءسىز كرەديت بويىنشا اي سايىن تولەپ وتىراتىن سومانى ازايتۋعا بولادى. بۇل تارماقتىڭ تيىمدىلىگى ازىراق، سەبەبى كرەديتتىڭ مەرزىمى قىسقارمايدى، دەمەك قارىز الۋشى كرەديت مەرزىمىن قىسقارتقان جاعدايمەن سالىستىرعاندا پايىزداردى كوبىرەك تولەيدى جانە ونىڭ ارتىق تولەمى ازداپ ارتىق بولادى. ءبىراق كەيبىر جاعدايلاردا ول ءتيىمدى بولۋى مۇمكىن، سەبەبى جالپى ارتىق تولەمدى ازايتىپ، ناق وسى جەردە جانە وسى ۋاقىتتا ازىراق تولەۋگە مۇمكىندىك بەرەدى.
مەرزىمىنەن بۇرىن وتەۋ ەسەبىنەن اي سايىنعى تولەمدى تومەندەتۋ ءۇشىن بانككە جۇگىنىپ، ءتيىستى ءوتىنىش بەرۋ قاجەت.
قارىزدى راسىمدەۋ الدىندا كرەديتتىك ۇيىمنىڭ مەنەدجەرىنەن مەرزىمىنەن بۇرىن وتەۋ تالاپتارى قانداي ەكەنىن ناقتىلاۋ قاجەت. مىسالى، زاڭ بويىنشا بانكتەردىڭ نەگىزگى بورىشتى مەرزىمىنەن بۇرىن ءىشىنارا وتەۋ نەمەسە مەرزىمىنەن بۇرىن تولىق وتەۋدىڭ مىناداي جاعدايلارىن قوسپاعاندا:
ءبىر جىلعا دەيىنگى مەرزىمگە بەرىلگەن قارىزدى العان كۇننەن باستاپ التى ايعا دەيىن؛
ءبىر جىلدان استام مەرزىمگە بەرىلگەن قارىزدى العان كۇننەن باستاپ ءبىر جىلعا دەيىن قارىزداردى مەرزىمىنەن بۇرىن وتەگەنى ءۇشىن ايىپاقى نەمەسە سانكتسيالاردىڭ وزگە دە تۇرلەرىن الۋعا قۇقىعى جوق.
بۇل رەتتە كليەنت بانككە پايىزداردى كرەديتتى پايدالانۋدىڭ ناقتى كۇندەرى ءۇشىن عانا تولەيدى. مۇنىڭ ءبارى كرەديتتىك شارتتا جازىلعان. سوندىقتان كرەديت بەرۋشىنىڭ بورىشتىق مىندەتتەمەلەرىن مەرزىمىنەن بۇرىن وتەمەي تۇرىپ ونىڭ تالاپتارىن مۇقيات وقىپ شىعىڭىز.
ەگەر ءسىز كرەديتتى راسىمدەۋ كەزىندە ساقتاندىرۋدى ساتىپ العان بولساڭىز، ساقتاندىرۋ سىيلىقاقىسىنىڭ ءبىر بولىگىن قايتارۋعا ارەكەتتەنىپ كورۋگە بولادى. قايتارۋ مۇمكىندىگى دە شارتتا كورسەتىلگەن. تولىق زەردەلەپ الماي تۇرىپ شارتقا قول قويماڭىز!
مەرزىمىنەن بۇرىن وتەۋدەن بۇرىن كرەديتتىڭ ناقتى سوماسىن ناقتىلاپ الىڭىز: ەگەر ءسىز بۇرىن كرەديت بويىنشا مەرزىمدى كەشىكتىرگەن بولساڭىز، سىزدە قارىز جيناقتالىپ قالۋى مۇمكىن. جانە الداعى ۋاقىتتا شوتتى تولىقتىرعان كەزدە ەڭ الدىمەن ءوسىمپۇل مەن ايىپپۇل سوماسى، سودان كەيىن عانا اي سايىنعى تولەم ەسەپتەن شىعارىلادى.
قارىزدى قىسىلتاياڭ جاعداي بولماسا راسىمدەمەڭىز، اسىرەسە سىرتقى فاكتورلاردىڭ اسەرىنە ۇشىراپ، قارىزعا الىنعان اقشالاي قاراجاتقا يمپۋلسيۆتى ساۋدا جاساۋدىڭ قاجەتى جوق. ەگەر ءسىز كرەديتتى تولەي الاتىنىڭىزعا سەنىمدى بولماساڭىز، وندا كرەديت الماڭىز، جەكە بيۋدجەتىڭىزگە قوسىمشا اۋىرتپالىق سالۋدان بويىڭىزدى اۋلاق ۇستاڭىز! قارىزدى وتەگەننەن - العان جەڭىل.
