كەلەسى جىلى قىتايدىڭ قازاقستانداعى تۋريزم جىلى وتەدى

Туризм
فوتو: الەكساندر پاۆسكي / Kazinform

استانا. قازاقپارات - 2025 -جىلى قىتايدىڭ قازاقستانداعى تۋريزم جىلى وتەدى. بۇل تۋرالى قىتاي حالىق رەسپۋبليكاسىنىڭ ءتوراعاسى شي جينپيڭمەن كەلىسسوزدەردەن كەيىنگى باسپا سوزگە ارنالعان مالىمدەمە بارىسىندا مەملەكەت باسشىسى قاسىم-جومارت توقايەۆ ايتتى.

«كەلىسسوزدەر بارىسىندا مادەني-گۋمانيتارلىق بايلانىستى جانە تۋريزم سالاسىنداعى ىقپالداستىقتى كۇشەيتۋگە باسا نازار اۋدارىلدى. وسى ساپار اياسىندا بەيجىڭدە قازاقستاننىڭ جانە استانادا قىتايدىڭ مادەني ورتالىقتارى اشىلدى. مۇنى ەكىجاقتى بايلانىستى بەكەمدەۋ ءۇشىن جاسالعان وتە ماڭىزدى قادام دەپ ايتۋعا بولادى. بۇل باستامالار حالىقتارىمىزدى مادەني تۇرعىدان جاقىنداتىپ، ءوزارا دوستىق پەن تاتۋ كورشىلىك قاتىناستاردى نىعايتۋعا ىقپال ەتەدى دەپ سەنەمىن. مۇنان بولەك، ەكى ەل اۋماعىندا تۇراقتى تۇردە مادەني ءىس-شارالار وتكىزۋگە ۋاعدالاستىق»، - دەدى پرەزيدەنت.

مەملەكەت باسشىسى قازاقستان مەن قىتاي ازاماتتارى ءۇشىن ەكى ەل اراسىندا ۆيزاسىز رەجيم قولدانىلا باستاعانىن ەرەكشە اتاپ ءوتتى.

«قازىر ونىڭ يگىلىگىن ازاماتتارىمىز كورىپ وتىر. اسىرەسە، ەكى ەلدىڭ كورشىلەس ايماقتارىنىڭ حالقىنا، كاسىپكەرلەر مەن تۋريستەرگە، جاستار مەن شەتەلدىك ارىپتەستەرگە ءتيىم بولدى. بيىل ناۋرىزدا بەيجىڭدە قازاقستاننىڭ قىتايداعى تۋريزم جىلى سالتاناتتى تۇردە اشىلدى. كەلەسى جىلى وسى شارانىڭ جالعاسى رەتىندە قىتايدىڭ قازاقستانداعى تۋريزم جىلى وتەدى. بۇگىن قول جەتكىزىلگەن كەلىسىمدەر ەلدەرىمىز اراسىنداعى بايلانىستاردى نىعايتىپ، حالقىمىزدىڭ يگىلىگىنە قىزمەت ەتەدى دەپ سەنەمىن»، - دەدى قاسىم-جومارت توقايەۆ.

سوڭعى جاڭالىقتار