كۇننىڭ ەرتە باتۋىنا بايلانىستى ساباق ۋاقىتى قىسقاراتىنى راس پا؟

استانا. قازاقپارات - مەسسەندجەرلەردە كۇننىڭ ەرتە باتۋىنا بايلانىستى ساباق ۋاقىتى قىسقاراتىنى تۋرالى اقپارات تارادى. ماسساگەت ءتىلشىسى بۇعان قاتىستى وقۋ-اعارتۋ مينيسترلىگىنە ساۋال جولدادى. ۆەدومستۆو بۇل اقپاراتتى جوققا شىعاردى.

«2-اۋىسىم وقۋشىلارى ساباقتان تاراعاندا كۇن وتە قاراڭعى بولۋىنا بايلانىستى ساباق ۇزاقتىعى ۋاقىتشا 40 مينۋتقا اۋىستىرىلدى»، - دەلىنگەن تاراعان اقپاراتتا.

وقۋ-اعارتۋ مينيسترلىگى بۇل اقپاراتقا قاتىستى پىكىر ءبىلدىردى.

«ساباق ۋاقىتتارىن زاڭ بويىنشا جەرگىلىكتى ورگان شەشەدى. سەبەبى اياز نەمەسە ءتۇرلى ءىس-شارا سەكىلدى ءتۇرلى جاعداي بولادى»، - دەلىنگەن جاۋاپتا.

وقۋ-اعارتۋ مينيسترلىگىنىڭ وكىلدەرى كۇننىڭ ەرتە باتۋىنا بايلانىستى ساباق ۋاقىتىن قىسقارتۋ جوسپاردا جوعىن ايتتى.

بۇل حابارلاما استاناداعى اتا-انالار چاتىندا تاراعان. رەداكسيا استانا ءبىلىم باسقارماسىنا ساۋال جولدادى.

«استانا قالاسىنىڭ ءبىلىم باسقارماسى قىسقى ۋاقىتتا ساباقتاردىڭ ۇزاقتىعىن قىسقارتۋ تۋرالى بۇيرىق شىعارمادى. سول سەبەپتى، ساباق ۋاقىتىن قىسقارتۋ ماسەلەسى قاراستىرىلىپ جاتقان جوق»، - دەپ جاۋاپ بەردى ۆەدومستۆوداعىلار.

ەسكە سالايىق، 2024 -جىلعى 1-ناۋرىزدا قازاقستان ءبىرىڭعاي ۋاقىت بەلدەۋىنە كوشتى. ءبىراق تۇرعىنداردىڭ باسىم كوپشىلىگى ءبىرىڭعاي ۋاقىت بەلدەۋى كەرى اسەر ەتىپ جاتقانىن ايتىپ، پەتيتسيا جينادى.

كەيىن ۇكىمەتتە ۋاقىت بەلدەۋىنە قاتىستى داۋعا نۇكتە قويىلدى.

پرەمەر-مينيستر ولجاس بەكتەنوۆ نەعۇرلىم تۇسىنىكتى اقپاراتتىق-ءتۇسىندىرۋ ناۋقانىن جۇرگىزۋدى تاپسىردى.

«ساۋدا ءمينيسترى قولدانىستاعى ۋاقىت بەلدەۋىنە قاتىستى جان-جاقتى دالەلدەر كەلتىرە وتىرىپ، ناقتى جاۋاپ بەردى. ۇكىمەت بۇل شەشىمدى قولدايدى. ءبىز ءبىرىڭعاي ۋاقىت بەلدەۋىنە بەكەردەن-بەكەر اۋىسقان جوقپىز. ەل اۋماعىنىڭ كوپ بولىگى بەسىنشى ۋاقىت بەلدەۋىندە ورنالاسقان. سوندىقتان بۇل - عىلىمي تۇرعىدان دۇرىس شەشىم»، - دەدى بەكتەنوۆ.