كەنتاۋدا 8 بەسىكتى قاتار تەربەتكەن انا تۇرادى
تاستاندى سابيلەردى تاربيەلەپ وسىرگەن كەنتاۋ قالاسىنىڭ تۇرعىنى گۇلجاھان كەرىمباي قىزى «وبلىسقا سىڭىرگەن ەڭبەگى ءۇشىن» توسبەلگىسىمەن ماراپاتتالدى، دەپ حابارلايدى Kazinform.
ەل ەگەمەندىگىن العان العاشقى جىلدارى كەنتاۋلىق جۇماشەۆتار اۋلەتى «ارنۇر» اتتى وتباسىلىق بالالار ءۇيىن اشتى. باستى ماقسات - تاستاندى سابيلەردى قامقورلىققا الۋ بولاتىن. وتاعاسى ىسقاق تۇرعانباي ۇلىنىڭ باستاماسىمەن قولعا الىنعان يگىلىكتى ءىستى زايىبى گۇلجاھان دا قولدادى. سول كەزدە وتباسىلىق ۇلگىدەگى بالالار ۇيىنە 13 تاستاندى ءسابي قابىلداندى. ولاردىڭ 8 ى بەسىكتەگى قۇنداقتاۋلى بۇلدىرشىندەر بولسا، قالعاندارىنىڭ جاسى ءالى بىرگە تولماعان پەرىشتەلەر ەدى. كەيىننەن 2 بالا تۋعان انالارىمەن قايتا قاۋىشتى. ال 7 ءسابيدى بالا ءيىسىن اڭساعان وزگە وتباسىلار باۋىرىنا باستى. قالعان 4 قىز قازىرگى كەزدە جۇماشەۆتار اۋلەتىنىڭ مۇشەلەرى.
«تاۋەلسىزدىك العان العاشقى جىلدار عوي. وتە قيىن كەزەڭدەردى باستان كەشىردىك. العاشقىدا «قالاي بولار ەكەن» دەپ قورىققانىمىز راس. دەگەنمەن، تاۋەكەل ەتتىك. بىردەن سەگىز بەسىكتى قاتار تەربەتكەن كەزدەرىم بولدى. بالالاردىڭ بىرەۋى قارنى اشىپ جىلاسا، بىرەۋىنىڭ ۇيقىسى كەلەدى. بارشاسىن جۇباتىپ جۇرگەندە تاڭ اتا باستايتىن. سودان جولداسىم ەكەۋمىز كەزەكپەن-كەزەك جۇباتىپ ءجۇرىپ، ۇيىقتايتىنبىز»، - دەيدى گۇلجاھان كەرىمباي قىزى.
بۇگىندە قىزداردىڭ بارلىعى جوعارى وقۋ ورىندارىن ءبىتىرىپ، ءارتۇرلى سالالاردا جەمىستى ەڭبەك ەتىپ كەلەدى. سونداي-اق، بارشاسى تۇرمىس قۇرىپ، ءبىر-ءبىر ءۇيدىڭ يبالى كەلىنى اتانىپ وتىر.
«قىزدارىم نەمەرەلەرىمدى الىپ كەلىپ تۇرادى. بارلىعى ءتاتتى. بۇرىنعى ساتتەردى تەك كۇلىپ قانا ەسكە الامىز»، - دەيدى اق جاۋلىقتى اجە.
ىسقاق جۇماشەۆ كوپ جىلدار بويى دەنساۋلىق ساقتاۋ سالاسىندا ەڭبەك ەتكەن. زەينەتكە شىققان سوڭ، جەكە كاسىپپەن اينالىستى. قالالىق اقساقالدار القاسىن باسقارىپ، قوعامدىق جۇمىستارعا بەلسەنە ارالاسقان. گۇلجاھان كەرىمباي قىزى دا اق حالاتتى ابزال جان. جۇبايىمەن بىرگە دۇنيەگە اكەلگەن 3 ۇل، 2 قىزدى ادامگەرشىلىگى مول، يمان ءجۇزدى جاندار ەتىپ تاربيەلەدى. بۇگىنگى كۇنى ءارقايسىسى ەلدىڭ دامۋىنا قىزمەت ەتىپ كەلەدى.
