كەنجەبەك شايقاقوۆتىڭ «ايقاي» فيلمى فرانسيانىڭ حالىقارالىق كينوفەستيۆالىندە گران-پري جەڭىپ الدى
استانا. KAZINFORM - قازاقستاندىق رەجيسسەر كەنجەبەك شايقاقوۆتىڭ «ايقاي» تولىقمەتراجدى كوركەم فيلمى فرانسيانىڭ ۆەزۋل قالاسىندا وتكەن 30-حالىقارالىق ازيا فيلمدەرى كينوفەستيۆالىندە حالىقارالىق قازىلار القاسى تاعايىنداعان گران-پريدى جەڭىپ الدى.
ۇلتتىق كينونى قولداۋ مەملەكەتتىك ورتالىعىنىڭ مالىمەتىنشە، كارتينا بۇعان قوسا ورتا ازيا كينوسىنشىلارىنىڭ «نەتپاك» جۇلدەسىن جانە مارك حااس اتىنداعى ارنايى سىيلىقتى دا يەلەنگەن.
سونداي-اق، فيلمدە باستى رولدەردى سومداعان ورىنبەك شايماعامبەتوۆ پەن ارنۇر اكرامعا قازىلار القاسىنىڭ ارنايى ديپلومى تابىستالدى.
وسىلايشا ءتورت بىردەي جۇلدەگە يە بولعان «ايقاي» تورەشىلەردى ءتانتى قىلعان تاڭداۋلى فيلمدەردىڭ ءبىرى رەتىندە ۆەزۋل كينوفەستيۆالىنىڭ تاريحىندا قالدى.
ايتا كەتەرلىگى، بۇعان دەيىن وڭتۇستىك كورەيادا 4-13- قازان ارالىعىندا وتكەن ايگىلى پۋسان كينوفەستيۆالىندە اتالعان قازاقستاندىق كارتينا Window on Asian Cinema باعدارلاماسىندا كورسەتىلىپ، تۇساۋى كەسىلگەن بولاتىن.
سونىمەن قاتار، «ايقاي» قاراشا ايىندا بىشكەك حالىقارالىق كينوفەستيۆالىنە قاتىسىپ، فيلمنىڭ رەجيسسەرى كەنجەبەك شايقاقوۆ قازىلار القاسى ۇسىنعان «ۇزدىك سەناري» نوميناتسياسى بويىنشا ارنايى جۇلدەنى يەلەندى.
ەستەرىڭىزگە سالا كەتسەك، كينوكارتينا قر مادەنيەت جانە سپورت مينيسترلىگىنىڭ تاپسىرىسى بويىنشا «ۇلتتىق كينونى قولداۋ مەملەكەتتىك ورتالىعى» ك ە ا ق قولداۋىمەن تۇسىرىلگەن.
«فيلمدە كۇللى قازاقتىڭ قاسىرەتى بولعان «سەمەي پوليگونى» قۇرباندارىنىڭ تاعدىرى يادرولىق جارىلىستان زارداپ شەگىپ، قوس اياقسىز دۇنيەگە كەلگەن ازاماتتىڭ ءومىرى ارقىلى بەينەلەنەدى. جارىنان ايىرىلعان جالعىزباستى ەر ادام مەن جارىمجان اكەسىنە جاناشىر، قامقور بولا بىلگەن بالانىڭ كۇيبەڭ تىرشىلىگى ارقىلى رەجيسسەر 1980-90-جىلدارداعى حالىقتىڭ جاعدايىن كورسەتەدى» - دەلىنگەن حابارلامادا.
كوركەم فيلمنىڭ ءتۇسىرىلىمى اباي وبلىسى، اياگوز اۋدانى، شىڭعوجا اۋىلىندا وتكەن.
رەجيسسەردىڭ ايتۋىنشا، كارتينادا باستى رولدەگى مەلىس اتتى كەيىپكەردى كاسىبي اكتەر ەمەس، راسىندا ەكى اياعىنان ايىرىلعان قىزىلوردالىق ازامات - ورىنبەك شايماعانبەتوۆ سومداعان. ال مەلىستىڭ مەكتەپ قابىرعاسىندا وقيتىن ۇلى - جالعاستىڭ ءرولىن الماتى وبلىسى قاراساي باتىر اتىنداعى مەكتەپتىڭ 7- سىنىپ وقۋشىسى ارنۇر اكرام ويناعان.
سونداي-اق، قوسالقى رولدەردە بەلگىلى اكتەرلار ەربولات القوجايەۆ، بەينۇر بايمۇحامبەتوۆ، ەرلان مالايەۆ، ايبەك يمانقۇلوۆ، ايعانىم نۇرسۇلتان بوي كورسەتەدى.
«فيلمنىڭ ءتۇسىرىلىم كەزەڭى 2022-جىلدىڭ قازان ايىندا اياقتالىپ، 2023-جىلدىڭ ناۋرىز ايىندا مونتاج كەزەڭى باستالدى. ماۋسىم ايىنىڭ سوڭىنا دەيىن سوزىلعان مونتاج كەزەڭىندە فيلمنىڭ ءتۇسى وڭدەلىپ، قايتا دىبىس جازۋ، كومپيۋتەرلىك گرافيكا، دىبىس ارلەۋ جۇمىستارى جۇرگىزىلگەن. فيلمنىڭ سوڭعى نۇسقاسى مەملەكەتتىك ۇلتتىق كينونى قولداۋ ورتالىعىنىڭ ەكسپەرتتى كەڭەس وكىلدەرىنە 26-ماۋسىم كۇنى كورسەتىلىپ، بەكىتىلدى» - دەيدى رەجيسسەر كەنجەبەك شايقاقوۆ.
فيلمنىڭ رەجيسسەرى جانە سەناري اۆتورى - كەنجەبەك شايقاقوۆ 2014-جىلى «امانات ك ز» پروديۋسەرلىك ورتالىعىنىڭ قارجىلاندىرۋىمەن «dsfilm» كينوستۋدياسىندا دەبيۋتتىك «كۇركو» اتتى فيلمىن تۇسىرگەنىن ەسكە سالا كەتكەن ابزال. اتالعان كينوكارتينا دا بىرنەشە حالىقارالىق كينوفەستيۆالدەردە جۇلدەلى ورىندار يەلەنگەن.
