ۋكرايناعا قارسى «ۆاگنەر» قۇرامىندا سوعىسقان قاراعاندىلىققا سوت ۇكىمى شىقتى
قاراعاندى قالاسى قازىبەك ءبي اۋداندىق سوتىنىڭ حابارلاۋىنشا، ش. قىلمىستىق كودەكستىڭ 170-بابىنىڭ 3-بولىگى بويىنشا ايىپتالعان.
وعان قارۋلى قاقتىعىسقا، اسكەري ءىس-قيمىلدارعا جانە كونستيتۋتسيالىق قۇرىلىستى قۇلاتۋعا جانە بۇزۋعا نەمەسە مەملەكەتتىڭ اۋماقتىق تۇتاستىعىن بۇزۋعا باعىتتالعان وزگە دە زورلىق-زومبىلىق ارەكەتتەرگە قاتىستى دەگەن ايىپ تاعىلعان.
ش. 2023-جىلدىڭ ناۋرىزىندا قاراعاندى وبلىسىنىڭ توپار كەنتىندەگى ۇيىندە «ۆ ك» الەۋمەتتىك جەلىسى ارقىلى «ۆاگنەر» جەكە اسكەري كومپانياسى تۋرالى بىلگەن. ول اقشالاي سىياقى الۋ ماقساتىندا ۋكراينا اۋماعىنداعى جاۋىنگەرلىك ءىس-قيمىلدارعا قاتىسۋعا كەلىسكەن.
سودان سوڭ رەسەي اۋماعىنا بارىپ، چ ۆ ك قاتارىنا قوسىلىپ، اسكەري دايىندىقتى جۇزەگە اسىرعان. ءساۋىردىڭ سوڭىندا ول ۋكراينا اۋماعىندا ورنالاسقان باحمۋت قالاسىنا جىبەرىلىپ، ول جەردە ۋكراينانىڭ كونستيتۋتسيالىق قۇرىلىسىن جانە اۋماقتىق تۇتاستىعىن بۇزۋعا باعىتتالعان ءىس-قيمىلدارعا قاتىسقان. سول جەردە جاراقات العان.
پروكۋرور سوتتان ش. العان اقشا تاركىلەنىپ، 6 جىل 8 اي مەرزىمگە باس بوستاندىعىنان ايىرۋ جازاسىن تاعايىنداۋدى سۇرادى.
سوتتالۋشى كىناسىن تولىق مويىندادى.
وسىلايشا سوت ونى 6 جىل 8 اي مەرزىمگە باس بوستاندىعىنان ايىردى. سونداي-اق العان اقشا تولىق تاركىلەندى. ش. جازاسىن قاۋىپسىزدىگى ورتاشا مەكەمەدە وتەيدى.
سوت ۇكىمى زاڭدى كۇشىنە ەندى.
