كەنتاۋلىق تۇرعىن جاستايىنان جەتىم قالعان كارىس، وزبەك، ورىس ۇلتىنىڭ بالالارىن باۋىرىنا باستى
تۇركىستان. KAZINFORM - بۇگىندە التىن جۇرەكتىڭ انانىڭ 18 بالاسى بار. كەنتاۋ قالاسىنىڭ تۇرعىنى تۇيمەگۇل ەرگەش قىزى اتا-اناسىنان ەرتە ايرىلعان 10 قىز بەن 8 ۇلدى قامقورلىققا العان. ولاردىڭ ۇلتتارى دا ءارتۇرلى. اتاپ ايتار بولساق، بىرەۋى ورىس، بىرەۋى وزبەك، ەندى بىرى كارىس ۇلتىنان.
قالعاندارى قازاقتىڭ قاراكوزدەرى. ءبىر شاڭىراق استىندا تاتۋ-ءتاتتى تۇرىپ جاتقان ءار ۇلت وكىلىنىڭ بالالارىن كورگەندە تۇيمەگۇل اپايدىڭ ءۇيى «شاعىن اسسامبلەيا» ىسپەتتى كورىنەدى.
«ءومىر وسىنىسىمەن ماڭىزدى، ماعىنالى. ءوزىم بالاجانمىن. جەتىم بالالاردىڭ بىرەۋدىڭ قولىنا جاۋتەڭدەپ، قاراپ جۇرگەنىن كورگەندە جۇرەگىم اۋىرادى. شىداي المايمىن. سوندىقتان بالا اسىراپ الامىن دەگەن شەشىمگە كەلدىم. ماعان بالالار ءارتۇرلى جاعدايدا كەلدى. بىرىن دۇنيەگە كەلە سالىسىمەن قولىما السام، ەندى بىرىن 1,5 جاسىندا، بىرەۋىن ەس بىلەر ەرەسەك شاعىندا قامقورلىعىما الدىم»، - دەيدى تۇيمەگۇل ەرگەش قىزى.
تۇرعىن ۇيدە بالالاردىڭ جاتتىعۋ جاساۋىنا، ساباق وقۋىنا، بوس ۋاقىتتارىن تيىمدى وتكىزۋىنە، دەمالۋىنا ارنالعان ارنايى بولمەلەر بار. قاجەتتى جيھازدارمەن جابدىقتالىپ، كورنەكىلىكتەرمەن قامتاماسىز ەتىلگەن. اۋلادا بۇلدىرشىندەر ءۇشىن ويىن قۇرالدارى ورناتىلعان. ياعني، ءاربىر بالانىڭ قالىپتى ازامات بولىپ وسۋىنە بارلىق جاعداي جاسالعان.
«بالالار ۇيىنە بارسام جۇرەگىم اۋىرادى. بارلىق بالالاردى اسىراپ العىم كەلىپ تۇرادى»، - دەيدى قامقور جان.
بۇگىندە تۇيمەگۇل ەرگەش قىزى ۇلدىڭ ۇلكەنى قايساردى ۇيلەندىرىپ، ەنشىسىن بەردى. ال، بويجەتكەن ەكى قىزىن توي جاساپ ۇزاتتى. سونداي-اق، ەكى قىزى ستۋدەنت بولسا، ءبىر ۇلى اسكەردەن وتان الدىنداعى بورىشىن وتەپ كەلدى. قالعانى مەكتەپتە وقىپ ءجۇر. نۇرقانات ەسىمدى ۇلى قاراشاڭىراققا باس بولىپ وتىر. ۇل-قىزدارىنان سۇيگەن نەمەرەلەرى دە بار.
«ۇلدارىمنىڭ بارلىعىن سۇندەتكە وتىرعىزىپ، توي جاساپ بەردىم. قازىر كۇندەلىكتى تىرشىلىكتە قولعابىس ەتۋدە. بارشاسى بوي جەتىپ، ەر جەتىپ ۇلكەن ومىرگە قادام باسىپ جاتىر. ولار دا ءبىر-بىرىنە باۋىرمال. نەمەرەلەرىم دە ءوسىپ كەلەدى. سولاردىڭ ءتاتتى قىلىعىن تاماشالاپ ءجۇرىپ، كۇننىڭ قالاي وتكەنىندە بىلمەي قالامىن» - دەيدى ول.
جالپى التىن جۇرەكتى انا بالا اسىراپ الۋدى 33 جاسىندا باستاعان. العاشقى قىزىن قولعا العان ساتىندە ۇلكەن اسەرگە بولەنىپتى. سودان جىل سايىن وتباسى مۇشەلەرى كوبەيە تۇسكەن. ىلگەرىدە بالالارعا قاراۋ، جەتىلدىرۋ قيىندىق تۋدىرعانىمەن، كەيىن قالىپتاسىپ كەتكەن. دەگەنمەن، ول «18 بالانى قامقورلىققا الامىن دەپ ويلاماعانمىن» - دەيدى.
«ءومىرىمنىڭ ءمانىسى - وزگەگە جاقسىلىق جاساۋ» - دەپ بىلەتىن قامقور جاننىڭ باستى ماقساتى - بۇلدىرشىندەرىن قاتارىنان كەم قىلماي ءوسىرۋ، ۇلكەن ازامات ەتىپ تاربيەلەۋ.
«بارلىعى اللانىڭ قالاۋىمەن بولدى. مەن باقىتتىمىن. مەن بالالارىممەن باقىتتىمىن» - دەيدى التىن جۇرەكتى انا.
اۆتور
قايرات زاينيشەۆ
