ۋكراينانىڭ تاعدىرىنا قاتىستى كەلىسىم بويىنشا ترامپ: نە جاقىندا جۇزەگە اسادى، نە ەشقاشان بولمايدى

استانا. KAZINFORM - ۋكرايناعا قاتىستى ءبىر توقتامعا كەلۋ جونىندەگى كەلىسىمگە جاقىندا قول جەتكىزەمىز نەمەسە مۇلدە جۇزەگە اسپايدى، دەپ مالىمدەدى ا ق ش پرەزيدەنتى دونالد ترامپ اق ۇيدە ۇلى بريتانيا پرەمەر-ءمينيسترى كير ستارمەرمەن كەزدەسۋى بارىسىندا، دەپ حابارلايدى ABC News.

ا ق ش پرەزيدەنتى كەزدەسۋدەن كەيىنگى باسپا ءسوز ءماسليحاتىندا ۋكرايناداعى قاقتىعىستى توقتاتۋ تۋرالى ايتىپ، «ءبىز ۇلكەن جەتىستىكتەرگە جەتتىك» دەدى.

- بۇل نە جاقىن ارادا بولادى، نە مۇلدە بولمايدى، - دەدى دونالد ترامپ.

ول ۋكراينامەن پايدالى قازبالاردى ءوندىرۋ بويىنشا الداعى كەلىسىمدى جوعارى باعالادى.

- بۇل ۋكراينا ءۇشىن جانە ءبىز ءۇشىن وتە جاقسى. امەريكالىق سالىق تولەۋشىلەر ەندى ۋكرايناعا كومەك پەن ونىڭ قورعانىسىنا جۇمسالعان جۇزدەگەن ميلليارد دوللار ءۇشىن وتەماقى الادى، بۇل ءوز الدىنا وتە لايىقتى ءىس، - دەپ اتاپ ءوتتى دونالد ترامپ.

ە و- مەن ساۋدا قاتىناستارىنا توقتالعان ترامپ ا ق ش- قا قاتىستى ادىلەتسىز ەكونوميكالىق تاجىريبەگە جاۋاپ رەتىندە ەۋروپا ەلدەرىنە باج سالىعىن ەنگىزۋ جوسپارىن قايتالادى. ۇلى بريتانياعا قاتىستى ترامپ ناقتى جاۋاپ بەرگەن جوق.

- مەنىڭ قاراۋىم كەرەك. ايتايىن دەگەنىم، ءبىز بۇگىن جاقسى پىكىرتالاس وتكىزەمىز، ولاردىڭ جاعىندا وتە تالانتتى بىرنەشە ادام بار. مەنىڭ ويىمشا، ءبىز تاريفتەر قاجەت بولمايتىن ناقتى ساۋدا كەلىسىمىن جاساۋعا جاقسى مۇمكىندىك بار، - دەپ مالىمدەدى دونالد ترامپ.

ۇلى بريتانيا پرەمەر-ءمينيسترى «نەگىزىندە وزىق تەحنولوگيا بار» جاڭا ەكونوميكالىق كەلىسىم تۋرالى جاريالادى.

- ايتايىن دەگەنىم، جاساندى ينتەللەكت قاتەرلى ىسىك اۋرۋىن ەمدەي الادى. بۇل ءبىزدىڭ عاسىر ءۇشىن سەرپىلىس بولۋى مۇمكىن. مىنە، ادامدارىمىزعا وسىلايشا كومەكتەسەمىز. كوپتەگەن مۇمكىندىكتەر بار، - دەدى كير ستارمەر.

ۇلى بريتانيا پرەمەر-ءمينيسترى ترامپقا كورول كارلدىڭ ءوز ەلىنە مەملەكەتتىك ساپارمەن كەلۋگە جانە بريتاندىق مەملەكەتتىك تۇسكى اسقا قاتىسۋعا شاقىرعان حاتىن تابىس ەتتى.

بۇعان دەيىن قاۋىپسىزدىك كەڭەسى ا ق ش- تىڭ ۋكرايناعا قاتىستى ۇسىنعان قارارىن قابىلداعانىن جازعان بولاتىنبىز.