كەلەسى جىلى باسپانا باعاسىندا قانداي وزگەرىس بولۋى مۇمكىن - ساراپشى پىكىرى
كەلەسى جىلى باسپانا باعاسى قىمباتتاي ما، الدە قۇلدىراي ما؟ بۇل ساۋالعا قازاقستاننىڭ ريەلتورلارى بىرلەسكەن قاۋىمداستىعى پرەزيدەنتىنىڭ كەڭەسشىسى نينا لۋكيانەنكو جاۋاپ بەردى، دەپ حابارلايدى Kazinform.
«جىل سوڭىنا دەيىن ارزانداعان تۇرعىن ءۇي باعاسىنىڭ قايتادان كوتەرىلۋى مۇمكىن ەمەس. ال كەلەسى جىل قانداي بولماق؟ كەلەسى جىل كۇردەلى بولادى. كوپ جايت جىلجىمايتىن مۇلىك نارىعى مەن قۇرىلىس سالاسىنا جاۋاپتى مەملەكەتتىك ورگانداردىڭ ءىس-ارەكەتىنە بايلانىستى»، - دەدى نينا لۋكيانەنكو اگەنتتىك تىلشىسىنە بەرگەن سۇحباتىندا.
وسى ورايدا، ساراپشى كوپتەگەن قۇرىلىس كومپانيالارىنىڭ ءبىرقاتار جوباسى جۇرتشىلىق نازارىن اۋدارتقانىن اتاپ ءوتتى.
«بۇل دۇرىس تا. الماتى قالاسى مەن الماتى وبلىسىندا قولدانىستاعى زاڭناما تالاپتارىنا ساي سالىنباعان نىسانداردى ءسۇرۋ نەمەسە جارتىلاي ءسۇرۋ تۋرالى قاۋلىلاردى كوردىك. ولاردىڭ سانى 40 قا جۋىقتايدى. مۇنان بولەك، مەملەكەتتىك ورگاندار قۇرىلىس كومپانيالارى قۇرىلىستارىنىڭ نورما تالاپتارىنا سايكەستىگىن تەكسەرۋدى قولعا الدى. دەمەك، جىل ىشىندە ۇسىنىستار سانىنىڭ تومەندەۋى، ساتىپ الۋشىلاردىڭ سالىنىپ جاتقان نىساندار بويىنشا كەلىسىمشارت جاساسۋدا بارىنشا ساقتىق تانىتۋى بايقالادى»، - دەدى ول.
سونىمەن قاتار ول باسپانا باعاسىنىڭ كۇرت ارزانداۋىنا دا ەش العىشارت جوق ەكەندىگىن ايتادى.
«باعانىڭ كۇرت قۇلدىراۋىنا ەش العىشارت جوق. جوعارىدا اتاپ وتكەن جايتتاردى ەسكەرسەك، باعانىڭ ايتارلىقتاي كوتەرىلۋى دە بولمايدى. باعاعا ىقپال ەتۋىن جالعاستىرىپ وتىرعان ينفلياتسيانى دا قاپەردەن شىعارماعان ءجون»، - دەدى نينا لۋكيانەنكو.
