كەلەسى كىم ريم پاپاسى بولۋى مۇمكىن

ۆاتيكان. قازاقپارات - 21 - ءساۋىر كۇنى قوس وكپەسى قابىنۋىنىڭ سالدارىنان 88 جاسىندا ريم پاپاسى فرانسيسك كوز جۇمدى. كاتوليك شىركەۋىنىڭ كەلەسى باسشىسى كىم بولا الادى جانە ول قالاي سايلانادى؟ بۇل تۋرالى Kazinform اگەنتتىگىنىڭ مەنشىكتى ءتىلشىسى ارنايى ماتەريال دايىندادى.

كاتوليك شىركەۋىنە جاڭا باسشى بولۋى مۇمكىن بىرنەشە ۇمىتكەر بار:

پەترو پارولين (70 جاستا، يتاليا) - ۆاتيكاننىڭ مەملەكەتتىك حاتشىسى، ساياسي ۇستانىمى ورتاشا، فرانتسيسك پاپانىڭ باعىتىن جالعاستىرۋشى رەتىندە قاراستىرىلادى.

فريدولين امبونگو بەسۋنگۋ (65 جاستا، كونگو دەموكراتيالىق رەسپۋبليكاسى) - افريكا مەن ماداگاسكار ەپيسكوپتىق كونفەرەنتسيالارى سيمپوزيۋمىنىڭ ءتوراعاسى، كونسەرۆاتيۆتى كوزقاراسىمەن تانىمال.

ۆيم ەيك (71 جاستا، نيدەرلاند) - بۇرىنعى دارىگەر، پاپا فرانسيسكتىڭ ءبىرقاتار رەفورمالارىنا قارسى شىققان قاتاڭ كونسەرۆاتور.

پەتەر ەردو (72 جاستا، ۆەنگريا) - كونسەرۆاتيۆتى ۇستانىمداعى كاردينال، اجىراسقاندار مەن قايتا ۇيلەنگەندەردىڭ قاۋىمداستىققا قاتىسۋىنا قارسى.

لۋيس انتونيو تاگلە (67 جاستا، فيليپپين) - پروگرەسسيۆتى كوزقاراستا، لگبت مەن اجىراسقان كاتوليكتەردى شىركەۋگە تارتۋدى قولدايدى.

رەيموند بەرك (76 جاستا، ا ق ش) - ۋلتراكونسەرۆاتور، فرانسيسك پاپانىڭ رەفورمالارىن اشىق سىنعا العان.

ماريو گرەك (67 جاستا، مالتا) - ورتاشا باعىتتاعى كانديدات، شىركەۋ ىلىمىندە ينكليۋزيۆتىلىككە ءمان بەرەدى.

ماتتەو ماريا دزۋپپي (69 جاستا، يتاليا) - بولونيا ارحيەپيسكوپى، فرانسيسك پاپانىڭ ۆاتيكانداعى نەگىزگى وداقتاستارىنىڭ ءبىرى.

ايتا كەتەيىك، پاپا فرانتسيسك قازىرگى داۋىس بەرۋگە قۇقىلى كاردينالداردىڭ باسىم بولىگىن ءوزى تاعايىنداعان. بۇل ونىڭ باعىتىن جالعاستىراتىن ءىزباساردىڭ تاڭدالۋىنا ىقپال ەتۋى مۇمكىن.

كاتوليك شىركەۋىنىڭ باسشىسى قالاي سايلانادى؟

پاپانى سايلاۋ — ەجەلگى داستۇرلەرگە ساي وتەتىن كۇردەلى ۇدەرىس. ول كونكلاۆ دەپ اتالادى، بۇل «جابىق جينالىس» دەگەندى بىلدىرەدى. كەلەسىدەي كەزەڭدەردەن تۇرادى:

پاپانىڭ قايتىس بولۋى نەمەسە تاقتان باس تارتۋى

پونتيفيك قايتىس بولعاندا نەمەسە وتستاۆكاعا كەتكەندە (مىسالى، 2013 -جىلى بەنەديكت XVI)، Sede Vacante — ياعني «تاقتىڭ بوس قالۋى» كەزەڭى باستالادى.

كاردينالداردى جيناۋ

ۆاتيكانعا شامامەن 200 كاردينال شاقىرىلادى. ءبىراق داۋىس بەرە الاتىندارى - جاسى 80  نەن اسپاعاندار (ادەتتە شامامەن 120 ادام) .

سيكستين كاپەللاسىنداعى كونكلاۆ

كاردينالدار سيكستين كاپەللاسىنا كىرىپ، سايلاۋعا قاتىساتىندارىنا جانە قۇپيانى ساقتايتىندارىنا انت بەرەدى. كاپەللانى ەشكىم تاستاپ كەتە المايدى، سىرتپەن بايلانىسقا تۇسۋگە تىيىم سالىنادى.

داۋىس بەرۋ پروتسەسى

ءار كاردينال ۇمىتكەردىڭ اتىن قاعازعا جازىپ، داۋىس بەرەدى. ۇمىتكەردىڭ سايلانۋى ءۇشىن 2/3 داۋىستى جيناۋى كەرەك. ەگەر ناتيجە شىقپاسا، بيۋللەتەندەر ارنايى حيميكاتپەن ورتەلەدى — قارا ءتۇتىن — جاڭا پاپانىڭ ءالى سايلانباعانىن بىلدىرەدى. جاڭا پاپا سايلانعاندا ءتۇتىن اق بولادى.

پاپا ەسىمىن تاڭداۋ جانە العاشقى ءسوز

سايلانعان كاردينالدان: «سەن بۇل سايلاۋدى قابىلدايسىڭ با؟» - دەپ سۇرايدى. ول كەلىسسە، پاپالىق ەسىم تاڭدايدى (مىسالى، فرانسيسك، بەنەديكت، يوانن، پاۆەل). سودان كەيىن ول اۋليە پەتر سوبورىنىڭ بالكونىنا شىعىپ، «Habemus Papam!» - «بىزدە جاڭا پاپا بار!» - دەگەن جاريالاۋ جاسالادى. جاڭا پاپا حالىقتى العاشقى رەت جارىلقاپ، ءوز قىزمەتىن باستايدى.

ەسكە سالا كەتەيىك، 21 -ءساۋىر كۇنى ريم پاپاسى فرانسيسك 89 جاسقا قاراعان شاعىندا كوز جۇمدى.