كۇنسۇلۋ زاكاريا جاڭا قىزمەتكە تاعايىندالدى
استانا. KAZINFORM - ۇلتتىق عىلىم اكادەمياسىنىڭ پرەزيدەنتى قىزمەتىن اتقارىپ كەلگەن كۇنسۇلۋ زاكاريا جاڭا لاۋازىمعا تاعايىندالدى.
«مەملەكەت باسشىسىنىڭ وكىمىمەن كۇنسۇلۋ دالتون قىزى زاكاريا قازاقستان رەسپۋبليكاسى پرەزيدەنتىنىڭ عىلىم جانە يننوۆاتسيالار ماسەلەلەرى جونىندەگى كەڭەسشىسى بولىپ تاعايىندالدى، ول بۇرىنعى اتقارعان لاۋازىمىنان بوساتىلدى»، - دەپ جازىلعان اقوردانىڭ رەسمي سايتىندا.
ايتا كەتەيىك، كۇنسۇلۋ دالتون قىزى ءال-فارابي اتىنداعى عىلىم جانە تەحنيكا سالاسىنداعى مەملەكەتتىك سىيلىقتىڭ لاۋرەاتى، جاراتىلىس تانۋ عىلىمدارى اكادەمياسىنىڭ مۇشەسى، رەسەي جاراتىلىس تانۋ اكادەمياسىنىڭ كوررەسپوندەنت-مۇشەسى، كوروناۆيرۋس ينفەكسياسىنا قارسى QazCovid-in (QazVac) قازاقستاندىق ۆاكسيناسىن ازىرلەۋگە قاتىسقان.
«بيوقاۋىپسىزدىك جانە بيوتەحنولوگيا» عىلىمي جۋرنالىنىڭ باس رەداكتورى. 200 دەن استام عىلىمي جاريالانىمنىڭ، 8 عىلىمي-ادىستەمەلىك قۇرالدىڭ، 5 مونوگرافيانىڭ، 29 ونەرتابىسقا بەرىلەتىن پاتەنتتىڭ، ونىڭ ىشىندە 2 حالىقارالىق پاتەنتتىڭ، پروفيلاكتيكالىق جانە دياگنوستيكالىق پرەپاراتتار ءوندىرىسى بويىنشا 7 نورماتيۆتىك-تەحنيكالىق قۇجاتتىڭ اۆتورى.
2022-جىلدىڭ 22- تامىزىنان 2023-جىلدىڭ ساۋىرىنە دەيىن «QazBioPharm» ۇلتتىق حولدينگى» ا ق باس ديرەكتورىنىڭ لاۋازىمىن اتقاردى. وعان دەيىن ق ر د س م «بيولوگيالىق قاۋىپسىزدىك پروبلەماسىن عىلىمي-زەرتتەۋ ينستيتۋتى» ر م ك باس ديرەكتورى بولعان.
كۇنسۇلۋ زاكاريا جاڭا قىزمەتىنە دەيىن پرەزيدەنت جانىنداعى قازاقستان رەسپۋبليكاسىنىڭ ۇلتتىق عىلىم اكادەمياسىنىڭ پرەزيدەنتى قىزمەتىن اتقاردى.
