كەنەسارى حاننان جەتكەن قۇران قوجا احمەت ياساۋي كەسەنەسىنە تاپسىرىلدى-ەرلان قارين
مارال يشاننىڭ قازاقتىڭ سوڭعى حانىنا سىيى قۇران كىتابى قايتا رەستاۆراتسيا جاسالىپ تۇركىستانداعى قوجا احمەت ياساۋي كەسەنەسىنە قويىلدى.
بۇل تۋرالى قازاقستان رەسپۋبليكاسىنىڭ مەملەكەتتىك كەڭەسشىسى ەرلان قارين ءمالىم ەتتى، دەپ حابارلايدى Kazinform.
«مەملەكەت باسشىسى قاسىم-جومارت توقايەۆ تۇركىستان قالاسىندا وتكەن ۇلتتىق قۇرىلتايدىڭ ەكىنشى وتىرىسىندا ايگىلى مارال يشاننىڭ كەنەسارى حانعا سىيلاعان قۇران كىتابىنىڭ تابىلىپ، ەلىمىزگە ورالعانىن سۇيىنشىلەپ جەتكىزگەن بولاتىن. جۇرتشىلىق حالقىمىزدىڭ سوڭعى حانى ۇستاعان كيەلى كىتاپتىڭ قازاقستانعا قايتا ورالۋىن جاقسى ىرىمعا بالادى. پرەزيدەنت تاپسىرماسىنا سايكەس، قۇران شىلدەدە قازاقستان مۇسىلماندارى ءدىني باسقارماسىنا تاپسىرعان ەدىك. ءمۇفتيات ونى قولجازبالار جانە سيرەك كىتاپتار ۇلتتىق ورتالىعىنا رەستاۆراتسيا جاساۋعا بەردى»،- دەپ جازدى ەرلان قارين Facebook تەگى پاراقشاسىندا.
ورتالىق قىزمەتكەرلەرى 3 ايعا جۋىق ىشىندە قۇراندى قايتا قۇراستىرىپ شىقتى. الدىمەن كىتاپ ازوت كامەراسىنا سالىنىپ، ونىڭ پاراقتارىندا ساقتالعان ءتۇرلى زيانكەستەردەن زالالسىزداندىرىلدى. ودان كەيىن فوتوفيكساتسيادان وتكىزىلىپ، ءاربىر بەتى مۇقيات شاڭنان تازارتىلدى. جىرتىلعان پاراقتارى قايتا بۇتىندەلىپ، مۇقاباسىن رەتكە كەلتىرىپ، جەتىسپەيتىن تۇستارىنا بىلعارى جاپسىرىلدى.
«سوڭىندا قۇران قايتا تۇپتەلدى. بارلىق رەستاۆراتسيا جۇمىسى حالىقارالىق ستاندارتتارعا ساي، كىتاپتىڭ پاراقتارىنا، تۇپتەۋىنە ماكسيمالدى زيان كەلتىرمەيتىن تۇردە جۇرگىزىلدى. قۇراننىڭ كونسترۋكتيۆتى ەلەمەنتتەرىنە وزگەرىستەر ەنگىزبەي، ءتۇپنۇسقانىڭ باستاپقى تۇپتەۋ، تىگۋ، توقۋ تاسىلدەرى قولدانىلدى»،-دەيدى ول.
مەملەكەتتىك كەڭەسشىسىنىڭ ايتۋىنشا، اۋقىمدى جۇمىستىڭ ناتيجەسىندە مارال يشان مەن كەنەسارى حاننان قالعان قۇندى مۇرا تولىقتاي جاڭارتىلدى. جاقىندا قازاقستان مۇسىلماندارى ءدىني باسقارماسى قۇراندى قوجا احمەت ياساۋي كەسەنەسىنە تاپسىردى.
«الداعى ءبىرشاما ۋاقىت كيەلى كىتاپ قاسيەتتى مەكەندە تۇرادى، قالىڭ كوپشىلىكتىڭ تاماشالاۋىنا مۇمكىندىك جاسالعان. ءبىراق مادەني مۇرانى ساقتاۋدىڭ وزىندىك تارتىپتەرى بار. سوندىقتان كەيىن ول جەرگە قۇراننىڭ جوعارى ساپالى كوشىرمەسى قويىلادى. ال كيەلى كىتاپتىڭ ءتۇپنۇسقاسى قولجازبالار جانە سيرەك كىتاپتار ۇلتتىق ورتالىعىنا بەرىلىپ، سوندا ساقتالادى»،-دەيدى ول.
