كەلەسى كەلگەندە تاۋلى ايماقتاردى ارالايمىن: تۇركىستانعا ءابۋ-دابيدەن ۇشىپ كەلگەن تۋريست
تۇركىستان. KAZINFORM - «ABU- DHABI — TURKISTAN» باعىتىنداعى العاشقى ۇشاق تۇركىستان اۋەجايىنا قوندى.
بۇگىن تۇركىستان حالىقارالىق اۋەجايىنا ابۋ-دابيدەن «Wizz Air» اۋەكومپانياسىنىڭ Airbus 321 ۇشاعى كەلىپ قوندى. بىرىككەن اراب امىرلىكتەرىنىڭ تانىمال تۋريستىك قالاسىنان باعىت العان ۇشاقتا 100 جولاۋشى، 7 ەكيپاج مۇشەسى بولدى. ال، ءدال وسى كۇنى رۋحاني استانا تۇركىستاننان ءابۋ- دابيگە 200 ادام اتتاندى.
تۇركىستان حالىقارالىق اۋەجايىنىڭ باسقارۋشى ديرەكتورى يلياس نۇعمانوۆتىڭ ايتۋىنشا، 100 جولاۋشىنىڭ %40 ى شەتەلدىكتەر، ياعني تۋريستەر.
«بيلەتتەردىڭ باعاسى وتە قولجەتىمدى. Wizzair.com سايتى مەن ءموبيلدى قوسىمشاسىندا 19 مىڭ تەڭگەدەن، ياعني ب ا ءا- ءنىڭ 159 ديرحامىنان باستالادى. قوس قالا اراسىندا ساياحات جاساۋدى جوسپارلاعاندار ءۇشىن بيلەتتەردى الدىن الا ساتىپ الۋدى ۇسىنامىز. ەگەر كورسەتىلگەن سايتقا تىركەلىپ، كلۋب مۇشەسى اتانعان جاعدايدا %10 عا دەيىنگى جەڭىلدىكتەردى الۋعا مۇمكىندىك بار. رەيستەر اپتانىڭ سەيسەنبى، بەيسەنبى جانە سەنبى كۇندەرى ورىندالادى»، - دەدى يلياس نۇعمانوۆ.
ابۋ- دابيدەن ۇشىپ كەلگەن جولاۋشىلاردىڭ اراسىندا ءۇندىستان ەلىنىڭ ازاماتتارى بار. سونىڭ ءبىرى احمەت باشي ءوز اسەرىمەن ءبولىستى.
«مەن دۋبايدا تۇراتىن ءۇندىستاندىقپىن. بۇكىل الەمدى ساياحاتتاپ ءجۇرمىن. بۇعان دەيىن وزبەكستان ەلىندە بولدىم. مادەنيەتتەرىڭىز ۇقساس ەكەن. قازاقستانعا جۇبايىممەن بىرگە 4 كۇنگە كەلدىك. قاي قالالارعا باراتىنىمىزدى ءالى شەشكەن جوقپىز. قوناق ۇيگە ورنالاسقان سوڭ ويلانىپ، ەرتەڭ ساياحاتتاۋدى باستايمىز. بۇل رەيستىڭ اشىلعانى - مەنىڭ تاعى دا وسىندا كەلۋىمە مۇمكىندىك بەرەدى. كەلەسى جولى تاۋلى ايماقتاردى كورەتىن بولامىن»، - دەدى احمەت باشي.
تۇركىستان - بيىل تۇركى الەمىنىڭ تۋريستىك استاناسى مارتەبەسىنە يە بولعانى ءمالىم. وسىعان وراي، جىل سوڭىنا دەيىن حالىقارالىق دەڭگەيدە ءتۇرلى فورماتتا اۋقىمدى ءىس- شارالار ۇيىمداستىرۋ كوزدەلۋدە.
جالپى تۇركىستان حالىقارالىق اۋەجايى ارقىلى ستامبۋل جانە ەل-كۋۆەيتكە، قازاقستان ىشىندە استانا، الماتى، قاراعاندى، ورال، اقتوبە جانە اقتاۋ قالالارىنا رەيستەر تۇراقتى ۇشادى.
اۆتور
قايرات زاينيشيەۆ