اتاپ ايتار بولساق، دارىگەرلەر وتباسىنىڭ تۇڭعىش ۇلدارى ارمان - ت. جۇرگەنوۆ اتىنداعى قازاق ۇلتتىق ونەر اكادەمياسىندا ۇستاز، عالىم، پروفەسسور. ال، ەكىنشى ۇلى نۇرجان كەنتاۋ قالاسىنداعى سۋرەت مەكتەبىنىڭ ديرەكتورى بولسا، قىزى شولپان - اتاتۇرىك اتىنداعى №4-مەكتەپ-ليتسەيدىڭ مۇعالىمى. ەرجان اكەسى مەن اناسىنىڭ جولىن قۋىپ، دارىگەر بولعان. قازىر كەنتاۋداعى ورتالىق اۋرۋحانانىڭ جانساقتاۋ ءبولىمىنىڭ مەڭگەرۋشىسى لاۋازىمىن اتقارادى. ال، بالجان ەسىمدى كەنجەلەرى استانادا ۋ ز ي دارىگەرى بولىپ ەڭبەك ەتۋدە.
«جولداسىم ءاردايىم جاقسىلىق جاساۋعا اسىعىپ تۇراتىن ادام ەدى. امال نەشىك، 80 جاستان اسقان شاعىندا ومىردەن ءوتتى. كوزى ءتىرى كەزىندە «التىن جۇرەك» نوميناتسياسىنىڭ جانە رەسپۋبليكالىق «مەرەيلى وتباسى»، «التىن شاڭىراق» بايقاۋلارىنىڭ جۇلدەگەرى اتاندىق. بۇل ءبىز ءۇشىن ۇلكەن قۋانىش. قازىر بارلىق ىسكە بالالارىم قامقورلىق تانىتادى»، - دەيدى گۇلجاھان كەرىمباي قىزى.
جۋىردا تۇركىستان وبلىستىق ارداگەرلەر كەڭەسى جانىنان قۇرىلعان «اجەلەر القاسىنا» 10 جىل تولۋىنا وراي وڭىردە «ايالى اجە» فورۋمى ءوتتى. وندا ۇلتتىق تاعامدار مەن داستۇرگە، قولونەرگە ارنالعان كورمە ۇيىمداستىرىلدى. سونداي-اق، ەل ىشىندە ەرەن ەڭبەگىمەن تانىلعان، ءداستۇرىمىزدى دارىپتەپ جۇرگەن اجەلەر «وبلىسقا سىڭىرگەن ەڭبەگى ءۇشىن» توسبەلگىسىمەن، وبلىس اكىمىنىڭ، وبلىستىق ءماسليحاتتىڭ جانە وبلىستىق ارداگەرلەر كەڭەسىنىڭ گراموتاسىمەن ماراپاتتالدى. ەڭبەگىمەن ەلگە تانىلعان اجەلەرگە ءارتۇرلى نوميناتسيالار بەرىلدى. سولاردىڭ ىشىندە، 8 بەسىكتى قاتار تەربەتكەن، «التىن جۇرەك» نوميناتسياسىنىڭ يەگەرى جۇماش گۇلجاھان كەرىمباي قىزى گران-پري يەگەرى اتانىپ، «وبلىسقا سىڭىرگەن ەڭبەگى ءۇشىن» توسبەلگىسىمەن ماراپاتتالدى.
«مەنىڭ بار باقىتىم بالالارىم، قىزدارىم. سولار امان بولسا - مەن باقىتتىمىن. اتالارى جاقسى ءتالىم-تاربيە بەرىپ، باعىت باعدارلارىن ايقىنداپ بەردى. قازىر سول جولمەن ءجۇرىپ كەلەدى. نەمەرەلەرىمدى بەتىنەن ءسۇيىپ، شوبەرەلەرىمنىڭ الاقانىنان ماي جالاپ وتىرعان مەن باقىتتىمىن» - دەيدى گۇلجاھان كەرىمباي قىزى.
اۆتور
قايرات زاينيشەۆ
