كەم دەگەندە 180 تەڭگە بولسىن: الماتى اۆتوپاركتەرى جولاقىنى 20 تەڭگەگە كوتەرۋگە قارسى شىقتى

Автобус лето жаз Астана
فوتو: ۆيكتور فەديۋنين/ Kazinform

الماتى. KAZINFORM - الماتىدا قوعامدىق كولىكتىڭ جولاقىسىن 20 تەڭگەگە كوتەرۋ مۇمكىندىگى قاراستىرىلىپ جاتىر. قالا اكىمى قاۋلىسىنىڭ ءتيىستى جوباسى تالقىلاۋ ءۇشىن اشىق ن ق ا پورتالىنا جاريالاندى.

الماتى قالاسىنىڭ جولاۋشىلار تاسىمالى كاسىپورىندارى قاۋىمداستىعى اتاپ وتكەندەي، كەيبىر اۆتوپارك يەلەرى اتالعان تاريف شىعىندى جاپپايدى دەپ وتىر.

«ۇسىنىلعان 120 تەڭگە اۆتوپاركتىڭ ماسەلەسىن شەشپەيدى. مارشرۋتتاعى ورتاشا تاريف 310 تەڭگە بولعاندا، جولاقى كەمىندە جارتىسى، ياعني 180 تەڭگە بولۋى كەرەك. ءبارى كونديتسيونەرى بار جاڭا اۆتوبۋسپەن جۇرگىسى كەلەدى، سوندىقتان ساپالى قىزمەت ءۇشىن ءتيىستى تولەم بولعانى دۇرىس. اكىمدىك بىزگە كەم دەگەندە 170 ميلليون تەڭگە تۇراتىن ەلەكترمەن جۇرەتىن اۆتوبۋستار ساتىپ الۋعا شارت قويادى. سونىمەن قاتار، مارشرۋت سانى كوبەيىپ جاتىر، ولارعا قىزمەت كورسەتۋ ءۇشىن جۇرگىزۋشىلەر قاجەت. ول ءۇشىن ولارعا باسەكەگە قابىلەتتى جالاقى تولەۋىمىز كەرەك. سوندىقتان بۇل - شامالى عانا ءوسىم»، - دەدى City-Bus ج ش س ديرەكتورى ابىلاي وستەمىر.

قازىر الماتىدا قوعامدىق كولىكتەگى تاريف قۇنى قولما-قول اقشاسىز تولەۋ كەزىندە 100 تەڭگە جانە قولما-قول تولەۋ كەزىندە 200 تەڭگە مولشەرىندە بەلگىلەنگەن.

اكىمدىك قوعامدىق كولىكتە جول ءجۇرۋ قۇنىن 20 تەڭگەگە قىمباتتاتىپ، 120 تەڭگەگە دەيىن ارتتىرۋ مۇمكىندىگىن قاراستىرىپ جاتىر.

سونداي-اق، جۇرگىزۋشىلەر اقشا جيناۋعا الاڭداماۋى ءۇشىن قولما-قول اقشامەن تولەمدى الىپ تاستاۋ دا جوسپاردا.

بۇعان دەيىن الماتىدا قوعامدىق كولىكتە جول ءجۇرۋ اقىسى وزگەرەتىنىن جازعان ەدىك.

اۆتور
الما مۇقانوۆا

سوڭعى جاڭالىقتار