كەنەتتەن شوت بۇعاتتالسا نە ىستەۋ كەرەك؟

استانا. KAZINFORM - قارجى نارىعىن رەتتەۋ جانە دامىتۋ اگەنتتىگى ازاماتتارعا بانك شوتى بۇعاتتالعان جاعدايدا قالاي ارەكەت ەتۋ كەرەگىن ءتۇسىندىردى.

ۆەدومستۆو مالىمەتىنشە، شوتتىڭ بۇعاتتالۋى - كەز كەلگەن كليەنت تاپ بولۋى مۇمكىن جاعداي جانە ونىڭ سەبەپتەرى ءارتۇرلى بولۋى مۇمكىن.

شوت نە سەبەپتى بۇعاتتالادى؟

مامانداردىڭ ايتۋىنشا، بۇعاتتاۋدىڭ ەڭ جيى كەزدەسەتىن سەبەپتەرى مىنالار:

- كۇماندى نەمەسە ادەتتەن تىس وپەراتسيالار (مىسالى، ءىرى سوماداعى نەمەسە جيى اۋدارىمدار، اسىرەسە شەتەلدەن كەلەتىن قاراجات)؛

- مەملەكەتتىك ورگانداردىڭ تالابى (سالىق ورگاندارى، سوت ورىنداۋشىلارى، قارجىلىق مونيتورينگ)؛

- بانكتىك جۇيەدەگى تەحنيكالىق اقاۋلار؛

- كارتا دەرەكتەرىن قاتە ەنگىزۋ نەمەسە كارتانىڭ جارامدىلىق مەرزىمىنىڭ اياقتالۋى.

شوت بۇعاتتالسا نە ىستەۋ كەرەك؟

ەگەر شوتىڭىزعا قول جەتكىزە الماي قالساڭىز، ەڭ الدىمەن اسىعىس شەشىم قابىلداماي، ناقتى سەبەپتى انىقتاۋ ماڭىزدى.

- الدىمەن بانك قوسىمشاسىنداعى حابارلامالاردى تەكسەرىڭىز. كوپ جاعدايدا بۇعاتتاۋ سەبەبى سول جەردە كورسەتىلەدى.

- بانكتىڭ كول-ورتالىعىنا حابارلاسىڭىز نەمەسە بولىمشەسىنە بارىپ، تولىق اقپارات الىڭىز.

- قانداي ارەكەت جاساۋ كەرەگىن ناقتىلاپ، قاجەت بولسا قۇجاتتاردى دايىنداڭىز.

- eGov.kz پورتالى نەمەسە سالىق تولەۋشىنىڭ جەكە كابينەتى ارقىلى قارىزداردىڭ بار-جوعىن تەكسەرىڭىز.

- قاراجاتتىڭ قايدان تۇسكەنىن دالەلدەيتىن قۇجاتتاردى الدىن الا دايىنداپ قويعان دۇرىس.

قالاي بۇعاتتاۋدىڭ الدىن الۋعا بولادى؟

ماماندار قاراپايىم ەرەجەلەردى ساقتاۋدى ۇسىنادى:

- جەكە شوتتى كاسىپكەرلىك ماقساتتا پايدالانباۋ؛

- ءىرى نەمەسە كۇمان تۋدىرۋى مۇمكىن وپەراتسيالار تۋرالى بانككە الدىن الا حابارلاۋ؛

- جەكە دەرەكتەردىڭ وزەكتىلىگىن باقىلاۋ؛

- قۇجاتتاردىڭ مەرزىمىن وتكىزىپ الماۋ؛

- سالىق جانە باسقا دا قارىزداردى ۋاقىتىندا تولەۋ.

ساۋىردە نەگە كەي شوتتار نەگىزسىز بۇعاتتالدى؟

ەسكە سالا كەتەيىك، 2026-جىلعى 9-ساۋىردە ەلدەگى كەيبىر بانك شوتتارى بويىنشا وپەراتسيالار ۋاقىتشا توقتاتىلعان ەدى. بۇل جاعدايعا قاتىستى قازاقستاننىڭ مەملەكەتتىك كىرىستەر كوميتەتى تۇسىنىكتەمە بەرگەن بولاتىن.

ۆەدومستۆونىڭ مالىمەتىنشە، سالىق جۇيەسى سيفرلاندىرىلىپ، كامەرالدىق باقىلاۋ اۆتوماتتى تۇردە جۇرگىزىلە باستادى. ياعني، ەندى حابارلامالار دا اۆتوماتتى تۇردە جىبەرىلىپ، ولاردىڭ ورىندالۋى دا جۇيە ارقىلى باقىلانادى.

الايدا جاڭا جۇيەنى ەنگىزۋ كەزىندە تەحنيكالىق قاتە ورىن الىپ، كەيبىر ازاماتتاردىڭ شوتتارى نەگىزسىز بۇعاتتالعان.

كوميتەت بۇل ماسەلەنىڭ جەدەل تۇردە تۇزەتىلگەنىن حابارلادى. بۇرىن جىبەرىلگەن شەكتەۋلەر كەزەڭ-كەزەڭىمەن قايتارىلىپ، جۇيە قازىرگى تاڭدا قالىپتى رەجيمدە جۇمىس ىستەپ تۇر.

سونىمەن قاتار ۆەدومستۆو ازاماتتاردان كەشىرىم سۇراپ، مۇنداي جاعدايلاردىڭ قايتالانباۋى ءۇشىن ءتيىستى شارالار قابىلدانعانىن اتاپ ءوتتى.