ۋكراينا ا ق ش- تىڭ دونباس شەكاراسىن وزگەرتۋ تۋرالى ۇسىنىسىنان باس تارتتى

وسى ارادا كيەۆتىڭ دونەتسك جانە لۋگانسك وبلىستارىنىڭ شەكاراسىن وزگەرتۋ جونىندەگى ا ق ش ۇسىنىسىن قابىلداماعانى بەلگىلى بولدى.

The Telegraph باسىلىمىنىڭ مالىمەتىنشە، امەريكالىق كەلىسسوز جۇرگىزۋشىلەر رەسەيگە دونباسقا تولىق باقىلاۋ ورناتقانىن جاريالاۋعا مۇمكىندىك بەرەتىن، ءبىراق ۋكراينانى كيەۆ باقىلاۋىنداعى قالالاردى بەرۋگە مىندەتتەمەيتىن ىمىرالى ۇسىنىس جاساعان.

ول ءۇشىن دونەتسك جانە لۋگانسك وبلىستارىنىڭ اكىمشىلىك شەكاراسىن وزگەرتۋ ۇسىنىلعان. مۇنداي باستاما تۋرالى بۇعان دەيىن The Economist باسىلىمى دا جازعان ەدى.

الايدا The Telegraph دەرەككوزدەرىنىڭ مالىمەتىنشە، ۋكراينا تاراپى بۇل ۇسىنىستان باس تارتقان.

- ۋكراينا دەلەگاتسياسى رەسەي باسىپ العان اۋماقتارعا قاتىستى ەشقانداي جەڭىلدىكتى تالقىلاعان ەمەس. ۋكراينا مۇنى ءىس جۇزىندە دە، زاڭ جۇزىندە دە ەشقاشان مويىندامايدى. كەلىسسوز باستالعالى بەرى ءبىزدىڭ ۇستانىمىمىز وسىنداي، - دەدى باسىلىمعا كەلىسسوزدەر بارىسىنان حاباردار دەرەككوز.

ەڭ كۇردەلى ماسەلە سوڭىنا قالدىرىلدى

بىرىككەن اراب امىرلىكتەرىنىڭ استاناسىندا كەلىسسوزدەر 10-11-قاراشادا ءوتىپ جاتىر. ءۇش ەلدىڭ وكىلدەرى جابىق ەسىك جاعدايىندا كەزدەسىپ جاتىر.

كەلىسسوزدەردىڭ العاشقى كۇنىندە تاراپتار سوعىس اياقتالعاننان كەيىنگى قاۋىپسىزدىك كەپىلدىكتەرى مەن تۇتقىن الماسۋ ماسەلەسىن تالقىلادى. ال ەكىنشى كۇننىڭ كۇن تارتىبىنە بەيبىت كەلىسىمگە قول جەتكىزۋگە كەدەرگى بولىپ وتىرعان اۋماق ماسەلەسى ەنگىزىلگەن.

بۇعان دەيىن ا ق ش مەملەكەتتىك حاتشىسى ماركو رۋبيو كەلىسسوزدەردىڭ العاشقى كۇنىن وڭ باعالاعان ەدى. ۋكراينا پرەزيدەنتى ۆلاديمير زەلەنسكي دە تالقىلاۋلاردى سىندارلى دەپ اتادى.

ەۋروپانى دا كەلىسسوزگە قوسۋدى كوزدەپ وتىر

ا ق ش الداعى كەلىسسوزدەرگە ەۋروپا ەلدەرىنىڭ قاتىسۋىنا كۇش سالىپ جاتىر. ستيۆ ۋيتكوفف پەن دجارەد كۋشنەر ماسكەۋدى كەلىسسوزدەر فورماتىن كەڭەيتۋگە كوندىرمەك. رەسەي بۇعان قارسى. ال كيەۆ ەۋروپانىڭ قاۋىپسىزدىگىنە قاتىستى ماسەلەلەردى ەۋروپانىڭ ءوز قاتىسۋىنسىز شەشۋگە بولمايتىنىن العا تارتىپ وتىر.

قازىر كەلىسسوز ۇستەلىندە ءۇش ەلدىڭ وكىلدەرى وتىر. ۋكراينا دەلەگاتسياسىن رۋستەم ۋمەروۆ باستاپ باردى. ونىڭ قۇرامىندا كيريلل بۋدانوۆ، سەرگەي كيسليتسا جانە داۆيد اراحاميا دا بار.

رەسەي اتىنان ۆلاديمير مەدينسكي باستاعان دەلەگاتسيا قاتىسىپ جاتىر. ونىڭ قۇرامىندا سەرگەي ريابكوۆ، ميحايل گالۋزين جانە كۇشتىك قۇرىلىمداردىڭ وكىلدەرى بار.

ا ق ش اتىنان كەلىسسوزدەرگە ستيۆ ۋيتكوفف پەن دجارەد كۋشنەر قاتىسىپ جاتىر.