ۋكراينا مەن ا ق ش جاڭا كەزدەسۋگە دايىندالىپ جاتىر- زەلەنسكي
استانا. KAZINFORM - ۋكراينا پرەزيدەنتى ۆلاديمير زەلەنسكي سارسەنبى كۇنى كەشكە ا ق ش پەن ۋكراينا اراسىنداعى كەلىسسوزدەردە «وڭ قوزعالىس» بار ەكەنىن جانە ەكى تاراپ تا الداعى كەزدەسۋگە دايىندالا باستاعانىن مالىمدەدى، دەپ حابارلايدى euronews.
تۇنگى ۇندەۋىنەن كەيىن زەلەنسكي X سايتىندا ونىڭ اپپارات باسشىسى اندرەي ەرماكتىڭ ا ق ش-تىڭ ۇلتتىق قاۋىپسىزدىك جونىندەگى كەڭەسشىسى مايك ۋولتسپەن تەلەفون ارقىلى سويلەسكەنىن جانە ناتيجەلەر كەلەسى اپتادا بەلگىلى بولۋى مۇمكىن ەكەنىن جازدى.
ەرماك تەلەفون ارقىلى سويلەسكەنىن بولەك جازبادا راستادى. ول «ۋولتسپەن ءادىل جانە تۇراقتى بەيبىتشىلىك جولىنداعى كەلەسى قادامداردى تالقىلاعانىن» جازىپ، ا ق ش پەن ۋكراينا اراسىنداعى ەكىجاقتى قارىم-قاتىناستارداعى «پوزيتسيالاردى سايكەستەندىرۋ» تۋرالى پىكىر الماسقانىن قوسىپ ءوتتى.
زەلەنسكي سونداي-اق سارسەنبىدە بەيسەنبى كۇنى بريۋسسەلدە وتەتىن ە و سامميتى قارساڭىندا «كوپ حالىقارالىق جۇمىس» اتقارىلعانىن اتاپ ءوتتى. ول نيدەرلاند، پورتۋگاليا، سلوۆەنيا جانە گەرمانيا باسشىلارىمەن سويلەسىپ، قولداۋ كورسەتكەنى ءۇشىن العىسىن ءبىلدىردى.
بۇل ا ق ش ۋكراينامەن بارلاۋ جونىندە اقپارات الماسۋدى توقتاتقاننان كەيىن بولدى.
- ءبىز ءبىر قادام ارتقا شەگىنىپ، ءۇزىلىس جاسادىق جانە وسى قارىم- قاتىناستىڭ بارلىق اسپەكتىسىن قايتا قاراستىرىپ جاتىرمىز، - دەدى سارسەنبىدە ۇلتتىق قاۋىپسىزدىك جونىندەگى كەڭەسشى مايك ۋولتس.
ءبىراق ترامپ اكىمشىلىگىنىڭ شەنەۋنىكتەرى ۆاشينگتون مەن كيەۆ اراسىنداعى وڭ كەلىسسوزدەر توقتاتا تۇرۋدىڭ قىسقا مەرزىمدى بولاتىنىن بىلدىرەدى دەپ باسا ايتتى.
ەسكە سالا كەتسەك، بۇعان دەيىن ا ق ش پرەزيدەنتى دونالد ترامپ رەسەيدى ۋكرايناداعى اسكەري قاقتىعىستى توقتاتۋ جونىندە كەلىسسوزدەر جۇرگىزۋگە شاقىرىپ، ديپلوماتيا قاجەت ەكەنىن ايتتى. ال ترامپ پەن زەلەنسكي وتكەن اپتادا نە تۋرالى سويلەسكەنىن وسى ماتەريالدان وقي الاسىز. سارسەنبىدە ا ق ش پرەزيدەنتى دونالد ترامپ كونگرەستە سويلەگەن سوزىندە ۋكراينا پرەزيدەنتى ۆلاديمير زەلەنسكيدەن ۆاشينگتون مەن كيەۆ اراسىنداعى قارىم-قاتىناستى قالىپقا كەلتىرۋگە كۇش سالۋ تۋرالى حات العانىن مالىمدەدى.
