كۇن نە جەل ەلەكتر ستانساسىن سالاتىن ينۆەستورلار اقشانى العان سوڭ ەشقانداي جاۋاپكەرشىلىك ارقالامايدى - تيمۋر جانتيكين

الماتى. KAZINFORM - مەگاپوليستە يادرولىق فيزيكا سالاسىنداعى وتاندىق جانە شەتەلدىك مامانداردىڭ قاتىسۋىمەن «اتوم ەنەرگەتيكاسى جانە ونىڭ رەسۋرستىق بازاسىن دامىتۋ» تاقىرىبىندا دوڭگەلەك ۇستەل ءوتتى. جيىن بارىسىندا «قازاقستاندىق اتوم ەلەكتر ستانسيالارى» ج ش س باس ديرەكتورى تيمۋر جانتيكين قازىر قولدانىستاعى ەلەكتر ستانسيالارىنا قاراعاندا ا ە س-تىڭ قانداي ارتىقشىلىقتارى بار ەكەنىن ايتىپ بەردى.

ق ا ە س باسشىسى اتوم ەلەكتر ستانساسىنىڭ سالىنۋى ەلىمىزدىڭ ءبىرقاتار سالالارىنا وڭ اسەر ەتەتىنىن ايتتى.

ونىڭ ايتۋىنشا، ا ە س قۇرىلىسى ەلىمىزدىڭ عىلىمي- تەحنيكالىق جانە جوعارى بىلىكتى مامانداردى دايىنداۋ باعىتىنداعى الەۋەتىنىڭ وسۋىنە، ستانسيا قۇرىلىسى كەزىندە 8 مىڭعا جۋىق ادامدى جۇمىسپەن قامتۋعا جانە ا ە س-تىڭ وزىندە جۇمىس ىستەيتىن 2 مىڭعا جۋىق جەرگىلىكتى ماماندى دايىنداۋعا مۇمكىندىك بەرەدى.

«سوڭعى جىلدارى ەلىمىزدە ەلەكتر ەنەرگياسىن تۇتىنۋ ايتارلىقتاي ءوستى جانە ونىڭ تاپشىلىعى تەك ارتا بەرمەك. نەگىزگى ەنەرگيا ءوندىرۋدىڭ بالامالى كوزدەرىن ىزدەۋ بارىسىندا زاماناۋي، قاۋىپسىز اتوم ەلەكتر ستانسياسىن سالۋ مۇمكىندىگى زەرتتەلىپ جاتىر. اتوم ەلەكتر ستانساسىن سالۋ ماسەلەسى بىرنەشە جىلدان بەرى كۇن تارتىبىنەن تۇسپەي كەلەدى، ءبىزدىڭ ازاماتتاردىڭ پىكىرىن ەسكەرە وتىرىپ، ەل باسشىلىعى بۇل ماسەلەنى رەفەرەندۋمعا شىعارۋدى ۇسىندى. اتوم ەلەكتر ستانسياسى جوباسىنىڭ قورشاعان ورتاعا تيگىزەتىن اسەرى، تۇرعىندار مەن قورشاعان ورتا قاۋىپسىزدىگىنىڭ كەپىلدىكتەرى تۋرالى قازىردىڭ وزىندە ەلىمىزدىڭ وڭىرلەرىندە قوعامدىق تالقىلاۋلار وتكىزىپ جاتىرمىز»، - دەدى «قازاقستاندىق اتوم ەلەكتر ستانسيالارى» ج ش س باس ديرەكتورى تيمۋر جانتيكين.

سونداي-اق تيمۋر جانتيكين ەلەكتر ستانساسىنىڭ قۇرىلىسى بىتكەن سوڭ ينۆەستورلارعا ەشقانداي مىندەت تاعىلماسا، ال ا ە س قۇرىلىسىنا جاۋاپتى كومپانيا ونىڭ پايدالانۋ مەرزىمى اياقتالعاننان كەيىنگى جۇمىسقا دا جاۋاپتى بولاتىنىن اتاپ ءوتتى.

«بۇگىنگى كۇنى ەلەكتر ستانسالارىن سالۋ كەزىندە ولاردى پايدالانۋدان شىعارۋ، قالدىقتارىن جويۋ نەمەسە كادەگە جاراتۋ بويىنشا تالاپتار قويىلمايدى. ەلەكتر ستانسياسى 20 جىل جۇمىس ىستەيدى، سودان كەيىن نە بولادى؟ مىسالى، كۇننەن نەمەسە جەلدەن جۇمىس ىستەيتىن ستانسالاردى الايىق. قازىر ينۆەستور ونى سالادى دا، اقشانى العان سوڭ ەشقانداي مىندەتسىز كەتە بەرەدى. ال ەلەكتر ستانساسىن پايدالانۋ ۋاقىتى بىتكەن كەزدە ونىمەن ءوزىمىز اينالىسۋىمىز كەرەك بولادى. اتوم ەلەكتر ستانسالارىندا جاعداي باسقاشا. ياعني، ا ە س-تە قاۋىپسىزدىك ماسەلەسى تولىق رەتتەلگەن جانە ءاردايىم باقىلاۋدا بولادى. اتوم رەاكتورلارى قۇنىنىڭ جارتىسىنان كوبىن قاۋىپسىزدىك جۇيەسى قۇرايدى. ا ە س-تى پايدالانۋ كەزىندە جانە توتەنشە جاعدايدا قاۋىپسىزدىكتى قامتاماسىز ەتەتىن بىرنەشە قورعانىس دەڭگەيى بار. سونىمەن قاتار ءبىز جوبانىڭ قارجى- ەكونوميكالىق مودەلىن جاساعان كەزدە راديواكتيۆتى قالدىقتاردى، پايدالانىلعان يادرولىق وتىندى شىعارۋ جانە جويۋ جۇمىسىن ونىڭ جالپى قۇنىنا كىرگىزەمىز»، - دەدى ق ا ە س ديرەكتورى.

اۆتور
دوسبول اتاجان